تۇركيا  ساپارىنان جولجازبالار

تۇركى دۇنيەسى ويشىلدارىنىڭ ءسامميتى اتالعان شارا وسمانعازى ۋنيۆەرسيتەتىندە بولدى. سوندىقتان سول وقۋ ورنى ارقىلى تۇركيەلىك جوعارى وقۋ تۋراسىندا ءبىرشاما كوزقاراسىمىز ءتۇزىلدى. وكىنىشكە وراي قالامەن تولىق تانىسۋدىڭ رەتى كەلمەدى. بىلگەنىمىز – وسمان عازىنىڭ وسمان يمپەرياسىنىڭ نەگىزىن قالاعاندىعى. نىشان رەتىندە سونىڭ اتىنداعى وقۋ ورنىندا ءتۇبى ءبىر تۇركىلەردىڭ دانىشپاندارىن جيناپ، ءسوز ەتۋ مارتەبەسىنىڭ ورىن العاندىعى سودان بولار.

وسمانعازى ۋنيۆەرسيتەتى - جەتىجۇزمىڭدىق تۇرعىنى بار ەسكىشەحيردەگى  ەكى ۋنيۆەرسيتەتتىڭ ءبىرى. باسقا ۇساق-تۇيەك وقۋ ورىندارى بار شىعار،بىراق ءىرىسى وسى ەكەۋى بولۋى كەرەك. سول جەردەگى ءبىر مۇعالىمنىڭ سوزىنە سەنسەك، وسمانعازى ۋنيۆەرسيتەتىندە  1 ميلليون ەكى ءجۇز مىڭ ستۋدەنت وقيتىن كورىنەدى. مۇنىڭ ءمانىسى – بۇل ۋنيۆەرسيتەتتىڭ ەلدەگى سىرتتاي وقىتۋ رۇقساتى بار جالعىز وقۋ ورنى بولۋىندا. شاماسى تەك قانا تۇرىكتەر ەمەس، مىڭداعان شەتەلدىكتەر دە وقيتىن بولۋى كەرەك.

ءبىز ءۇشىن تاڭسىق جاعداي: ۋنيۆەرسيتەتتىڭ عيماراتپەن جاقسى قامتىلعانى. شارامىز وتكەن عيمارات ۋنيۆەرسيتەتتىڭ ارنايى ءىس-شارالار سارايى ەكەن. مىڭ ورىندىق ۇلكەن زالدان باسقا، تاعى دا ءۇش «سالون» (تۇرىكتەر بۇل ءسوزدى فرانتسۋزداردان العان بولار) بار. بارلىق زالدارعا ۇلىلار ەسىمى بەرىلگەن: ءجۇنىس ەمىرە، قوجا احمەت ياسساۋي، سارى سالتىق... كىتاپحاناسى مەن رەكتورلىگىن (رەتوراتتى وسىلاي دەيدى) ايتپاعاندا، ستۋدەنتتەر مەن وقىتۋشىلاردىڭ اسحاناسى بىرنەشە قات (تۇرىكشە - قابات) عيماراتقا ورنالاسقان. ونىڭ ەكى قاتى تۇگەلىمەن مۇعالىمدار تاماقتاناتىن ورىن – ءبىرى مەيرامحانا ىسپەتتى، ءبىرى اسحانا. ارقايسىسىنا ءبىر وتىرعاندا مىڭعا جۋىق ادام جايعاسا الادى...

ءجا،ونى قويشى. ءبىر مۇعالىمدى ىزدەپ ادەبيەتتانۋ فاكۋلتەتىنىڭ بىرنەشە عيماراتىن ارالاپ شارشاعانىمىزدى ايتسايشى. بايلىق تا، ۇلتقا جاسالعان مۇمكىندىك تە وسى بولار.

ءبىز سەكىلدى شاكىرت-ەلگە ۇستازدى باسقا جاقتان ىزدەمەي-اق، بارىمىزدى مويىنداپ، موينىمىزدى وزىمىزگە ەتەنە جۇرتقا بۇرعانىمىز ءجون. بۇگىندە ءبىلىم بەرۋ ءىسى وسماندى ەلىندە جولعا قويىلعان. الىسقا ۇزاماي-اق، ەلدەگى قازاق-تۇرىك ليتسەيلەرىنىڭ ءبىلىم ساپاسى دا جەتكىلىكتى. مۇنايسىز ەلدىڭ شاعىن-ورتا بيزنەس ەسەبىنەن الدىڭعى 16 ورىندا بولۋى ءبىراز جايدى اڭعارتۋى ءتيىس. تۋريزم بويىنشا وسماندى ەلى ەكىباستان ءبىراز ەلدى شاڭ قاپتىردى. ايتپاقشى، ەكسپو – 2016 تۇركيەنىڭ انتالياسىندا وتەتىنى دە ءبىز ءۇشىن ءبىراز جايتتى ۇيرەنۋدىڭ جولى.

ءبىر نارسەنى تۇركى بىتكەن مويىنداۋى قاجەت، ول: قانشاما ءداۋىردى دۇبىرلەتكەن تۇركىلەردىڭ تالاي يمپەرياسى ءىزىم-قايىم بولدى، تەك قانا بۇگىنگى تۇركيادا ءىزى بار، ورنى بار، جاندى بەينە، ءتىرى رۋحى بار. دەمەك، وسماندىنىڭ ۇستازدىعىن جوققا شىعارىپ، جالعان نامىسقا ۇرىنىپ كەرەك ەمەس... شىنايى شاكىرت بولۋدان باستاعان ءجون-اۋ.

سەرىك ابدىرەشۇلى

جولجازبانىڭ سوڭى.

استانا – ىستامبول – ەسكىشەحير - استانا

Abai.kz