سەيسەنبى, 17 قاراشا 2026
جاڭالىقتار 304 0 پىكىر 17 قاراشا, 2026 ساعات 15:14

بوقاەۆتىڭ اۆتوشەرۋىنە بولىنگەن ميلليوندار قايدا كەتتى؟ سوتتا بانك كوشىرمەلەرى زەرتتەلدى

سۋرەت: baq.kz سايتىنان الىندى.

الماتى قالاسىنىڭ المالى اۋداندىق سوتىندا سانجار بوقاەۆتىڭ ءىسى بويىنشا سوت پروتسەسىندە قارجىلىق قۇجاتتاردى زەرتتەۋ باستالدى. ەكى كومپانيانىڭ بانك كوشىرمەلەرىن تالداۋ ناتيجەسىندە سوت حالىقارالىق اۆتوشەرۋگە جۇمسالعان ميلليونداعان تەڭگەنىڭ قالاي بولىنگەنى جانە قانداي جولمەن قولما-قول اقشاعا اينالدىرىلعانى كورسەتىلدى.

باستى نازار سانجار بوقاەۆتىڭ جيەنىنىڭ باقىلاۋىنداعى «BM Trust» جشس-ءنىڭ بانك شوتتارىنا اۋدارىلدى. قۇجاتتارعا سايكەس، كومپانيا كاسىپوداقتان 27,2 ميلليون تەڭگە كولەمىندە قاراجات العان. ونىڭ ۇستىنە العاشقى اۋدارىمدار كەلىسىمشارتقا قول قويىلعان كۇنى-اق باستالعان. مەملەكەتتىك ايىپتاۋشى 2018 جىلدىڭ شىلدە-قاراشا ايلارى ارالىعىندا اتالعان كومپانيانىڭ شوتتارىنان «وزگە شىعىندار» دەگەن نەگىزبەن 10 ميلليون تەڭگەدەن استام قاراجات قولما-قول اقشاعا اۋدارىلعانىنا ءمان بەردى.

بۇدان بولەك، قاراجاتتىڭ اۆتوشەرۋگە ەش قاتىسى جوق بۋحگالتەرلىك قىزمەتتەر مەن ءۇي-جايلاردى جالعا الۋعا جۇمسالعانى انىقتالدى. بۇل قارجىلىق دەرەكتەر بۇعان دەيىنگى سوت وتىرىستارىندا ايتىلعان كۋاگەرلەردىڭ سوزدەرىمەن دە ۇشتاسادى. اتاپ ايتقاندا، «تسەلينسەلماش» كومپانياسىنىڭ زاڭگەرى ءدال وسى كەزەڭدە «BM Trust» جشس-ءنىڭ ەلوردادان اۋدانى 671 شارشى مەتر بولاتىن جيھاز تسەحىنا ارنالعان عيماراتتى جالعا العانىن راستاعان ەدى. ونىڭ ايتۋىنشا، بۇل تسەح شىن مانىندە سانجار بوقاەۆتىڭ وزىنە تيەسىلى بولعان.

BM Trust بانك كوشىرمەلەرىندەگى كوزگە تۇسەتىن جايتتاردىڭ ءبىرى – MLS Group كومپانياسىنا 7,6 ميلليون جانە 12,3 ميلليون تەڭگە كولەمىندە جاسالعان اۋدارىمدار. بۇل ترانزاكتسيالار الدىڭعى سوت وتىرىستارىندا ايتىلعان كۋاگەردىڭ سوزدەرىن قۇجات جۇزىندە راستادى. ەسكە سالا كەتەيىك، بۇعان دەيىن MLS Group باسشىسى سۇلتانوۆ سوتتا اۆتوشەرۋ تۋرالى قانداي دا ءبىر ۋادە ەتىلگەن دەرەكتى ءفيلمنىڭ كومپانيا تاراپىنان مۇلدە تۇسىرىلمەگەنىن مالىمدەگەن ەدى. ونىڭ ايتۋىنشا، كومپانياعا تۇسكەن ميلليونداعان تەڭگە قولما-قول اقشاعا اينالدىرىلىپ، سانجار بوقاەۆتىڭ جەكە وزىنە تابىستالعان. ەندى بۇل مالىمدەمەلەر رەسمي بانك وپەراتسيالارىنىڭ قۇجاتتارىمەن دە راستالىپ وتىر.

