ۋكراينا رەسەيدىڭ گازدىڭ 1 مىڭ تەكشە مەترىنىڭ باعاسىن 100 اقش دوللارىنا ارزانداتۋ ۇسىنىسىن قابىلدامادى. «ازاتتىق راديوسىنىڭ» جازۋىنشا ۋكراينا پرەمەر-ءمينيسترى ارسەني ياتسەنيۋك بۇل جايىندا كەشە، 11 ماۋسىمدا ۇكىمەت وتىرىسىندا حابارلاعان. ونىڭ ايتۋىنشا، كيەۆ كەلىسىم-شارتتى وزگەرتۋگە بەكىنىپ وتىر.

11 ماۋسىمدا بريۋسسەلدە رەسەي، ۋكراينا جانە ەۋروپا وداعىنىڭ گاز ماسەلەسى بويىنشا ءۇش جاقتى كەلىسسوزدەرى جالعاستى. كەلىسسوزدەردىڭ بۇعان دەيىنگى كەزەڭدەرىندە ەشقانداي شەشىم قابىلدانباعان. ماسكەۋ كيەۆ وتكەن جىلدىڭ قاراشا-جەلتوقسان ايلارىندا تۇتىنعان گازى ءۇشىن 1 ميلليارد 454 ميلليون اقش دوللارى جانە ءساۋىر-مامىر ايلارىندا تۇتىنعان گازى ءۇشىن تاعى 500 ميلليون اقش دوللارى قارىزىن تولەۋى ءتيىس دەيدى. ال ۋكراينا قارىزىن ارزان باعامەن تولەگىسى كەلەدى. 10 ماۋسىمدا رەسەي ۋكرايناعا تۇتىناتىن گازى ءۇشىن الدىن-الا تولەم جاساۋ مەرزىمىن 10 ماۋسىمنان 16 ماۋسىمعا شەگەرگەن.

 ەستەرىڭىزدە بولسا ۆيكتور يانۋكوۆيچ اقپان ايىندا بيلىكتەن كەتىرىلىپ، رەسەي قىرىمدى قوسىپ العان سوڭ ماسكەۋ ۋكرايناعا كورسەتىپ كەلگەن جەڭىلدىگىن جويىپ، 1 مىڭ تەكشە مەترىن 268 اقش دوللارىنان ساتقان گازىنىڭ باعاسىن بىردەن 485 اقش دوللارىنا قىمباتتاتىپ جىبەرگەن ەدى.

اباي-اقپارات