مىنا ۇلان-بايتاق ەلىمىزگە تارايتىن "31 ارنا" دەگەن ارنا كوپتەن بەرى ءبىراز جۇرتشىلىقتىڭ كوزايىمىنا اينالىپ، مەديا كەڭىستىكتەن ءوز ورنىنىن ويىپ العانىن ەشكىم دە جوققا شىعارا قويماس. اسىرەسە، ءوز باسىم وند «31»-ءدىڭ قازاق تىلىندەگى جاڭالىقتارىن قالىس قالدىرمايمىن. قىسقاسى، ۇنايدى.
      الايدا كەيىنگى كەزدەرى وسى ارنادان كۇندىز-ءتۇنى شىرقالىپ جاتقان ورىستاردىڭ   "بايۋ-بايىن" ەستي-ەستي قۇلاعىمىز سارسىدى. اڭگىمە اندە ەمەس، بار ماسەلە وسىنى كەمەلىنە كەلتىرىپ شىرقاعان انشىدە. ول كىم دەيسىزدەر عوي.   ول – قازاقتىڭ كۇمىس كومەي ءانشىسى قاراقات ءابىلدينا دەگەن قارىنداسىمىز. جوق، وسىناۋ ادەمى قارىنداسىمىز ءوزى قازاقتىڭ ءداستۇرلى ءانشىسى بولسا دا، قازاقتىڭ قاسيەتتى "بەسىك جىرىن" ايتپايدى، ورىستىڭ "بايۋ-بايىن" سىڭسىتادى. قولىندا قازاقتىڭ ءاپ-ادەمى قارادومالاق نارەستەسى بار. بالكىم، بالاسى شىعار. ال، ەندى وزگەسى-وزگە ونىڭ ءوزىمىزدىڭ اتا-بابادان ميراس بولىپ قالعان "بەسىك جىرىن" اۋەلەتۋدىڭ ورنىنا ورىستىڭ "بايۋ-بايىن" شىرقاعانى نەسى؟ جارناماداعى تيىن-تەبەنگە قىزىقتى ما؟ ولاي دەيىن دەسەڭ، بۇل وتباسى قارجىدان تارلىق كورىپ وتىرماعان سىڭايلى.   جارنامانىڭ دا ورنى بار ەمەس پە؟
      ماسەلەن، انا روزا  رىمباەۆانىڭ يتالياننىڭ ءساندى كيىمدەرىن جارنامالاعانى جاراسىپ تۇر. نەمەسە نۇرجۇمان ىقتىمباەۆتىڭ فرانتسۋزدىڭ اتاقتى ءارتيسى جەرار دەپاردەمەن قۇشاقتاسىپ تۇرىپ، بانكىگە اقشا سالۋعا شاقىرىۋىن ءدا جونسىز دەي المايمىز. ال قاراقاتتىڭ مىناۋسىن تۇسىنە المادىق. جاڭادان شىعىپ كەلە جاتقان جاس ءانشى بولسا، ءبىر ءسارى. نەمەس ءورىستىلدى ءانشى بولسا دا ءبىر قيسىنى بار شىعار دەر ەدىك. قازاقتىڭ اسىل تاربيەسىن بويىنا ءسىڭىرىپ وسكەن، قازىر بارشا جۇرتتىڭ كوزايىمىنا اينالعان، ال ەڭ باستىسى تاماشا ءداستۇرلى ءان ونەرمىزدىڭ مايتالمانىنىڭ قازاققا ون قايناسا سورپاسى قوسىلمايتىن، قايداعى ءبىر "بايۋ-بايدى" سىڭىسىتقانى نەسى؟ الدە ءبىزدى ەندى قازاقتىڭ ەسكىرگەن "بەسىك جىرىن" قويىپ، "وزات" ورىستىڭ "بايۋ-بايىنا" كوشىڭدەر دەپ ۇندەپ تۇر ما؟ تۇسىنبەدىك.      مۇمكىن، بۇل جۇمباقتىڭ سىرىن وسى جارناماداعى كەلەسى ءبىر كادردا بالالارىن قاسىنا الىپ، قاراقاتپەن بىرگە سەرۋەندەپ جۇرگەن تاعى ءبىر اتاقتى ءانشى عانا ەمەس، مىقتى پروديۋسەرىمىز  قىدىرالى بولمان ايتىپ بەرەتىن شىعار؟
       بىزدەن ءبىر عانا تىلەك. قاراقات قاراعىم، ءوز اسىلىمىز تۇرعاندا، وزگەنىڭ جاسىعىنا قىزىعىپ قايتەسىڭ؟ بۇلاي ەتسەڭ قادىرىڭدى كەتىرىپ الاسىڭ عوي. وسىنى ەسكەر، قارىنداسىم.
                                                                                                                                                                    مۇراتبەك داۋرەنۇلى

Abai.kz