سەيسەنبى, 7 شىلدە 2020
COVID-19 قازاقستاندا. جۇقتىرعاندار — 41065. جازىلعاندار — 13614. قايتىس بولعاندار — 188
جاڭالىقتار 2985 0 پىكىر 24 قاراشا, 2014 ساعات 13:22

تۇرعىن ءۇي قۇرىلىس جيناق بانكى كوكشەتاۋدا كوشپەلى وتىرىس وتكىزدى

كوكشەتاۋ قالاسىنداعى 150 پاتەرلى بەس تۇرعىن ءۇيدى پايدالانۋعا بەرۋ مەرزىمى كەشىكتىرىلۋىنە قاتىستى تۇرعىن ءۇي قۇرىلىس جيناق بانكى جانىنداعى قوعامدىق كەڭەسكە بانك كليەنتتەرىنەن ءجيى شاعىم ءتۇسىپ جاتىر. اقمولا وبلىسىنىڭ اكىمدىگىمەن جاسالعان كەلىسىم بويىنشا، جالپى اۋدانى 9,9 مىڭ شارشى مەتر بولاتىن «ۆاسيلكوۆسكي» ىقشاماۋدانىنداعى ۇيلەر 2014 جىلدىڭ قىركۇيەك ايىندا اياقتالۋعا ءتيىس ەدى. اقىرى سالىنىپ ءبىتتى. الايدا كوممۋنيكاتسيانىڭ جوقتىعىنان تۇرعىندار جاڭا ۇيگە ءالى كىرە الماي وتىر.

 بۇل ماسەلە 22 قىركۇيەكتە وتكەن تۇرعىن ءۇي قۇرىلىس جيناق بانكى جانىنداعى قوعامدىق كەڭەستىڭ ەكىنشى وتىرىسىندا تالقىلانعان بولاتىن. ول كەزدە اكىمدىك وكىلدەرى «جاڭا قونىس يەلەرى ۇزاق كۇتكەن پاتەرلەرىنە جىل سوڭىنا دەيىن كىرەدى» دەپ سەندىرگەن. بىراق سودان بەرى قتقجب سالىمشىلارى-پۋلعا قاتىسۋشىلاردىڭ شاعىمى كوبەيمەسە، ازايعان جوق.  

تۇرعىنداردىڭ ارىزىنا قاراعاندا، كوكشەتاۋ قالاسىنىڭ شەتىندە سالىنعان «ۆاسيلكوۆسكي» ىقشاماۋدانىندا كوممۋنيكاتسيا تۇگىلى، بۇل اۋماقتىڭ ءوزى جايلى ەمەس، مۇندا جول دا، تروتۋار دا، جارىق تا جوق. قتقجب باسشىلىعى تۇرعىنداردىڭ جاڭا پاتەرگە قونىستانۋىنا دەيىن بۇل جەردى جايلىلاندىرۋعا جانە كولىك ينفراقۇرىلىمىن جاساۋعا قاتىستى بارلىق ماسەلەلەردىڭ ءتۇيىنى شەشىلەر دەگەن ءۇمىتىن جەتكىزدى. ولاي بولماسا، بۇل ءۇيدىڭ تۇرعىندارى وركەنيەتتىڭ بارلىق يگىلىگىنەن شەت قالماق.

احۋالدى جەرگىلىكتى جەردە قاراستىرۋ ماقساتىندا 2014 جىلدىڭ 18 قاراشاسىندا قتقجب جانىنداعى قوعامدىق كەڭەس اقمولا وبلىسىنىڭ كوكشەتاۋ قالاسىنا كەلىپ، بىردەن قۇرىلىس الاڭىنا باردى.

«جاسىراتىنى جوق، قوعامدىق كەڭەستىڭ العاشقى كوشپەلى وتىرىسىن كوكشەتاۋدا وتكىزۋگە شەشىم شىعارعانى ءبىز ءۇشىن كۇتپەگەن جاعداي بولدى»، – دەيدى قتقجب اقمولا فيليالىنىڭ ديرەكتورى ايباس جارقىمباەۆ. ء«بىز كوكشەتاۋ قالاسى مەن اقمولا وبلىسى اكىمدىكتەرىمەن بىرگە تىعىرىقتان شىعاتىن جولدى ىزدەستىرىپ جاتىرمىز. سەيىتقازى ماتاەۆ جانە سەرگەي پونومارەۆ سەكىلدى بەدەلدى ازاماتتاردىڭ قولداۋىنىڭ ارقاسىندا ءبىز ۆاسيلەۆسكي ىقشاماۋدانىنداعى ماسەلەنى قىسقا مەرزىم ىشىندە سالىمشىلارىمىزدىڭ پايداسىنا شەشىپ بەرە الامىز دەپ ويلايمىن»، – دەپ تۇيىندەدى جارقىمباەۆ.   

