سەنبى, 27 اقپان 2021
جاڭالىقتار 2977 0 پىكىر 3 شىلدە, 2014 ساعات 10:05

"انتيگەپتيل" بەلسەندىلەرى پۋتينگە حات جولدادى

بىلتىر بايقوڭىردا بولعان اپاتتىڭ ءبىر جىلدىعىنا بايلانىستى «انتيگەپتيل» قوزعالىسىنىڭ بەلسەندىلەرى قارسىلىق اكتسياسىن وتكىزدى دەپ حابارلايدى «كتك» تەلەارناسى. كەشە پروتون زىمىراندارىنىڭ ۇشىرىلىۋىن دوعارۋدى تالاپ ەتىپ جۇرگەن تابيعات جاناشىرلارى رەسەي پرەزيدەنتىنىڭ اتىنا ۇندەۋ حات جولداپ قانا قويماي، وتكەن ايدا مارقۇم بولعان «روسكوسموستىڭ» ەكس-باسشىسىنىڭ رۋحىنا قۇران باعىشتادى.

ۆلاديمير پوپوۆكين 18-ءشى ماۋسىمدا ۇزاق اۋىرىپ قايتقان بولاتىن. «روسكوسموس» باسشىسى بىلتىر بايقوڭىردا پروتون زىمىرانى قۇلاعاندا گەپتيلگە ۋلاندى دەگەن اقپارات تاراعان. «انتيگەپتيل» بەلسەندىلەرى سول پوپوۆكين سياقتى ۋلى وتىنىنىڭ كەسىرىنەن قىزىلوردا وبلىسىندا دا تالاي ازاماتتىڭ كوز جۇمعانىن ايتىپ وتىر. سوندىقتان پروتون زىمىراندارىنىڭ ۇشىرىلىمىن دوعارۋدى كەزەكتى رەت تالاپ ەتۋدە. دەگەنمەن تابيعات جاناشىرلارىنىڭ قارسىلىعىنا قاراپ جاتقان ەشكىم جوق. بۇگىن دە قولدارىنا 7 بەتتىك قاعاز ۇستاعان «انتيگەپتيلشىلەرگە» رەسەي ەلشىلىگىنىڭ قاتارداعى قىزمەتكەرى عانا شىعىپ، پۋتينگە جازعان حاتىن الىپ قالدى. ايتسە دە بەلسەندىلەر ءىستى اياعىنا جەتكىزبەي تىنباق ەمەس.

-ءبىز بارىنە دايىنبىز. ويتكەنى بىزگە ءوزىمىزدىڭ بوستاندىعىزىم ەمەس، قازاقستاننىڭ بولاشاعى ماڭىزدى. سونى ءبىز ورىنداتامىز. سونى ءبىز جاسايمىز. ءبىزدى ەشكىم توقتاتا المايدى، - دەيدى «انتيگەپتيل» قوزعالىسىنىڭ بەلسەندىسى ۇلان ءشامشيت.

اباي-اقپارات

 

0 پىكىر