كۇزگى جيىن-تەرىن باستالىسىمەن جانار-جاعارمايدىڭ باعاسى تاعى دا كوتەرىلدى. قازاقستاندا مۇناي ونىمدەرىن وڭدەيتىن ءۇش زاۋىت بار (اتىراۋدا، شىمكەنتتە، پاۆلوداردا). مامانداردىڭ سوزىنە سەنسەك، وسى ءۇش زاۋىت ىشكى سۇرانىستى تولىعىمەن وتەي المايتىن كورىنەدى. ءسويتىپ، ءبىز جانارمايدى سولتۇستىكتەگى كورشىمىز رەسەيدەن تاسۋعا ءماجبۇر ەكەنبىز. ال، رەسەيدەن كەلەتىن بەنزين، مىسالى جوعارى سۇرانىستاعى اي-92-ءنىڭ ءبىر ءليترى 125 تەڭگە بولادى. وعان تاسىمالداۋ مەن ساقتاۋدىڭ شىعىنىن قوسقاندا، 150 تەڭگەگە بارىپ قالاتىنعا ۇقسايدى. ديزەلدى وتىننىڭ دا قۇنى وسىلايشا 102 تەڭگەدەن 115 تەڭگەگە كوتەرىلگەن. ماماندار رەسەيدىڭ مۇناي وڭدەۋ زاۋىتتارىنا دەگەن ءماجبۇرلى سۇرانىستان قۇتىلماي جانارمايدىڭ باعاسى بىزدە تۇراقتامايدى، ۇنەمى وسىلاي وسەدى دە تۇرادى دەيدى.

الەمدە قازىر مۇنايمەن بىرگە كوگىلدىر وتىنعا (تابيعي گازعا) دەگەن سۇرانىس تا وتە جوعارى. ەۋروپانى كوگىلدىر وتىننىڭ قۇبىرىنا قاراتىپ قويىپ وينايتىن رەسەي، ماسەلەنكي، قولىنداعى بار مۇمكىندىگىن ساياسي قارۋعا دا اينالدىرىپ العان. الايدا، سول رەسەي قازاقستاننان كوگىلدىر وتىندى ارزانعا الىپ، قىمباتقا ساتۋدا. قاراڭىز: 2014 جىلدىڭ قاڭتار-ماۋسىم ايلارىندا 109,9 ملن دوللارعا قازاقستان رەسەيگە 4,2 ملرد.كۋب. م گاز ەكسپورتتاعان. بۇل بىلتىرعى جىلدىڭ وسى كەزەڭىمەن سالىستىرعاندا  3,8%  ارتىق.  الايدا وتكەن جىلدىڭ قاڭتار-ماۋسىم ايىنداعى  پايدامەن ەسەپتەگەندە كوگىلدىر وتىندى رەسەيگە ەكسپورتتاۋدان قازاقستان جاعى 2,7%  تومەن تابىس تاپقان. كازتاگ-تىڭ جازۋىنا قاراعاندا، ءوز كەزەگىندە رەسەيدەن گاز يمورتتايتىن قازاقستان ۇتىلىپ قالىپ جاتقانعا ۇقسايدى. «قازاقستاننىڭ 1 مىڭ كۋب.م  گازى رف-عا 25,4 دوللارعا ساتىلۋدا. ال، رەسەيدىڭ 1 مىڭ كۋب. م گازى قازاقستانعا 54,2 دوللار بولىپ كەلۋدە» دەپ جازادى كازتاگ ءتىلشىسى مامانداردىڭ پىكىرىنە سۇيەنە وتىرىپ.

Abai.kz