كۇرەس تۇرلەرى بويىنشا ءۇندىستاننىڭ نيۋ-دەلي قالاسىندا وتكەن ازيا چەمپيوناتىنىڭ شىمىلدىعى جابىلدى. جارىستى العاشقى بولىپ باستاعان قازاقستاننىڭ ەركىن كۇرەس شەبەرلەرىنىڭ تابىسى جايىندا ايتتىق. نۇرعالي راقىمانقۇلوۆتىڭ شاكىرتتەرى ءبىر التىن، ەكى كۇمىس جانە ەكى قولانى يەلەنىپ، كوماندالىق ەسەپتە يراننان كەيىنگى ەكىنشى ورىنعا جايعاستى. ال ودان كەيىن بوز كىلەمگە ايەلدەر كۇرەسى مەن گرەك-ريم كۇرەسىنىڭ شەبەرلەرى شىقتى.

كۇرەس تۇرلەرى بويىنشا ءۇندىستاننىڭ نيۋ-دەلي قالاسىندا وتكەن ازيا چەمپيوناتىنىڭ شىمىلدىعى جابىلدى. جارىستى العاشقى بولىپ باستاعان قازاقستاننىڭ ەركىن كۇرەس شەبەرلەرىنىڭ تابىسى جايىندا ايتتىق. نۇرعالي راقىمانقۇلوۆتىڭ شاكىرتتەرى ءبىر التىن، ەكى كۇمىس جانە ەكى قولانى يەلەنىپ، كوماندالىق ەسەپتە يراننان كەيىنگى ەكىنشى ورىنعا جايعاستى. ال ودان كەيىن بوز كىلەمگە ايەلدەر كۇرەسى مەن گرەك-ريم كۇرەسىنىڭ شەبەرلەرى شىقتى.

