ۆەنگريادا ۇلى ابايعا ەسكەرتكىش قويىلدى، - دەپ حابارلايدى Tengrinews.kz شىعىس قازاقستان وبلىسىنىڭ اقپارات ورتالىعىنا سىلتەمە جاساپ. ۇلى اقىننىڭ ەسكەرتكىشى بۋداپەشتتەگى استانا كوشەسىنە ورناتىلعان. ونىڭ اشىلۋ سالتاناتى قر پرەمەر-ءمينيسترى كارىم ءماسىموۆتىڭ ۆەنگرياعا رەسمي ساپارى بارىسىندا بولدى. قازاقستاندىق دەلەگاتسيا قۇرامىندا شىعىس قازاقستان وبلىسىنىڭ وكىلدەرى بار. وبلىستىڭ جاس تالانتتارى ابايدىڭ اندەرىن ۆەنگر تىلىندە ورىندادى. ەكى جىل بۇرىن شىعىس قازاقستان داڭقتى جەرلەستەرىنىڭ ءمۇسىنىن دايىنداۋدى ءوز موينىنا الىپ، كەيىن ۆەنگرياعا جولداعان بولاتىن. بيۋست قولادان قۇيىلعان، ونىڭ بيىكتىگى - 1070 مم، ەنى - 900 مم.

بۇعان دەيىن قازاق ويشىلى، اعارتۋشى اباي قۇنانباەۆقا ماسكەۋدە، بەيجىڭدە، تاشكەنتتە، ۆيتەبسكىدە، تەگەران مەن ىستامبۇلدا ەسكەرتكىش قويىلعانى بەلگىلى، ال لوندوندا اباي ءۇيى اشىلدى. ايتا كەتەيىك، قازاقستاندىق دەلەگاتسيانىڭ ۆەنگرياعا ساپارى بارىسىندا شىعىس قازاقستان وبلىسى مەن حايدۋ-بيحار مۋنيتسيپاليتەتى اراسىندا ساۋدا-ەكونوميكالىق، عىلىمي-تەحنيكالىق، مادەني-گۋمانيتارلىق ىنتىماقتاستىق جونىندە كەلىسىم جاسالدى.

اباي-اقپارات