بەيسەنبى, 28 قاڭتار 2021
ءبىزدىڭ شەنەۋنىك 4329 0 پىكىر 22 قىركۇيەك, 2014 ساعات 07:24

اكىمىمىز قۋىرشاق بولىپ كەتتى

 

                 اكىمىمىز قۋىرشاق بولىپ كەتتى

 

   بۇرىننان دا ءبىزدىڭ وبلىستىڭ جاقسى اتى شىعىپ جۇرگەندىگى شامالى ەدى. جاقىندا ءتىپتى بۇكىل جۇرتتىڭ كۇلكىسىنە اينالدىق. نۇرالى سادۋاقاسوۆ دەگەن ءتاپ-ءتاۋىر باسشىمىز بار ەدى. ءۇش جىلعا جۋىق اكىم بولعالى ەشتەڭەنى قىرىپ تاستاماسا دا بىرەۋدەن ىلگەرى بىرەۋدەن كەيىن ءوڭىرىمىزدى وزىنشە بيلەپ تۇرعان. ارينە، وزگە وبلىستىڭ اكىمدەرىمەن سالىستىرعاندا اتى بايگەدەن وزىپ كەلەر دەپ ەشكىم دە ۇمىتتەنبەيتىن. قايتا كەرىسىنشە، ۇلان-بايتاق ەلىمىزدىڭ  ون ءتورت وبلىس، مەملەكەتتىك ماڭىزى ەرەكشە ەكى قالا اكىمىنىڭ كوش سوڭىندا جۇرەتىندىگىنە ءتىپتى ەتىمىز ءولىپ تە كەتكەن. سويتسەك...

    سويتسەك، نۇرالى مۇستافاۇلى ءوزىنىڭ اتى شىققاندىعىن جامان كورمەيتىن سەكىلدى. وتكەندە، قوستاناي قالاسىنىڭ كۇنى مەرەكەسىندە نەكە سارايىن اشۋ سالتاناتىندا قازاق جاستارىنا «گوركو!» دەپ ايقايلاپ ايدى اسپانعا ءبىر-اق شىعارىپ ەدى. ونىسى بۇكىل ەلىمىزگە تاراپ كەتىپ، ينتەرنەتتەگى تالاي قىرشاڭقىلاردىڭ قاتتى قالجىڭىنا ۇشىراعان. نەگىزىنەن ورىسشىل وسكەن ازامات قوي، كەيىن مۇنداي ۇياتتى ىستەردەن اۋلاق بولار دەپ ويلاعانبىز. ونىمىز بەكەر ەكەن. جاقىندا ءبىر سۋرەتشى وبلىس باسشىسىنىڭ بەينەسىن ورىستىڭ ماترەشكاسىنىڭ ىشىنە ورنالاستىرىپ، مۇراجايداعى ارنايى سۋرەت كورمەسىنە قويىپ، ءوڭىرىمىزدى ۇلكەن ءبىر كۇلكىگە كومىپ تاستاعان. سۋرەتشى وبلىس اكىمىنە وزىنشە جاقسى ءبىر سىي جاسادىم دەپ ويلاسا كەرەك. الايدا اكىمىمىزدى وزگە ءبىر فورمادا ەمەس، ءدال وسى ماترەشكەگە سالىپ قويۋى نەنى مەڭزەيدى؟ بۇل ءوزى ورىستىڭ ۇلتتىق مۇرالارىنىڭ ءبىرى دەسەك، قازاق ۇلىعى شىرەنىپ تۇراتىن ورىن با بۇل؟ الدە، مۇنىڭ استارىندا ءبىز بىلمەيتىن تاعى ءبىر قۇپيا بار ما؟ «بۇل نە مازاق؟ دەرەۋ الىپ تاستاڭدار!» دەپ قاھارىنا مىنبەگەندىگىنە قاراعاندا، ونىڭ ماترەشكەدەگى بەينەسى وزىنە قاتتى ۇنايتىن سەكىلدى. الدە،كىم ءبىلىپتى، اكىم دە پەندە ەمەس پە، اتاق-داڭقىن ەڭ بولماسا، وسىلايشا ءبىر شىعارسام دەگەن الدامشى ويدىڭ شىرماۋىنان شىعا المادى ما ەكەن.

    ايتپاقشى، اتاق-داڭقىن اسىرۋ دەگەننەن شىعادى، ءبىزدىڭ وبلىستى باسقارعان اكىمدەر بۇل «ونەردى» ەرەكشە مەڭگەرگەن سىڭايلى. ءبىر اكىمىمىز وسى وڭىردە التى اي قىس بولسا دا «ەندى كونكي تەبىڭدەر» دەپ ات شاپتىرىم مۇز سارايىن سالىپ ەدى، ەكىنشىسى شىركەۋ تۇرعىزۋعا قول ۇشىن بەردىم دەپ پراۆوسلاۆ ءدىنىنىڭ قاسيەتتى اۋليەلەرىنىڭ قاتارىنان ويىپ تۇرىپ ورىن الدى. ال ءۇشىنشىسىنىڭ ىستەگەنى مىناۋ. كەي-كەيدە بىزدەگى اتقا مىنەرلەردىڭ ويلاعانى حالىقتىڭ قامى ەمەس، قايتكەندە ءوز اتىمدى قالدىرام دەگەن ءوزارا باسەكە مە دەگەن سەزىكتى وي سانامىزدى بيلەپ الاتىنى بار. مۇندايدا اتامىز قازاقتىڭ «اتىڭ شىقپاسا، جەر ورتە» دەگەن ناقىلى ەسكە تۇسەدى. بىراق، قازىر كىم جەرىن ورتەتكىزىپ قويادى دەيسىڭ، ءبارى دە جەكەمەنشىكتىڭ قولىندا. مۇنداي اتاق تىم قىمباتقا تۇسەر.

 

P.S ەگەر ءتىپتى اكىمىز اتىن شىعارعىسى كەلسە، انا كۋلاگيننەن ۇلگى السا قايتەر ەدى. قايداعى ءبىر ماترەشكەگە مازاق بولعانشا، اتتارى مۇقىم جۇرتقا بەلگىلى اۋليەلەردىڭ جانىندا تۇرعانعا نە جەتسىن. ۋاقىتشا بولسا دا. «قۇلاساڭ، ناردان قۇلا» دەگەندەي.

مۇراتبەك داۋرەنۇلى.

قوستاناي وبلىسى.

Abai.kz

0 پىكىر