BM Trust كومپانياسىنان قاراجات اۋدارىلعان وزگە دە الۋشىلاردىڭ قاتارىندا «موتيۆ اكمولا» جشس مەن «ينديگو» جك بار. جاۋاپ الۋ بارىسىندا ولاردىڭ اۆتوشەرۋدى ۇيىمداستىرۋعا ەشقانداي قاتىسى جوق ەكەنى تاعى دا راستالدى.

ال جۇلدىز ارتىقباەۆا باسقارعان «We Can» جشس-نەن، ياعني كومپانيانىڭ بانك كوشىرمەلەرىنەن مۇلدە باسقا كورىنىس بايقالدى. قۇجاتتار كومپانيانىڭ ناقتى شارۋاشىلىق قىزمەتپەن اينالىسقانىن كورسەتتى. اتاپ ايتقاندا، ول اۆتوشەرۋگە قاتىسۋشىلاردىڭ قوناقۇيلەردە تۇرۋى مەن تاماقتانۋىن، پوليگرافيالىق ونىمدەرگە، كولىك قىزمەتتەرى مەن كونتسەرتتەردى ۇيىمداستىرۋعا ميلليونداعان تەڭگە اۋدارعان.

بۇل قارجىلىق قۇجاتتار بۇعان دەيىن سوتقا جەتكىزىلگەن قىزىلورداداعى Sultan Plaza جانە تۇركىستانداعى «حاناكا» قوناقۇيلەرىنىڭ باسشىلارى بەرگەن جاۋاپتارمەن تولىق سايكەس كەلدى. ولار كورسەتىلگەن قىزمەتتەردىڭ اقىسىن ءدال وسى «We Can» جشس تولەگەنىن راستاعان بولاتىن.

ەكى سەرىكتەستىكتىڭ بانك كوشىرمەلەرىن سالىستىرا وتىرىپ، مەملەكەتتىك ايىپتاۋ تاراپى تەرگەۋ نۇسقاسىنىڭ قيسىنىن بىلاي تۇيىندەدى: حالىقارالىق اۆتوشەرۋ ءىس جۇزىندە ناقتى قىزمەتتەرگە اقى تولەگەن «We Can» جشس-ءنىڭ كۇشىمەن ۇيىمداستىرىلعان. ال بوقاەۆتىڭ تۋىسىنىڭ باقىلاۋىنداعى BM Trust كومپانياسىنا (قۇجاتتاردا قالمەنوۆتىڭ دا اتى اتالادى) اۋدارىلعان قاراجات ماقساتسىز پايدالانىلىپ، قولما-قول اقشاعا اينالدىرىلعان.

قارجىلىق زاڭبۇزۋشىلىقتار اۋديت قورىتىندىسىمەن دە راستالادى. سوت وتىرىسىندا رەۆيزوردىڭ قورىتىندىسى جاريا ەتىلدى. وندا اۆتوشەرۋ اياسىندا جاسالعان ەكى كەلىسىمشارت بويىنشا كورسەتىلگەن قىزمەتتەردىڭ قۇنى 30 ميلليون تەڭگەگە ارتىق باعالانعانى انىقتالعان. بولجامعا ساي قورعاۋ تاراپى بۇل ەسەپتەۋدىڭ ادىستەمەسىمەن كەلىسپەيتىنىن مالىمدەدى.

اۆتوشەرۋگە قاتىستى ەپيزودتان بولەك، قۇجاتتاردى زەرتتەۋ بارىسىندا ايىپتالۋشىنىڭ باسقا دا اۋقىمدى جوبالارعا قاتىسى تۋرالى دەرەكتەر بەلگىلى بولدى. ماسەلەن، پروكۋرور «قازترانسگاز» كومپانياسى ءۇشىن بەس ساعاتتىق كورپوراتيۆتىك ءىس-شارا وتكىزۋگە ارنالعان قۇنى 57 ميلليون تەڭگەدەن اساتىن كەلىسىمشارتتى ماقۇلداۋعا بوقاەۆتىڭ قاتىسقانىنا نازار اۋداردى.

وسىلايشا، بوقاەۆتىڭ ءىرى قارجى اعىندارىنىڭ ءبولىنۋىن جەكە ءوزى باقىلاپ، ميلليونداعان تەڭگەلىك كەلىسىمشارتتار جاساسۋ كەزىندە جاۋاپتى تۇلعا رەتىندە ارەكەت ەتكەنى ايتىلدى.

Abai.kz

0 پىكىر