قايران ءامىرحاندى باسى - قاسىندا جۇرگەندەر ء تىرى كەزىندە قادىرلەي المادى. ولگەن سوڭ، ارينە، ۇلارداي شۋىلدادىق. اناۋ بۇرڭعى  جۇمىستان شىعارىپ جىبەرگەن "دوستارىنىڭ" كوكىرەكتەرى جاستان ءشىرىپ كەتە جازدادى. ءاي، كىرىپتار كۇندەستىك -اي! ءاي، كىرىپتار پەندەشىلىك -اي دەسەڭىزشى! مەن كەيدە وسى ادامدار ءۇشىن ۇيالامىن. وسى ادامدار ءۇشىن وكىنەمىن،  وسى ادامداردىڭ اتىنان ءامىرحاننان كەشىرىم سۇرايمىن! شىنىن ايتقاندا، مەن ءامىرحاندى كورگەن ەمەسپىن، بىراق شىعارمالارىنان شىڭىراۋدى كورگەم.

التى الاشتىڭ ازعانداي ۇرپاقتارى ءوز ىشىمىزدەگى الىپتاردى تانيمىز. بىراق، قادىرلەي المايمىز.

مۇمكىن، از حالىقتىڭ ىشىندەگى تاۋ تۇلعانى كۇندە كورىپ جۇرگەن سوڭ بيىكتىگىنە شەك كەلتىرەتىن شىعارمىز.

مۇمكىن، قامشىنىڭ سابىنداي قىسقا عۇمىردىڭ جالعاندىعىن بىلە تۇرىپ، تاكاپپارلىعىمىز ۇستاپ قالا ما؟   ازعانتاي قازاقتىڭ ساناۋلى تۇلعالارىن نەگە قۇرمەتتەي الماي ءجۇرمىز، اعايىن؟  ال ولگەن سوڭ نەسىنە بوزداپ جىلايمىز؟

«زامان سولاي»، «پەندەشىلىك»، «رۋشىلدىق»، «تەكسىزدىك»، «نامىسسىزدىق»، «دىنسىزدىك»، «قۇلدىق» اتتى سانسىزداعان سىلتاۋ مەن سەبەپتى كولدەنەڭ تارتىپ، ءوزىڭدى-ءوزىڭ الداماقسىڭ با؟ بارلىق كۇناڭدى بىرەۋگە جاپپاقسىڭ با؟ «70 جىل وتارلادى» دەپ ورىسقا جالا ارتپاقسىڭ با؟  بۇل اقىلدىلىق ەمەس. بۇل ءارى اقماقتىق، ءارى ساتقىندىق عوي!  «باقىت، قايدا باراسىڭ؟ – دەگەندە، - بەرەكەگە» - دەپتى. سوندا ءبىز بەرەكەگە قاي بەتىمىزبەن جەتەمىز؟ ارزان اقىل، بوس ۋادە، ەكى ءجۇزدى – قۇرعاق ىسىمىزبەن بە؟ 

اتام قازاقتا: «اكەڭ ولسە دە اكەڭدى كورە قالعان ولمەسىن» - دەگەن اتالى ءسوز بار. قانداي دانىشپاندىق تاربيە. اكەڭدى كورگەن ادامداردى دا قادىرلە دەپ تۇرعان جوق پا!؟  ەندەشە، ءامىرحاندى كورە قالعاندار ارامىزدا تولىپ ءجۇر. سولاردى دا قادىرلەپ، سيلايتىن كەز جەتتى.

مەن سول ءۇشىن ءامىرحان اعامنان جىلاپ تۇرىپ كەشىرىم سۇرايمىن. ۇيات پەن ار-نامىستى، وبال مەن ساۋاپتى جوعالتپاۋعا ارۋاق الدىندا سەرت بەرەمىن. ءارى سىزدەردەن دە سونى كۇتەمىن. سول كەزدە ءبىزدى دە التى الاشتىڭ قابانباي، بوگەنباي، ەر جانىبەك سىندى باتىرلارى، تولە، ايتەكە، قازىبەك سىندى بيلەرى، اباي، ءاليحان، وسپان، زۋحا سىندى ارداقتىلارىنىڭ ارۋاعى قولدايدى. قاتەلىكتەرىمىزدى كەشىرەدى. سوندا عانا  اللا جولىمىزدى وڭعارادى.

تاعى دا قايتالاپ ايتايىن، ءالى دە كەش ەمەس. ءبىر مىقتى قازاقتى تىرىسىندە قادىرلەي الۋعا جاراساڭ، ءامىرحان دا سىزدەردى كەشىرەدى. مەنىڭ بىلەتىنىم سول. اللا تاعالا سولاي ۋادە بەرگەن.

مارقۇمنىڭ يمانى جولداس بولسىن!

Abai.kz