قاي ەلدىڭ ءباسپاسوزى مىقتى بولسا، سول ەلدىڭ ءوزى دە مىقتى.

مىرجاقىپ

بۇل ناقىلدى دالەلدەۋدىڭ كەرەگى شامالى، ودان ءارى وربىتۋگە بولار. ءباسپاسوز - ۇلتتىڭ ساياسي الەۋەتى مەن دەڭگەيىن كورسەتەتىن ينديكاتور. قازاق ءباسپاسوزىنىڭ عۇمىربايانى «تۇركىستان  ۋالاياتىنىڭ  گازەتىنەن” (1870-1882) (“ دالا  ۋالاياتىنىڭ  گازەتى ” (1888-1902) ، “ سەركە ” (1907) ، “ بىرلىك  تۋى ” (1917) ، “ قازاق  گازەتى ” (1907), “دالا” (جىلى  بەلگىسىز ) ، “ قازاقستان ” (1911-1913) ، “ەشىم  دالاسى ” (1913) ، “ قازاق ” (1913-1918) ، “ ايقاپ ” (1911-1915) ، “ الاش ” (1916-1917) ، “ سارىارقا ” (1917) ، “ ۇران ” (1917), “ ءۇش  ءجۇز ” (1917) ، “ تىرشىلىك ” (1917) ) باستاستالسا دا، ۇلتتىڭ ساياسي تالپىنىسى مەن تالابى 1907 جىلدىڭ  كوكتەمىندە جارىق كورە باستاعان “قازاق” مەن “سەركە” اتتى بەيرەسمي ءسوزجاريالاردان كورىنىس تاپتى. وسى ناسيقات كوزدەرى ۇلتتىڭ ەتەك-جەڭىن جىيۋعا، ەسىن كىرگىزۋگە، ساناسىن مارقايتۋعا سەپتىك ەتىپ، «قىرعىز» اتتى جاناما اتاۋدان تاريحي بولمىسى مەن تاعدىرى جازىلعان «قازاق» اتى قايتارىلدى. وسىلار «الاش» ۇرانى جالپىقازاقتىق ساياسي قۇرىلىم رەتىندە مەملەكەتتىك العىشارت بولىپ ءتۇزىلۋىنىڭ باسى بولدى.

بۇگىن 5-كە تولىپ وتىرعان «Abai.kz» تە - ۇلت تاريحىنداعى كەزەكتى بەلەستىڭ كورىنىسى، بۇگىنگى قازاقى ساياسي سانانىڭ ينديكاتورى. «Abai.kz» پورتالىنىڭ ومىرگە كەلۋىمەن بىرگە قازاقتىلدى ورتا ۆيرتۋال كەڭىستەن ءوز داۋىسىن تانىپ، ءوز ءۇنىن ەركىن بىلدىرەتىن سايمانعا يە بولدى. قازاق وقىرمانىنىڭ داۋىرگە لايىق جاڭا لەگى قالىپتاستى. ۋاقىت تالابىنان قالعىسى كەلمەيتىن قازاقتىڭ مىنەزىنە ساي يكەمدى دە قولايلى مول مۇمكىندىك باستالدى. وسى پورتالمەن بىرگە ۇلتتىڭ جوق-جىتىگىن ەشكىمدى الالاماستان الاشتىڭ وزىنە جوقتاتۋ ارەكەتى جاڭا عاسىردا جۇزەگە اسۋدا. قازاقتىڭ جاڭا كوزقاراسى مەن جاباعىداي ۇيىسقان قاساڭ پايىمى ءجۇز شايىسسا دا، الاشتىڭ پايداسىنا قىزمەت ەتۋگە ماجبۇرلەنۋدە.

سايت وقىرمانى ەسەيدى. ەسىرىك تە جاۋاپسىز، دولى ۇندەر تىيىلدى. قازاقتىڭ ويلى سوزدەرى مەن ارلى ءۇنى ەشكىمنىڭ تۇزەتۋىنسىز، اقىلىنسىز،بىرجاقتى ەمەس، ەكى تاراپپەن شەكتەلمەيتىن،الۋان كوزقاراسقا تولى تالاي پىكىر، اركىمنىڭ ىشكى تسەنزورىنا باعىنعان ماتەريالدار ەركىن تارالاتىنداي ۇلگى كورسەتىلىپ كەلەدى.

بار قازاق ءار قازاقتىڭ مۇڭىمەن مۇڭداس، ۇنىمەن ۇندەس بولاتىنداي، ادۋىن ءار قادامعا ابايلاپ قاراپ، انىق باسۋعا تۇرتكى بولار بۇل جاريا قۇرالدىڭ اتى - «Abai.kz»!

ينشاللا، حح عاسىردا الاشتىڭ ءوز اتى مەن مەملەكەتىنىڭ ورالۋى  «قازاق» پەن «سەركە» گازەتتەرىنەن باستالعان. «Abai.kz»  ءۇشىن قازاق تاۋەلسىزدىگى اباي دىتتەگەندەي ءار قازاقتىڭ ساپالى بولمىسى ماقسات بولۋمەن بىرگە جەتەتىن ناتيجەگە اينالعاي!

ءتاڭىر جارىلقاپ، قازاقتىڭ ماڭگى ەل بولۋ ۇدەرىسى «Abai.kz»  سايتىنان كورىنىس تابا بەرگەي!

سايت اۆتورى ءارى وقىرمانى – سەرىك ەرعالي