بۇگىن قازاقستاندا «حالىقتىق IPO» باعدارلاماسىن ءتۇسىندىرۋ جانە اقپاراتتاندىرۋ كامپانياسى باستالدى. كامپانيا شەڭبەرىندە ەلىمىزدىڭ 25 قالاسىندا 400 پرەزەنتاتسيا مەن 70 ءتۇسىندىرۋ لەكتسيالارىن وتكىزۋ قاراستىرىلعان. ينۆەستيتسيالىق كومپانيالاردىڭ بروكەرلەرى ەكى اي بويى «حالىقتىق IPO-دا» قالاي تابىس تابۋعا بولاتىندىعىن ايتاتىپ بەرەتىن بولادى. سونداي-اق، «قازترانس ويلدىڭ» الدىڭعى IPO-سىنىڭ قورىتىندىلارىمەن بولىسەدى. العاشقى لەكتسيالار قاراعاندىدا، اقتاۋدا، اقتوبەدە، استانادا جانە تارازدا بولىپ ءوتتى. لەكتسيالاردىڭ ءوتۋ كەستەسى  «حالىقتىق IPO» سايتىندا جاريالانعان. لەكتسيالارعا كەز-كەلگەن ادام كەلە الادى.

سونىمەن قاتار، 30 قاراشاعا دەيىن ەلىمىزدىڭ بارلىق وڭىرلەرىندە جۇرەتىن ارناۋلى اقپاراتتىق اۆتوبۋستاردان قوسىمشا اقپاراتتاردى بىلۋگە بولادى.

ەستەرىڭىزگە سالا كەتەيىك، «حالىقتىق IPO» باعدارلاماسى 2012 جىلى ىسكە قوسىلعان بولاتىن. IPO-عا ءبىرىنشى بولىپ «قازترانس ويل» كومپانياسى شىعارىلدى. 34 مىڭ قازاقستاندىق «قازترانس ويلدىڭ» 35 ميلليون قاراپايىم اكتسيالارىنىڭ يەگەرلەرى اتاندى. «قازترانس ويل» اق قاراپايىم اكتسيالار بويىنشا ءبىر اكتسياعا 2012 جىلى 75 تەڭگە، 2013 جىلى 109 تەڭگە ديۆيدەندتەر تولەدى.

2014 جىلى IPO-عا KEGOC ەنەرگەتيكالىق كومپانياسىنىڭ اكتسيالارى شىعارىلادى. كومپانيانىڭ 10% مينۋس ءبىر اكتسياسىن ورنالاستىرۋ جوسپارلانۋدا. قور نارىعىنا  2015 جىلى «سامرۇك-ەنەرگو»، 2016 جىلى «قازاقستان تەمىر جولى» جانە «قازاتومپروم» ۇلتتىق كومپانيالارىنىڭ قاعازدارىن شىعارۋ كۇتىلۋدە.

Abai.kz