جۋرناليستەر قاۋىمىنا الەۋمەتتىك جاعىنان مەملەكەتتىك مارتەبە قاجەت. قازاقپاراتتىڭ جازۋىنشا بۇل تۋرالى كەشە، الماتىدا، جۋرناليستەر كۇنى قارساڭىندا وتكىزىلگەن فۋتبول ماتچى بارىسىندا قازاقستان جۋرناليستەر وداعىنىڭ توراعاسى سەيىتقازى ماتاەۆ مالىمدەگەن. ونىڭ ايتۋىنشا، قازىر جۋرناليستەردە ونداي مارتەبە جوق.

«قازاقستاننىڭ جۋرناليستەرى دە ناعىز وتانسۇيگىش جاندار. ولار - ءوز ەلىنىڭ پاتريوتتارى. بىراق الەۋمەتتىك جاعىنان مارتەبەسى جوق. كەڭەس زامانىندا مىسالى، پاتەر العاندا، شيپاجايعا بارعاندا بەلگىلى ءبىر الەۋمەتتىك كومەكتەر، جەڭىلدىكتەر بولاتىن. مەن قازىر دە سولارعا ۇقساس جەڭىلدىكتەردىڭ بولعانىن قالايمىن. سوندىقتان جۋرناليستەر تۋرالى بولەك زاڭ كەرەك. ءبىز بۇل ماسەلەنى ءالى كوتەرەمىز. ال مەرەكە قارساڭىندا جۋرناليستەرگە تىلەيتىنىم - ەڭ ءبىرىنشى زور دەنساۋلىق. جۋرناليستيكا - بۇل اۋىر دا كۇردەلى ماماندىق. جۋرناليست ساعاتقا قارامايدى. ول كۇندىز-ءتۇنى جۇمىستا. سوندىقتان دەنساۋلىقتارىڭىز مىقتى بولسىن! قىزمەتتە جاڭا بيىكتەردەن كورىنە بەرىڭىزدەر، وتباسىلارىڭىزعا بەرەكە-بىرلىك تىلەيمىن!» - دەگەن س.ماتاەۆ ءوز سوزىندە.

جۋرناليستەر قۇراماسى ويناعان كەشەگى جولداستىق كەزدەسۋدە جاسىل الاڭعا جاناربەك ءاشىمجان، امانگەلدى سەيىتحانوۆ، گەني تولەگەنوۆ سەكىلدى بەلگىلى جۋرناليستەر شىعىپ، «بىلعارى دوپ» ءتۋرنيرىنىڭ ۇزدىك ويىنشىلارىنان قۇرالعان قۇراما كوماندانى 4:0 ەسەبىمەن جەڭگەن. وسى كوماندا ساپىندا ويناعان الماتى قالاسىنىڭ اكىمى احمەتجان ەسىموۆ 3 گول سالىپ، حەت-تريك جاساپتى.

اباي-اقپارات