جۇما كۇنى جارىس ايەلدەر كۇرەسى بويىنشا ءوتتى. جەتى سالماق دارەجەسى بويىنشا بەلدەسكەن جەرلەستەرىمىزدىڭ اراسىنان كوز ىلەسپەس قيمىل، ساۋاتتى تاكتيكا جانە ءمىنسىز تەحنيكانىڭ ارقاسىندا كوپشىلىكتىڭ كوزايىمىنا اينالعاندار دا، كەرىسىنشە، سۇرەڭسىز ونەر كورسەتىپ، سەنىم ۇدەسىنەن شىعا الماعان سپورتشىلار دا كەزدەستى. ماسەلەن، مەرۋەرت دىنباەۆا (59 كەلى), ولگا كالينينا (63 كەلى) جانە ولگا جانىبەكوۆا (67 كەلى) العاشقى اينالىمداردا-اق ءسۇرىندى. دىنباەۆا قىتاي قىزى فەنگمينگ ليۋدان ۇتىلسا، كالينينا وڭتۇستىك كورەيا بالۋانى سانگ-يۋن پاكقا قارسىلىق كورسەتە العان جوق. جانىبەكوۆا بولسا، موڭعوليالىق بانگاردات ويۋنسۋرەننەن ايلاسىن اسىرا المادى. الايدا وسى ءۇش وتانداسىمىزدىڭ اراسىنان سوڭعىسىنىڭ جولى بولدى. قارسىلاسى جۇبانىش باسەكەسىنە شىقپاعاندىقتان، ولگا جانىبەكوۆا قولا جۇلدەگەر دەپ تانىلدى.
تۇساۋكەسەر كەزدەسۋدە وڭتۇستىككورەيالىق يۋ مي ليدەن باسىم تۇسكەن ەلەانورا ءابۋتالىپوۆا (48 كەلى) كەلەسى بەلدەسۋدە ۆەتنامدىق تي نگۋەننەن ۇتىلدى.
بيىل الەكساندر مەدۆەدتىڭ تۋرنيرىندە التىننان القا تاعىنىپ، ءوز جانكۇيەرلەرىن ءبىر قۋانتىپ تاستاعان ايىم ءابدىلدينا (55 كەلى) ازيا چەمپيوناتىنداعى باسەكەلەرىن ءساتتى باستادى. تايپەيلىك ي-فانگ حوۋدىڭ تاس-تالقانىن شىعارعان ارۋىمىز ودان كەيىن ۆەتنامدىق تي فامدى ايقىن باسىمدىلىقپەن ۇتتى. الايدا جارتىلاي فينالدا ايىمدى اسپاناستى ەلىنىڭ وكىلى، 2007 جىلعى ازيا چەمپيونى سەنليان ۆانگ توقتاتتى. ال قولا مەدال ءۇشىن تارتىستا جەرلەسىمىز موڭعوليالىق ساتو بيامباتتسەرەننەن جەڭىلىپ قالدى.
قازاقستاننىڭ بالۋاندارى اراسىنان جۇلدىز ەشىموۆا مەن گۋزەل مانيۋروۆا اقتىق سىنعا دەيىن القىنباي جەتتى. 51 كەلى سالماقتا كۇرەسكەن جۇلدىز ۇندىلىك بابيتا كۋماري مەن جاپوندىق حيرومي ساكارايعا سان سوقتىردى. شەشۋشى سايىستا جەرلەسىمىز قىتاي بالۋانى، الەم چەمپيوناتىنىڭ قولا جۇلدەگەرى لي حۋيدەن ۇتىلىپ، كۇمىستى قورجىنىنا سالدى.
اسا اۋىر سالماقتاعى گۋزەل مانيۋروۆا ۇندىلىك انمول انمول مەن جاپوندىق يوشيكو ءينيۋدى باس كوتەرتپەي ۇتتى. ەكەۋىنە دە قازاقستاندىق بالۋان ءبىر ۇپاي ۇستاتقان جوق. فينالدا گۋزەل دۇنيەجۇزىلىك ۋنيۆەرسيادانىڭ جەڭىمپازى، موڭعوليالىق نارانچيمەگ گەلەگدجامەتستەن باسىم ءتۇسىپ، ازيانىڭ التىنىن كەۋدەسىندە جارقىراتتى.
نيۋ-دەلي ساپارىنان قىزدارىمىز ءبىر التىن، ءبىر كۇمىس جانە ءبىر قولا مەدالدى يەلەندى. كوماندالىق ەسەپتە قىتاي مەن جاپونيادان قالىپ قويعان قازاقستان قۇراماسى ءۇشىنشى ورىندى ولجالادى.
دەمالىس كۇندەرى گرەك-ريم كۇرەسىنىڭ شەبەرلەرى جارىس كورىگىن قىزدىرادى. ءۇندىستاندا قازاقستان كومانداسى ساپىندا مارات عارىپوۆ (55 كەلى), المات كەبىسباەۆ (60 كەلى), ايبەك ەڭسەحانوۆ (66 كەلى), اسەت ءادىلوۆ (74 كەلى), الحازۋر وزديەۆ (84 كەلى), مارعۇلان اسەمبەكوۆ (96 كەلى) جانە گەننادي لياششەنكو (120 كەلى) ونەر كورسەتتى.
جارىستى جوعارى قارقىنمەن باستاعان اسا جەڭىل سالماقتاعى مارات عارىپوۆ قولا مەدالدى يەلەندى. جارتىلاي فينالدا ول وڭتۇستىك كورەيانىڭ وكىلى گيۋ دجين چويعا جەڭىلسە، ءۇشىنشى ورىن ءۇشىن ايقاستا سولتۇستىك كورەيا بالۋانى چۋل سو چويدان ايلاسىن اسىردى. ءدال سونداي ناتيجەگە مارعۇلان اسەمبەكوۆ قول جەتكىزدى. ول شەشۋشى تۇستا يراندىق باباك گوربانيگە ۇتىلعانىمەن، بوز كىلەم يەسى اشوك كۋماردىڭ ۋىسىنان قولا مەدالدى جۇلىپ اكەتتى. ال ايبەك ەڭسەحانوۆ باستاپقىدا بارلىق قارسىلاستارىن قاپىدا قالدىرىپ، فينالدا وڭتۇستىككورەيالىق حيۋگ ۆۋ كيمگە ەسە جىبەردى. باسقا بالۋاندارىمىز سەنىم ۇدەسىنەن شىعا العان جوق. وسىلايشا، ءبىر كۇمىس جانە ەكى قولانى ەنشىلەگەن قازاقستان قۇراماسى كوماندالىق ەسەپتە بەسىنشى ورىندا قالىپ قويدى. ءبىزدىڭ بالۋاندار وڭتۇستىك كورەيا، قىتاي، ءۇندىستان جانە يران قۇرامالارىنان قالىپ قويدى. ازيا چەمپيوناتىنىڭ قورىتىندىسى بويىنشا مىنا بالۋاندار جەڭىمپاز اتاندى: 55 كەلى - گيۋ دجين چوي (وڭتۇستىك كورەيا), 60 كەلى - دجانگ شەنگ (قىتاي), 66 كەلى - حيۋن ۆۋ كيم (وڭتۇستىك كورەيا), 74 كەلى - دجين سۋنگ پاك (وڭتۇستىك كورەيا), 84 كەلى - سە يۋل لي (وڭتۇستىك كورەيا), 96 كەلى - باباك گورباني (يران), 120 كەلى - مۇحاممەد گورباني (يران).

عالىم سۇلەيمەن

«ايقىن» گازەتى، 18.05.10.