قوعامدىق كەڭەس مۇشەلەرى، قالا اكىمدىگىنىڭ وكىلدەرى جانە قاشان پاتەرگە كىرەتىن كۇندى سارىلا كۇتكەن سالىمشىلار    ىقشاماۋدان ماسەلەسىن قۇرىلىس الاڭىنداعى ءبىر پاتەردىڭ ىشىندە تالقىلادى.

«بۇل ۇيلەرگە كىرگەن ادامدار مۇنداي ماسەلەلەرمەن كۇرەسپەستەن، قۋانىپ، پاتەرلەرىن قالاي جايلى ەتۋدى ويلاۋعا ءتيىس، بۇل ءۇشىن ءبارىن جاساۋ قاجەت»، – دەيدى قتقجب جانىنداعى قوعامدىق كەڭەس توراعاسى سەيىتقازى ماتاەۆ. «ونىڭ ۇستىندە سالىنعان ۇيلەردىڭ ساپاسى وتە جاقسى، كىرپىشتەن تۇرعىزىلعان، جىلى. پاتەرلەردىڭ جوسپارلانۋى دا ءساتتى شىققان. ادامدارعا جايلى بولۋى ءۇشىن ءبارى جاسالعانى كورىنىپ-اق تۇر. ەندى تەك باستالعان ءىستى اياقتاۋ قاجەت. اۋماقتى جايلىلاندىرىپ، كوممۋنيكاتسيا تارتۋ كەرەك»، – دەپ قورىتىندى جاسادى سەيىتقازى ماتاەۆ.

كوكشەتاۋ اكىمىنىڭ م.ا. امانگەلدى سمايلوۆ 2014 جىلدىڭ جەلتوقسان ايىنىڭ اياعىنا دەيىن  كوممۋنيكاتسياعا قاتىستى ماسەلەنى شەشۋگە ۋادە بەردى. الايدا ىقشاماۋداندى جايلىلاندىرۋدى كوكتەمگە قالدىرۋدى ۇسىندى. ۋاقىتشا شارا رەتىندە قالا بيلىگى اۋماقتى تەگىستەپ، ۇيلەردىڭ پودەزىنە باراتىن جولدارعا تاس توسەۋگە ۋادە ەتتى. وسىنداي جارتىلاي شارالارعا قاناعاتتانعان پۋلعا قاتىسۋشىلار جۇمىس اياقتالىسىمەن قۇجاتتاردى راسىمدەۋدى باستاي الادى.

جاڭا ۆاسيلەۆسكي ىقشاماۋدانىنداعى تاعى ءبىر ماسەلە –  قولايسىز پودەزد. وعان جەتۋ ءۇشىن تراسسادان اينالىپ، بىرنەشە شاقىرىم جەر جۇرۋگە تۋرا كەلەدى. «ادامدار بالالارىن مەكتەپكە، بالالار باقشاسىنا اپارۋعا مۇمكىندىگى جوق»، – دەيدى قوعامدىق كەڭەس مۇشەسى، تانىمال تەلەجۇرگىزۋشى سەرگەي پونومارەۆ، –  ء«ۇي پايدالانۋعا بەرىلۋگە ءازىر، بىراق جول ءالى جوق».

 اكىمدىك باسشىلىعى بۇعان دا ۋاقىتشا شارا  قولدانۋدى، ياعني ۇلكەن جولعا دەيىن تاس توگۋدى ۇسىنىپ وتىر. مۇنى 2015 جىلدىڭ جازىندا ورىنداماق. ازىرگە ىقشاماۋدان تولىق اياقتالمايدى، تۇرعىندارعا وسى جولدى پايدالانۋعا   تۋرا كەلەدى.

وتكەن جيىنعا كەلگەن قتقجب كليەنتتەرىنىڭ كوبى پاتەرلەرىنە تەزىرەك كىرۋ ءۇشىن قولايسىزدىقتارعا توزۋگە ءازىر ەكەنىن ءبىلدىردى. الايدا بۇل ىقشاماۋدانداعى ناعىز قيىندىق كوكتەمدە، قار ەرىگەن كەزدە تۋى ىقتيمال. تۇرعىندار تىزەگە دەيىن باتپاققا باتىپ قالۋى ىقتيمال. ولار كوكتەمدە دە جول مەن تروتۋاردىڭ جوقتىعىنا كوندىگە مە، جوق پا، ول جاعىن ۋاقىت كورسەتە جاتار. ازىرگە جيىنعا قاتىسۋشىلاردىڭ ءبارى شارتتىڭ وزىنە تيەسىلى بولىگىن ورىنداۋعا ۋاعدالاستى. اكىمدىكتەر جارىق، جىلۋ، سۋ بەرىپ، كاناليزاتسيا سالماق. ال كليەنتتەر بولسا، بارلىق جۇمىس اياقتالعانشا توزە تۇرماق.  

 

Abai.kz

0 پىكىر