بەيسەنبى, 28 ناۋرىز 2024
46 - ءسوز 4874 0 پىكىر 6 ماۋسىم, 2014 ساعات 11:15

ۇبت-مەن ءومىر بىتپەيدى... باستالادى

جىل سايىن ۇبت كەزىندە ەسكە تۇسەتىن وقيعا.

مەن بالا كۇننەن جوعارى وقۋ ورنىن الماتىدا وقيمىن دەپ ويلايتىنمىن. ەكىنشى وي بولعان ەمەس. بىراق، ءدال مەكتەپتى بىتىرگەن جىلى ونىڭ ارمان عانا ەكەنى بەلگىلى بولدى. وتباسىندا - جالعىزبىن. انام عانا. ۇلكەن كىسىنى (ونىڭ ۇستىنە سول جىلى دىمكاستانىپ جۇرگەن بولاتىن) تاستاپ قايدا كەتەمىن؟ تارازدا وقيتىن بولدىم.

ءبىز مەكتەپ بىتىرگەنشە ۇبت شىقتى. الدىن-الا بارىپ، تاپسىرىپ جۇرگەندە 105-110 بالل الىپ ءجۇردىم. مەكتەپ جىلدارى ماتەماتيكادان، گەوگرافيادان، تاريحتان، ءتىل-ادەبيەتتەن قالالىق، وبلىستىق جارىستارعا، رەسپۋبليكالىق وليمپيادالارعا قاتىسىپ ءجۇردىم. ۋايىم جوق. دايىنمىن.

سونىمەن - سوت كۇنى دە كەلدى))). كىردىك كەڭ زالعا. كوڭىل الابۇرتىپ، جۇرەك اتقاقتاپ تۇر. سۇراقتارعا كوز جۇگىرتسەم، ءبارىن بىلەتىن سەكىلدىمىن. "بىلەمىن" دەگەن جامان عوي. ەركىنسىپ وتىردىم. جان-جاعىما قاراپ، باس يزەپ امانداسىپ قويامىن. كوكتەمگى شيەدەي مولدىرەگەن سۇلۋلار كوپ ەكەن. سورىما قاراي، ەڭ سۇلۋى مەنىڭ ارتىما وتىرىپتى. وتىرعاندا دا وڭدىرماپتى: سيرەن ءيىستى ءاتىرى مەن القىزىل كويلەگى ارباپ وتىر... ون التى-ون جەتىگە كەلگەن كەزى...

اۋەلى قارا قاعازعا جازدىرىپ، كەيىن تازاسىنا كوشىرتەتىنى بار ەدى عوي. اۋەلگىسىن جازىپ قويدىم. ارتىمداعى قىزعا قارايىن دەسەم، مويىنىم قارىسىپ، بۇرىلار ەمەس. بوزبالالىق سيندرومى. ءدال سول كەزدە "كەشىرىڭىز..." دەگەن تۇنىق داۋىستىڭ ەستىلمەسى بار ما؟!. سول - سيرەن ءيىستى ءاتىردىڭ يەسى. جالت قارادىم. "كەشىرىڭىز، "تابۋ" دەگەننىڭ نە ەكەنىن بىلەسىز بە؟". "بىلەمىن! - بۇرىلىپ الدىم". "ال ەۆفەميزم دەگەن شە، كەشىرىڭىز..", "كەشىرىڭىز. سىرىم داتۇلى باستاعان كوتەرىلىس..."... نە كەرەك، بىلگەنىمدى بىلگەندەي، بىلمەگەنىمدى - كوزىممەن كورگەندەي ايتىپ جاتىرمىن، ايتىپ جاتىرمىن...

"15 ءمينوت قالدى!" دەگەن داۋىس قانا ەسىمدى جيعىزدى. ال، جانتالاسىپ تازاسىنا كوشىرىپ جاتىرمىن. ءبىر كەزدە قاراسام، تاريحتىكىن ادەبيەتكە، ادەبيەتتىكىن تاريحقا بەلگىلەپ تاستاپپىن. ۇشىپ تۇرىپ، باقىلاۋشىعا بارىپ، باسقا پاراق سۇرادىم. بەرمەدى، بەرۋشى مە ەدى!؟. ۇنجىرعا تۇسكەن. اقىننىڭ تۇبىنە سۇلۋلار جەتەدى عوي ءتۇبى... ناقتىراق - سۇلۋلىققا عاشىقتىق.

سىرتقا شىقتىم. "قالاي بولدى، بالام؟" دەگەن انامنىڭ سوزىنە ءبىرىنشى جاۋابىم: "ارمياعا كەتەمىن!". نە كەرەك، سونىمەن، ۇيگە قايتتىق. اپام تابيعاتىنان سابىرلى كىسى: "كەلەسى جىلى تاپسىراسىڭ عوي، ۋايىمداما". ال مەن: "وقىمايمىن، وقىماي-اق ادەبيەتتى بىلەمىن". بۇلاي دەۋىمنىڭ سەبەبى، توعىزىنشى سىنىپتان فيلوسوفيانى وقيمىن دەپ دايىندالعان ەدىم. الايدا، تارازدا ول كەزدە ونى وقىتاتىن فاكۋلتەت جوق. قىرسىعىپ تۇرعانىم سول.

قورىتىندىسى شىقتى كەلەسى كۇنى: 72 بالل. 73 بالل العاندار - گرانتقا ءتۇسىپتى. مەن - سيرەن يىسىنە اربالعان پاراساتسىز - كرەديتكە ))) كەيىن گرانتقا اۋىستىردى، ءۇيتتى-ءبۇيتتى. ال سيرەن ءيىستى ءاتىردىڭ يەسىن سودان كەيىن كورگەن جوقپىن. الماتىدا وقىعان شىعار.

سولاي. تالاپكەرلەرگە ايتارىم: ۇبت-مەن ءومىر بىتپەيدى، كەرىسىنشە - ءدال سول جەردەن باستالادى. ءتىپتى ساتسىزدىكتىڭ وزىنەن - باقىتتىڭ ۇشقىنى كورىنۋى مۇمكىن.

كوبىرەك عاشىق بولىپ، ازىراق ولەڭ جازىڭىزدار.

ەرلان ءجۇنىس

www.facebook.com

0 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1562
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2253
عيبىرات

قايسار رۋحتى عازيز جان

مۇحتار قۇل-مۇحاممەد 3516