بۇگىن رەسپۋبليكالىق ءبىلىم جۇيەسى قىزمەتكەرلەرىنىڭ تامىز كەڭەسى بارىسىندا ءبىلىم جانە عىلىم ءمينيسترى اسلان ءسارىنجىپوۆ بۇكىل مەكتەپتەردە "قازاق ادەبيەتى" مەن "قازاقستان تاريحى" پاندەرىن قازاق تىلىندە وقىتۋ كەرەكتىگىن ايتتى. بۇل تۋرالى قازاقپارات حابارلادى.

"مەكتەپتەردە ءۇش تىلدە وقىتۋ مودەلى ەنگىزىلەدى. جوعارى سىنىپتاردا جانە جوعارى وقۋ ورىندارىندا اعىلشىن تىلىندە وقىتۋعا كەزەڭ-كەزەڭىمەن كوشۋ مىندەتى قويىلىپ وتىر. بۇل رەتتە مەملەكەتتىك ءتىلدى جوعارى دەڭگەيدە مەڭگەرۋ مىندەتىنىڭ باسىمدىعىن ۇمىتپاۋىمىز قاجەت. "قازاق ادەبيەتى" پانىنە قوسا، "قازاقستان تاريحى", "گەوگرافيا" پاندەرىن بۇكىل مەكتەپتەردە قازاق تىلىندە وقىتۋ ۇسىنىلىپ وتىر", - دەيدى ا.ءسارىنجىپوۆ.

ونىڭ ايتۋىنشا،  2013 جىلدان باستاپ ەلىمىزدە اعىلشىن 1-سىنىپتىڭ باعدارلاماسىنا ەنگىزىلگەن، سوندىقتان، وسى جۇمىستى اياسىندا جوعارى سىنىپ ساباقتارىن اعىلشىن تىلىندە وتكىزۋ كوزدەلۋدە.

"وسى جۇمىستىڭ اياسىندا سىنىپتان تىس شارالار مەن اعىلشىن تىلىندە بىرقاتار كۋرستار وتكىزۋ جوسپارلانعان. سونىمەن قاتار، جازعى ءتىل توقسانىن ۇيىمداستىرۋ كوزدەلگەن، بۇعان پەداگوگيكالىق جوعارى وقۋ ورىندارىنىڭ 3-4 كۋرس ستۋدەنتتەرى تارتىلادى. ءسويتىپ، جوعارى سىنىپتاردا ينفورماتيكا، فيزيكا، حيميا جانە بيولوگيا پاندەرى اعىلشىن تىلىندە وقىتىلاتىن بولادى", - دەدى مينيستر.

ەستەرىڭىزگە سالساق، بۇعان دەيىن باس ۇستازدىڭ «قازاق تىلىندە قازاق ادەبيەتى، قازاقستان تاريحى، گەوگرافيا ءپانى وقىتىلادى. ينفورماتيكا، فيزيكا، حيميا، بيولوگيا جوعارى سىنىپتاردا تەك اعىلشىن تىلىندە وتەتىن بولادى. ال، قانداي مەكتەپ بولسا دا، مەيلى ول قازاق، مەيلى ارالاس مەكتەپ بولسىن  دۇنيەجۇزى تاريحى ءپانىن تەك ورىس تىلىندە وقيدى»، - دەگەنى تۋرالى جازعان ەدىك.

ايتا كەتەيىك، اسلان باكەنۇلى ءدال ەكى جىل بۇرىن، 2 قىركۇيەكتە وسى سالاعا مينيستر بولىپ كەلدى. ءمينيستردىڭ اۋىز تولتىرىپ ايتارلىق قىزمەتى رەتىندە بيىلعى جىلى مەملەكەتتىك گرانتتىڭ 78 پايىز ۇلەسىنىڭ قازاق ءتىلدى تۇلەكتەرگە ءبولىنۋىن ايتۋعا بولادى.

Abai.kz