بۇگىن قىرعىز رەسپۋبليكاسى  مەن قازاقستاننىڭ سىرتقى ىستەر مينيسترلىگى ۋكرايناداعى جاعدايعا الاڭداۋشىلىق ءبىلدىرىپ، رەسمي مالىمدەمە تاراتتى. ازاتتىق راديوسى جازعانىنداي، قازاقستان ۋكراينا ىشىندەگى   بارلىق قارسىلاسۋشى جاقتاردى زورلىق-زومبىلىقتان جانە جاعدايدى شيەلەنىستىرۋدەن باس تارتۋعا شاقىرسا، رەسمي بىشكەك كيەۆتى حالىقارالىق ادام قۇقىعى نورمالارىن ساقتاۋعا ۇندەگەن.  ايتا كەتەتىن بولساق ، ەلدەگى ۋشىققان سەپەراتيستىك ارەكەتتەرگە بايلانىستى 2-مامىردا  ۋكراينا ۇكىمەتىنىڭ كۇش قۇرىلىمدارى انتيتەرروريستىك وپەراتسيالار اۋقىمىن كەڭەيتتى. رەسەيشىل سەپاراتيستەر باقىلاۋىنداعى سلاۆيانسك قالاسىنا شابۋىل باستادى. سول كۇنى كەشكە ودەسسادا ۋكراينانىڭ بىرتۇتاستىعىن قولداۋشىلار مەن رەسەيشىل بەلسەندىلەر اراسىنداعى قاقتىعىستار سالدارىنان قىرىققا جۋىق ادام قازا تاۋىپ، جۇزدەگەن ادام جاراقات الدى.  وسىعان وراي ورتا ازيا ەلدەرى ۋكراينانى 17 ساۋىردە جاسالعان «جەنەۆا» كەلىسىمى بويىنشا ەلدەگى ساياسي تۇراقتىلىق پەن قوعامدىق حاۋىپسىزدىكتى ساقتاۋعا شاقىرىپ وتىر.

اباي-اقپارات