قازاقستاننىڭ اۆسترياداعى بۇرىنعى ەلشىسى راحات اليەۆ سول ەلدە ومىرلىك جازاعا تارتىلۋى مۇمكىن، - دەپ حابارلايدى tengrinews.kz جاڭالىقتارى Deutsche Welle باسىلىمىنا سىلتەمە جساپ.

اۆستريانىڭ زاڭدارى بويىنشا ايىپتاۋ ۇكىمى شىققان جاعدايدا اليەۆ 20 جىلدان ومىرلىك جازاعا دەيىن باس بوستاندىعىنان ايىرىلۋى مۇمكىن. ونىڭ ادۆوكاتى مانفرەد اينەدتەر سوت پروتسەسىنىڭ بۇدان ءارى قالاي وربيتىنىنە قاراماستان، ءوز قورعاۋىنداعى ادامنىڭ قازاقستانعا ەكتراديتسيالانۋ مۇمكىندىگىن جوققا شىعاردى. 

اۆستريادا "نۇربانك" مەنەدجەرلەرى جەسىرلەرىنىڭ مۇددەسىن قورعاپ جاتقان ادۆوكات گەرالد گانتسگەردىڭ ايتۋىنشا، كىسى ءولىمى تۋرالى ءىستى القابيلەر سوتى قاراپ جاتىر، ونىڭ قۇرامىنا ءۇش كاسىبي سۋديا مەن سەگىز القابي كىرەدى. زاڭگەر پروتسەستىڭ اشىق بولاتىنىن ايتتى. پروتسەستىڭ قورىتىندىسى بويىنشا ۇكىمدى تەك القابيلەر عانا شىعارا الادى. "القابيلەردىڭ كوبى ايىپتالۋشىنى كىنالى دەپ تانۋى كەرەك. ەگەر داۋىس تەڭ بولسا، ايىپتالۋشىدان ايىپ الىنۋى مۇمكىن", - دەيدى زاڭگەر.

باقىلاۋشىلاردىڭ ايتۋىنشا، اليەۆ ءىسى بويىنشا العاشقى سوت وتىرىسى 2015 جىلدىڭ قاڭتارىنان كەيىن بولۋى مۇمكىن. گانتسگەردىڭ سوزىنە قاراعاندا، ازىرشە ايىپتاۋ قورىتىندىسىنىڭ قاشان دايىن بولاتىنى، سوت توراعاسىنا ءىس ماتەريالدارىمەن تانىسۋ ءۇشىن قانشا ۋاقىت قاجەت بولاتىنى بەلگىسىز. "بۇل مىڭداعان بەتتەن تۇرادى", - دەيدى ادۆوكات.

ۆەنا پروكۋراتۋراسىنىڭ سپيكەرى توماس ۆيچاي (Thomas Vecsui) ادۆوكاتتارىنان سۇراۋ تۇسسە دە، اليەۆتىڭ كەپىلدىكپەن بوساتىلمايتىنىن ايتتى. "اۆستريا قىلمىستىق ءىس جۇرگىزۋ زاڭناماسىندا كىسى ءولتىرۋ تۋرالى ىستەردە كەپىلدىك ەنگىزۋ قاراستىرىلماعان", - دەيدى پروكۋراتۋرا وكىلى.

اباي-اقپارات