... Cىرتتان 1 ملن-عا تارتا قانداسىمىز ەل ىرگەسىنە جەتكەنىمەن دە مىنە، ەكى جىلداي بولدى ۇلى كوش توقتاپ تۇر. تاياۋدا عانا ەلباسىمىز: «اتاجۇرتىنا كەلەم دەگەن قازاققا بارلىق جاعدايدى جاساڭدار!» دەپ، قايتا قامشى سالىپ، ۇكىمەت مۇشەلەرى – مينيسترلەرگە تاپسىرما بەردى. ءيىسى قازاق ءسۇيسىنىپ، ءوزارا سۇيىنشىلەستى. 
دەسە دە، قۋانىشىمىز ۇزاققا بارمادى. ويتكەنى، ۆيزا بەرۋدەن باستالاتىن كوشتىڭ باسى تاسقا تيگەن جايى بار. قازاقستاننىڭ ۇرىمجىدەگى ۆيزا بەرۋ قىزمەتىندەگى استامشىلىق پەن بىلىق-شىلىق قانداستارىمىزدىڭ جۇيكەسىن توزدىرىپ، تابانىن تەسكەنى بىلاي تۇرسىن، ەندىگى جەردە ۇلتتىق نامىسىنا تيە باستادى.

الدىمەن، وسىدان ءۇش جىل بۇرىن ۇرىمجىدەگى ۆيزا بەرۋ قىزمەتىنە ءتارتىپ ورناتىپ، تۋرا جولعا سالعان قايىرجان سارسەباەۆ دەگەن قازاق ازاماتىنىڭ «قازاق كوشىنە» داڭعىل جول اشقانى الدەكىمدەرگە ۇناماي، شۇعىل لاۋازىمىنان ايىرىلدى. ءۇش ايماقتى مەكەندەگەن قازاقتاردىڭ شالعايداعى ءۇرىمجى قالاسىنا قاتىناۋى قيامەت بولعاندىقتان، بۇل شارالاردىڭ ءتارتىبى مەيلىنشە ىقشامدالۋى كەرەك ەدى، ولاي بولمادى. ەندى ەلشىلىك تە قاڭىرىپ تۇرعان جوق، قاتىنايتىن ەلدىڭ قاراسى قالىڭ. بۇلار كىمدەر؟...

سويتسەك، قازاق توپىراعىنا تابان باسقانداردىڭ دەنى ۇيعىر ۇلتىنىڭ وكىلدەرى ەكەن. بۇل تۋرالى قازاقستانداعى ەڭ تانىمال قازاقتىلدى ەلەكتروندىق اقپارات كوزى «ABAI.kz» پورتالى بىلاي دەپ دابىل كوتەردى: «سوندا، ەلباسى كىمدى شاقىردى؟ قازاقستانعا كەلىپ جاتقاندار كىمدەر؟ قازاقتار نە ءۇشىن اتاجۇرتىنا جەتە الماي زار ەڭىرەپ ءجۇر؟ بۇل سۇراقتاردىڭ جاۋابىن، ەڭ الدىمەن، سول ۇرىمجىدەگى ۆيزالىق قىزمەتتە وتىرعان مىرزالاردان سۇراعانىمىز ءجون شىعار... ءتىپتى، سوڭعى كەزدەرى ۇلتىن «قازاق» دەپ وزگەرتىپ، ەش قيىندىقسىز قازاقستانعا كەلىپ جاتقان «ۇيعىرلار» تۋرالى دا اقپاراتتار جەلدەي ەسۋدە...»

«اباي. كز» پورتالىنىڭ جانايقايى قازاق قوعامىن ءدۇر سىلكىندىردى. بۇل ءدۇمپۋدى ەلدەن شەت (cول ۇرىمجىدە ۇلىمدى ەمدەتىپ) جۇرگەن مەنىڭ ءوزىم ەرەكشە سەزىندىم.

ءيا، زاماننىڭ بەتى سۋىق: اۋمالى-توكپەلى، بۇگىنگى تامىرىڭنىڭ – ەرتەڭگى دۇشپانىڭا اينالۋى لەزدە. ەتەك-جەڭدى جيناپ، ەلدىڭ ىرگەسىن قىمتاۋىمىز كەرەك. شەتەل قازاقتارىنىڭ، اسىرەسە، قىتايلىق قانداستارىمىزدىڭ اتاقونىسىنا جەتۋىن ءارى جەڭىلدەتىپ، ءارى جەدەلدەتۋگە ءتيىسپىز. ەلباسى الباتى ايتپايدى، وسىنى تەرەڭىرەك زەردەلەيىك...

كوشى-قون ءبىر شەنەۋنىكتىڭ ەمەس، بار شەنەۋنىكتىڭ بەل شەشىپ كىرىسەتىن شارۋاسى. كوشكە كەدەرگى جاساعاندار جازالانۋى ءتيىس. بىراق، ەڭ باستىسى، قازاق پەن ۇيعىرداي تۋىسقان دا دىندەس ۇلتتاردىڭ اراسىنا سىنا قاقپاۋىمىز كەرەك. كەرەك دەسەڭىز، شاريعات ۋاعىزىنا ۇيىساق، مۇسىلماننىڭ دۇشپانى – جىن-سايتان – ادام قانىنىڭ ىشىندە دە ءومىر سۇرە الاتىن كورىنەدى...

سوندىقتان، بيلىك باسىنداعى بىلىق پا، الدە، قاننىڭ ىشىندەگى قاۋىپ پە – وسىنىڭ اق-قاراسىن اجىراتىپ الايىق!

قاجىمۇقان عابدوللا

Abai.kz