26 تامىز. ەلوردا تورىنەن «قازاقستان – كورەيا دوستىق باقشاسى» دەپ اتالاتىن دەمالىس ساياباعىن اشۋ كوزدەلىپ وتىر. بۇل تۋرالى استانا قالاسى اكىمدىگىنىڭ ءباسپاسوز قىزمەتى حابارلادى. استانا قالالىق اكىمدىگىنىڭ حالىقارالىق سەرىكتەستىك ءبولىمى وكىلدەرى مەن كورەي رەسپۋبليكاسىنىڭ ورمان شارۋاشىلىعى قىزمەتىنىڭ ماماندارى بىرىگىپ «قازاقستان – كورەيا دوستىق باقشاسىن» اشۋ تۋرالى كەلىسسوزدەر جۇرگىزدى. اتالعان جوبانى كورەي رەسپۋبليكاسىنىڭ 1 ملن دوللار كولەمىندەگى ينۆەستيتسيالىق قارجىسى ەسەبىنەن جۇزەگە اسىرۋ جوسپارلانۋدا. دوستىق باقشاسىن قۇرۋ ماقساتى — سەرىكتەستىكتى نىعايتۋ جانە حالىقارالىق ەكسپو-2017 كورمەسىن وتكىزۋ كەزىندە قالا تۇرعىندارى مەن قوناقتارىنىڭ دەمالىس ورىندارىن دامىتۋ بولىپ تابىلادى. كەڭەس قورىتىندىسى بويىنشا استانا قالاسىنىڭ اكىمدىگى مەن كورەي رەسپۋبليكاسىنىڭ ورمان شارۋاشىلىعى قىزمەتى اراسىندا «قازاقستان – كورەيا دوستىق باقشاسى» جاسىل اۋماعىن قۇرۋداعى سەرىكتەستىك بويىنشا ءوزارا كەلىسىم تۋرالى مەموراندۋمعا قول قويىلدى.

اقپارات كوزى: http://egemen.kz/2015/08/26/74156