رەسەيدىڭ نوۆگورود وبلىسىنىڭ گۋبەرناتورى الەكساندر درونوۆ 10 قاراشاعا قاراعان ءتۇنى ايماققا ۇشقىشسىز ۇشاتىن اپپاراتتارمەن جاپپاي شابۋىل جاسالعانىن مالىمدەدى.

گۋبەرناتوردىڭ حابارلاۋىنشا، شابۋىل سالدارىنان ءبىر ونەركاسىپ نىسانى زاقىمدانىپ، اۋەدە اتىپ تۇسىرىلگەن درون سىنىقتارى ەكى ساياجاي ءۇيىن بۇلدىرگەن. الدىن الا مالىمەت بويىنشا، وقيعادان زارداپ شەككەندەر جوق.

ايماق باسشىسى شابۋىلعا ۇشىراعان ناقتى كاسىپورىننىڭ اتىن اتاعان جوق. دەگەنمەن، ۋكراينالىق مونيتورينگ ارنالارى سوققىنىڭ ستارايا رۋسسا قالاسىندا ورنالاسقان №123 اۆياتسيالىق جوندەۋ زاۋىتىنا باعىتتالۋى مۇمكىن ەكەنىن جازۋدا. اتالعان كاسىپورىندا يل-76, يل-78 جانە ل-410 ۇشاقتارىنا، سونداي-اق ولاردىڭ قوزعالتقىشتارىنا تەحنيكالىق قىزمەت كورسەتىلىپ، جوندەۋ جۇمىستارى جۇرگىزىلەدى. بۇل اقپاراتقا قاتىستى ازىرگە رەسمي راستاۋ بەرىلگەن جوق.

سونىمەن بىرگە رەسەيدىڭ قورعانىس مينيسترلىگى وتكەن ءتۇنى ەلدىڭ بىرنەشە ايماعىندا اۋقىمدى اۋە شابۋىلىنا تويتارىس بەرىلگەنىن حابارلادى. رەسمي مالىمەتكە سايكەس، نوۆگورود، بريانسك، بەلگورود، كۋرسك، كالۋگا، ورەل، سمولەنسك وبلىستارىنىڭ، كراسنودار ولكەسىنىڭ جانە اننەكسيالانعان قىرىم تۇبەگىنىڭ اۋە كەڭىستىگىندە ۋكراينالىق 155 درون اتىپ تۇسىرىلگەن. مۇنى راستايتىن تاۋەلسىز دەرەككوزدەر ءالى جەتكىلىكسىز.

Abai.kz