قازاقستان پرەزيدەنتىنىڭ ءباسپاسوز حاتشىسى داۋرەن اباەۆ داريعا نازارباەۆانىڭ ۆيتسە-پرەمەر بولىپ تاعايىندالۋىنا قاتىستى تۇسىنىك بەردى، - دەپ حابارلايدى "قازاقستان جاڭالىقتارى" اقپاراتتىق اگەنتتىگى.

"مەملەكەت باسشىسى كادرلىق تاعايىنداۋلارعا مۇقيات قارايدى. مۇنداي ءاربىر شەشىمنىڭ ارتىندا سالماقتى تالداۋ مەن كانديداتتار جۇمىسىنىڭ ناتيجەلەرى تۇر. نۇرسۇلتان ءابىشۇلى كوپتەگەن دەرەكتى ەسكەرەدى، ونىڭ اراسىندا ناتيجەلىلىك، ماقساتتى كورسەتكىشتەر جەتىستىگى، بەرىلگەن تاپسىرمالاردىڭ ورىندالۋ ساپاسى بار", - دەدى اباەۆ.

"البەتتە، بۇل تاعايىنداۋ دا مۇقيات تالداندى. بۇل تاعايىنداۋ پرەمەر-مينيستر كارىم ءماسىموۆتىڭ ۇسىنىسىمەن بولدى", - دەدى مەملەكەت باسشىسىنىڭ ءباسپاسوز حاتشىسى.

ونىڭ ايتۋىنشا، داريعا نازارباەۆا ءماجىلىستىڭ الەۋمەتتىك-مادەني دامۋ كوميتەتىنىڭ ءتورايىمى، كەيىن پالاتا ۆيتسە-سپيكەرى بولىپ ءجۇرىپ، ء"وزىنىڭ ناتيجەلى پارلامەنتاري ەكەنىن كورسەتتى".

"داريعا نۇرسۇلتانقىزى الەۋمەتتىك سالانى جاقسى بىلەدى، ول ءوزىنىڭ ناتيجەلى پارلامەنتاري ەكەنىن كورسەتتى جانە قازىر ۇلت جوسپارى - 100 ناقتى قادامدى ىسكە اسىرۋ باعىتىندا جەتەكشىلىك ەتىپ كەلەدى. بۇل تاعايىندالۋ مەريتوكراتيالىق قاعيداتتارعا جاۋاپ بەرەدى دەپ ەسەپتەيمىن", - دەدى اباەۆ.

سونىمەن قاتار، اباەۆ نازارباەۆانىڭ پارلامەنتتەن كەتۋى زاڭنامالىق ورگاننىڭ جۇمىسىن السىرەتەدى دەپ ەسەپتەمەيتىنىن ايتتى.

"مەن ولاي ويلامايمىن. پارلامەنتتىڭ جۇمىسى - كۇردەلى مەحانيزم، ول جۇمىسىن بۇرىنعى تارتىپپەن جالعاستىرادى. دەپۋتاتتاردى كوپ جۇمىس كۇتىپ تۇر", - دەدى ول.

ەسكە سالا كەتەيىك، جۇما كۇنى، 11 قىركۇيەكتە مەملەكەت باسشىسىنىڭ بۇيرىعىمەن داريعا نازارباەۆا قازاقستان رەسپۋبليكاسى پرەمەر-ءمينيسترىنىڭ ورىنباسارى قىزمەتىنە تاعايىندالدى. سول كۇنى ساياساتكەر ەرلان قارين داريعا نازارباەۆانىڭ قازاقستان ۇكىمەتىنە كەلۋىمەن الەۋمەتتىك ماسەلەلەر ودان ءارى اسەرلەنە تۇسەدى، دەگەن پىكىرىن ايتتى

تengrinews.kz