سارسەنبى, 29 قىركۇيەك 2021
ءبىزدىڭ شەنەۋنىك 4895 0 پىكىر 25 تامىز, 2014 ساعات 10:56

باتتالوۆ ۋاقىتشا اكىم بە؟

الماتى وبلىسىن اشسا الاقانىندا، جۇمسا جۇدىرىعىندا ۇستاعان اڭسار مۇساحانوۆ دەيتىن ازامات اتتان ءتۇستى. اۋەل باستا ونى وسى قىزمەتكە تاعايىنداعاندا كىم نە ويلادى ەكەن، ايتەۋىر پرەزيدەنت  ەكس-اكىمنىڭ وبلىستا ومالىپ وتىرعانى بولماسا، تۇك بىتىرمەگەنىن بەتىنە باستى. تۇك بىتىرمەيتىن ادامدى تۇرىنەن تانۋ وسى زاماندا قيىنداپ بارا ما قالاي، باسىندا جەر-كوككە سيعىزباي ماقتاپ اكەلىپ ورىنتاققا وتىرعىزادى دا سوڭىنان جەر-جەبىرىنە، جەكەن سۋىنا جەتكىزىپ جەلكەلەپ قىزمەتىنەن الىپ تاستايدى. بيلىكتى ايتامىز. مۇساحانوۆتى دا ءسويتتى. الايدا،  اڭسار تۇرسىنحانۇلىن الماتى وبلىسىندا قارەكەتسىز قاراپ وتىردى دەپ بىرجاقتى ايىپتاۋعا بولمايدى. ول الماتى وبلىسىنىڭ  جايلاۋى مەن قىستاۋىن مالعا تولتىردى. ءوزىنىڭ مالىنا. الماتى وبلىسىنداعى لاۋازىمدى قىزمەت ورىندارىن جاڭا كادرلارمەن تولىقتىردى. ءوزىنىڭ كادرلارىنا. ءبارى دە ۇزىناعاشتان شىققان قاسقالار مەن جايساڭدار، انشەيىن.  ەلباسىنىڭ تاپسىرماسى دەگەندى وسى دەڭگەيدە ءتۇسىنىپ، قارقىندى قيمىلداعان جىگىتىمىز، بىراق، جارتى جولدان قايتتى. ءسويتىپ ونىڭ ورنىنا ۇزاق جىلداردان بەرى وبلىستاعى ورىنباسارلىقتى مەنشىكتەپ قالعان اماندىق باتتالوۆ وتىردى.  ايتسە دە، باتتالوۆتى جەتىسۋلىقتار «ۋاقىتشا اكىم» دەسىپ ءجۇر. ويتكەنى باتتالوۆتىڭ بيوگرافياسى كەلگەنىمەن گەوگرافياسى الماتى وبلىسىن باسقارۋعا «جارامايتىن» كورىنەدى. قاراقالپاقتىڭ تۋماسى. ونىڭ ۇستىنە ءبىرىنشى باسشىلىقتا كوپ بولماعان. قاراڭىز: باتتالوۆ الماتى قالاسى كالينين اۋدانى اكىمشىلىگى باسشىسىنىڭ ورىنباسارى، ءبىرىنشى ورىنباسارى، باسشىسى (1992-1994); لەنين اۋداندىق اكىمشىلىگىنىڭ باسشىسى (1994-1995); الماتى قالاسى جەتىسۋ اۋدانىنىڭ اكىمى (1995-2001); الماتى وبلىسى اكىمىنىڭ ورىنباسارى (06.2001-04.2008); 2008 جىلدان بەرى الماتى وبلىسى اكىمىنىڭ ءبىرىنشى ورىنباسارى.

تەگىندە، ورىنباسارلىق قىزمەتتە ءجۇرىپ قالعان ادامدا ورىنداۋشىلىق  مىنەز قالىپتاسىپ كەتەدى. سوندىقتان تۇلعا دەپ تانىرلىقتاي ءبىر ازامات ماڭدايىنا بۇيىرماي تۇرعان الماتى وبلىسىنىڭ تۇتقاسىن باتتالوۆتىڭ باتىلى جەتىپ ۇزاق ۇستاۋى بەيمۇمكىن دەسەدى ەل ءىشى. باتتالوۆتىڭ ۋاقىتشا اكىم قىزمەتىن اتقارۋىنا بولجالدى تاعى ءبىر سەبەپ: بۇل ورىنعا «سكورو» داريعا نازارباەۆا  كەلىپ جايعاسپاق-مىس.  باتتالوۆ داريعا نازارباەۆا حانىمنىڭ ءساتتى ساعاتى تۋعانشا، وبلىستى باسقارادى دا سودان كەيىن «دەنساۋلىعىنا بايلانىستى» نەمەسە باسقادا ءبىر ءمىنايى سىلتاۋلارمەن اكىمدىكتى  داريعا نۇرسۇلتانقىزىنا  بەرىپ قۇتىلماق-ءمىس. بۇل داريعانىڭ قابىلەتىن باعالاپ ءوسىرۋ مە، الدە پارلامەنتتەن كەتىرىپ، استانادان كوشىرۋ مە، ازىرگە ناقتى بىردەڭە ايتۋ قيىن. بۇنىڭ ءتىپتى ەل اۋزىنداعى «ەرتەگى» بولۋى دا ىقتيمال. دەگەنمەن، جەل سوقپاسا، ء شوپتىڭ باسى نەگە قيمىلداسىن؟..

Abai.kz    

0 پىكىر