جۇما, 29 ناۋرىز 2024
اتتەڭ... 5085 0 پىكىر 8 شىلدە, 2014 ساعات 09:57

قۇلاندىنىڭ استانادان نەسى كەم؟

   

كۇلمەڭدەر! شىن ايتام، نەسى كەم؟ ارينە قۇلاندى - اۋىل، استانا - استانا دەيتىندەرىڭ بەلگىلى. مەن ونى ايتىپ وتىرعانىم جوق! استانادا تۇراتىن ادامدار، قۇلاندىدا دا تۇراتىن ادامدار. كادىمگى قازاقستاننىڭ ازاماتتارى. ارقايسىسى ءوز تىرلىگى ءۇشىن جانە «ەل ەكونوميكاسىنىڭ ورلەۋى» ءۇشىن تىنىمسىز تىپىرلاپ جاتىر. ەشكىمگە وكپەلەمەيدى، وكپەلەگەندە بىرەۋدىڭ بىردەڭەسى قيسايمايتىنىن جاقسى تۇسىنەدى، سول ءۇشىن اندا-ساندا كۇڭكىلدەپ قويعانى بولماسا... باسى ارتىق اڭگىمەگە ۋاقىت تا جوق. سوندا دا بولسا مىنا ءۇش كۇندىك دەمالىستا مەرەكەنىڭ ءبىر لەبى سەزىلسەشى، ەڭ بولماسا! بارلىق كوڭىلدى-كوڭىلسىز شارالار استانادا، وبلىس ورتالىعىندا، قالالاردا ءوتىپ جاتىر. ءبىز وتىرمىز، تەلەديدارعا تەلمىرىپ. بىزگە بايتەرەك، حانشاتىر، «زاجيگالكا»، «موركوپ» سالىپ بەرمەي-اق قويسىن، جىلدا ءبىر كەلەتىن تۋعان كۇندە كەشكى سالقىنمەن دەمالىپ قالاتىن كونتسەرت پە، تاعى نەمەنە، سونداي ءبىر شارا وتكىزە سالسا بولماي ما؟ ءبىز ورىسشانى از بىلەتىنىمىز بولماسا، ءوزىمىزدى استانالىقتاردان كەم سانامايمىز. قۇقىمىز بىردەي دەپ ويلايمىز. الدە ولاي ەمەس پە؟ ءبىز تومەن سورتتى ادامدارمىز با؟ نەگە استانادا ەيكون دەگەن قارا بالا ءان سالادى دا، قۇلاندىدا «قاپ-قاراشكا» ءان ايتپايدى؟ نەمەسە قۇلاندىدا 16-عا تولعان بالا جوق پا؟ استانانىڭ قۇرداستارى!؟ (وسى جەردە ويعا ورالادى، نەگە استاناعا 16 جىل؟ ول اقمولا قالاسىنىڭ ۇستىنە سالىنىپ جاتقان جوق پا؟ 1998 جىلى «اقمولا قالاسىنىڭ اتى استانا دەپ وزگەرتىلسىن» دەگەن قاۋلى شىقتى عوي، «استانا قالاسى سالىنسىن» دەگەندى ەستىگەن جوقپىن). ارقايسىسىنا جەكە سىي جاسا دەپ وتىرعان جوقپىن، وعان قازاقستاننىڭ قۇدىرەتى جەتەدى، تەك «اتىن اتاپ يتىنە سۇيەك سال» دەمەكشى، بالالاردىڭ كوڭىلى ءۇشىن كوڭىلدى كەش وتكىزە سالسا جەتىپ جاتىر.

    تۋعان كۇن، مەرەكە، ارينە، جاقسى. "استانا - بارشا قازاقتىڭ ماقتانىشى، بارشاعا ورتاق قالا" دەپ جار سالامىز، بىراق سول قالانىڭ تويىندا جابىقتان دا سىعالاي الماي قالىپ وتىرعانىمىز كوڭىلىمىزدى بۇزادى. تەك بارلار مەن «يگى جاقسىلاردىڭ» مەرەكەسى سياقتى سەزىلەدى. سودان سوڭ، ىشتەي استانانى جەك كورە باستاعانىڭدى سەزبەي قالاسىڭ. ولاي دەسەڭ «كۇنشىلسىڭ» دەپ كىنالايدى، ماقتانايىن دەسەڭ... «قارنىمنىڭ اشقانىنا ەمەس، قادىرىمنىڭ قاشقانىنا جىلايمىن» دەگەن ەكەن ءبىر جەتىم.

    تەگىس جول، ادەمى عيمارات، جاسىل باۋ-باقشا ەشكىمگە، اۋىلعا دا، قالاعا دا ارتىقتىق ەتپەيدى. «وستىك، وركەندەدىك، بىرەۋلەردى قۋىپ جەتتىك، ەندى وزامىز» دەپ ورەكپىپ، اڭگىمە ايتقاندا قۇداي عۇرلىمىز، قۇلاندى سياقتى اۋىلداردى كورگەندە، «ولار وزىپ بارىپ ورنىعىپ، جاعدايلارىن تۇزەگەن سوڭ، كەلىپ، ءبىزدى كوشىرىپ الىپ كەتەتىن شىعار» دەپ ويلايسىڭدا، كۇنىڭە شۇكىرلىك ەتىپ وتىرا بەرەسىڭ. باس امان بولسىن! "وۋ، استانالىقتار! ءبىز دە ەلمىز، ءبىزدىڭ دە جاقسى ءومىر سۇرگىمىز كەلەدى، بىزگە دە كوز سالىپ قويىڭدار" دەگىمىز كەلگەن جانايقاي عوي بۇل.

مەڭدىباي ىزتۇرعانۇلى

 ماڭعىستاۋ،

 قۇلاندى اۋىلى        

Abai.kz

0 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1581
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2281
عيبىرات

قايسار رۋحتى عازيز جان

مۇحتار قۇل-مۇحاممەد 3610