اعىمداعى جىلى قازاقستاندا 15-17 ملن. توننا استىق جينالادى دەپ حابارلايدى "قازاقپارات". بۇل تۋرالى بۇگىن ۇكىمەت وتىرىسىنان كەيىن ورتالىق كوممۋنيكاتسيالار قىزمەتىندەگى بريفينگتە قر اۋىل شارۋاشىلىعى ءمينيسترى اسىلجان مامىتبەكوۆ ءمالىم ەتكەن.

بۇگىندە جاۋىپ جاتقان جانە بولجام بويىنشا تاياۋ كۇندەرى جاۋاتىن جاڭبىر استىق شىعىمدىلىعى ءۇشىن وتە قاجەت. وسى ورايدا  بيىل جىلدىق ورتاشا نەمەسە ودان جوعارى دەڭگەيدە استىق جيناۋ جوسپارلانىپ وتىر، - دەيدى مينيستر مامىتبەكوۆ.

قر اشم ءباسپاسوز قىزمەتىنىڭ مالىمەتىنشە، اعىمداعى جىلى شامامەن 15-17 ملن. توننا استىق جينالۋى مۇمكىن.

سونىمەن قاتار ا. مامىتبەكوۆ ەكسپورت كولەمى استىق شىعىمدىلىعىنا بايلانىستى ەكەنىن ايتا كەلە، «بيدايدى ىشكى تۇتىنۋ كولەمى 6 ملن. توننا، ونىڭ ىشىندە 2  ملن. تونناسى تۇقىمعا، تاعى 2 ملن. تونناسى ازىق-تۇلىك ماقساتتارىنا جانە شامامەن 2 ملن. توننا تەحنولوگيالىق وڭدەۋگە جانە فۋراجدىق ماقساتتارعا باعىتتالادى. قالعان استىقتىق بارلىعىن ساتىلىمعا شىعارامىز. ال ونى ءتيىمدى وتكىزۋ كولەمگە بايلانىستى»،-دەدى مينيستر.

بۇل تۇرعىدا ۆەدومستۆو باسشىسى ەلىمىزدە استىق شىعىمدىلىعى جوعارى بولعان كەزدە باعالاردىڭ تومەندەۋى جاعدايى ورىن العاندىعىن ەسكە سالىپ ءوتتى. وسىعان بايلانىستى ءوندىرۋ كولەمى مەن ساتۋ مۇمكىندىگىنىڭ ۇيلەسپەۋشىلىگى ورىن العان ەدى.

«بۇگىندە ءبىز ءارتاراپتاندىرۋ ساياساتىن جۇزەگە اسىرۋدامىز. بيدايدىڭ ەگىس القاپتارىن قىسقارتۋ شارالارى جۇرگىزىلۋدە. ول ءبىزدىڭ ىشكى تۇتىنۋ مۇمكىندىكتەرى مەن ساتۋ مۇمكىندىكتەرىنە بايلانىستى تۇزەتىلەدى. سوڭعى جىلدارى استىق باعاسى بۇرىنعىداي قۇلدىراپ جاتقان جوق. سونىمەن قاتار ۆاگوندار مەن ەلەۆاتورلاردىڭ جەتىسپەۋشىلىگى سەكىلدى پروبلەمالار كەلمەسكە كەتۋى ءتيىس»،-دەپ ءتۇيدى ا. مامىتبەكوۆ.