بۇگىن، 9 قىركۇيەكتە، وڭتۇستىك قازاقستان وبلىسى اكىمدىگىنىڭ قولداۋىمەن قازاقستان رەسپۋبليكاسىنىڭ پرەزيدەنتى جانىنداعى ورتالىق كوممۋنيكاتسيالار قىزمەتىنىڭ وبلىستىق فيليالى اشىلدى.

اشىلۋ سالتاناتىنا وبلىس اكىمى بەيبىت اتامقۇلوۆ قاتىسىپ، بۇل ورتالىقتىڭ ەلىمىزدەگى باس سۇحبات الاڭىنا اينالاتىنىن ايتتى.

«وتكەن جىلدان باستاپ قىزمەتتىڭ ايماقتارداعى فيليالدارى اشىلا باستادى. بۇگىن كەزەك شىرايلى شىمكەنت قالاسىنا دا جەتتى. بۇل ءوڭىردىڭ اقپاراتتىق سالاسى ءۇشىن ايتۋلى وقيعا. ورتالىق كوممۋنيكاتسيالار قىزمەتىنىڭ فيليالى ايماقتاعى مەملەكەتتىك مەكەمەلەر جۇمىسىنىڭ حالىققا اشىقتىعىن ارتتىرۋعا جانە جۇرتشىلىقتىڭ مەملەكەت جۇمىسى تۋرالى كوبىرەك اقپارات الۋىنا جول اشاتىن بىردەن-ءبىر سۇحبات الاڭىنا اينالاتىنىنا سەنىمدىمىن»، – دەدى وبلىس باسشىسى.

اتالعان ءىس-شارادا «ۇلت جوسپارى «100 ناقتى قادام» اياسىندا وڭتۇستىك قازاقستان وبلىسىندا كاسىپكەرلىكتى دامىتۋ جانە يندۋستريالاندىرۋ باعدارلاماسىنىڭ جۇزەگە اسىرىلۋى» تاقىرىبىندا العاشقى ونلاين-بريفينگ ۇيىمداستىرىلدى.

ءباسپاسوز كونفەرەنتسياسىنا وبلىس اكىمىنىڭ ورىنباسارى س.تۇياقباەۆ پەن «حلوپكوپروم تسەلليۋلوزا» جشس باس ديرەكتورى ق.اباسوۆ قاتىستى.

وبلىس اكىمىنىڭ ورىنباسارى س.تۇياقباەۆ ءوڭىردىڭ يندۋستريالدى-يننوۆاتسيالىق دامۋى تۋرالى ايتتى. سونىمەن قاتار، «حلوپكوپروم تسەلليۋلوزا» جشس باس ديرەكتورى ق.اباسوۆ تەڭگە كۋرسىنىڭ وزگەرۋى بۇگىنگى تاڭدا ەكسپورتەرلار ءۇشىن ءتيىمدى بولىپ تۇرعانىن ايتتى. سەبەبى، الەمدىك نارىقتا وتكەن جىلى ماقتا شيكىزاتىنىڭ كەلىسى 75-80 تەڭگە بولسا، بيىلعى باعا 100 تەڭگەگە كوتەرىلەدى دەپ كۇتىلۋدە. بۇل ءوز كەزەگىندە شارۋالاردىڭ وتكەن جىلمەن سالىستىرعاندا 20 جانە ودان دا كوپ پايىز مولشەرىندە پايدا تابۋىنا مۇمكىندىك بەرەدى.

بۇگىندە وقو – ترانسپورتتىق-لوگيستيكالىق ينفراقۇرىلىمى دامىعان، ەكونوميكالىق جانە تۋريستىك الەۋەتى جوعارى، زاماناۋي تەلەكوممۋنيكاتسيالىق جۇيەمەن قامتىلعان ايماق رەتىندە قارجى سالۋعا بار جاعدايى جاسالعان ءوڭىر.

ەسكە سالايىق، شىمكەنتتەگى فيليال ورتالىق كوممۋنيكاتسيالار قىزمەتىنىڭ وڭىرلەردەگى سەگىزىنشى كەڭسەسى بولىپ تابىلادى. مۇنداي ورتالىقتار الماتى، اتىراۋ، قىزىلوردا، اقتاۋ، كوكشەتاۋ، پاۆلودار جانە وسكەمەن قالالارىندا جۇمىس ىستەيدى.

وقو اكىمىنىڭ ءباسپاسوز قىزمەتى