ساۋد ارابيا كورولدىگىنە (ساك) رەسمي ساپارمەن بارعان قازاقستان مۇسىلماندارى ءدىني باسقارماسى قاجىلىق ميسسياسىنىڭ توراعاسى، نايب ءمۇفتي سەرىكباي قاجى وراز ەر-رياد قالاسىندا «ناس» حولدينگ باسشىسى احمەت سۇلتان مىرزامەن كەزدەستى. باسقوسۋعا قازاقستان ەلشىلىگىنىڭ جاۋاپتى قىزمەتكەرلەرى دە قاتىستى.

رەسمي كەزدەسۋدە قمدب دەلەگاتسياسى مەن ساك حالىقارالىق اۋە حولدينگى وكىلدەرى 2015 قاجىلىق ماۋسىمى كەزىندە قازاقستان قاجىلارىن تاسىمالداۋ ماسەلەسىن تالقىلادى. ەكىجاقتى كەلىسسوزدەر ناتيجەسىندە دەلەگاتسيا جەتەكشىسى سەرىكباي وراز بەن «ناس» حولدينگ باسشىسى احمەت سۇلتان ورتاق كەلىسىمگە قول قويدى.

كەلىسىم قۇجاتىندا كورسەتىلگەندەي، بيىل Flaynas حالىقارالىق اۋەكومپانياسى قازاقستاندىق قاجىلاردى تىكەلەي رەيسپەن قاسيەتتى مەككە قالاسىنا تاسيتىن بولدى. وتانداستارىمىز سىيىمدىلىعى 375 ادامدى قۇرايتىن Airbus 330, 300 جولاۋشىعا ارنالعان Boeing 767 جانە Boeing 757 (210 ادام) ماركالى ۇشاقتارمەن ۇشادى. ال قازاقستان تاراپىنان بەلگىلەنگەن SسAT اۋەكومپانياسىنىڭ قاجىلاردى تاسىمالداۋعا قاتىسا الماۋىنا بايلانىستى Flaynas اۋەكومپانياسى ەلىمىزدىڭ قاجىلارىنا تولىقتاي قىزمەت كورسەتەدى. قازاقستان ازاماتتارىن جيددا باعىتى بويىنشا ۇشىرۋ كەستەسى تەك الماتى قالاسىنان جۇزەگە اساتىن بولدى. الماتى-جيددا باعىتى بويىنشا ۇشاتىن 4 اۋەكەمەسى كۇن سايىن 3 رەيس ورىندايدى. بۇل تۋرالى قمبد ءباسپاسوز قىزمەتى حابارلادى.

«بۇل شەشىم – جەرلەستەرىمىز ءۇشىن ۇلكەن مۇمكىندىك. ەندى قازاقستان قاجىلارى تىكەلەي مەككە ماڭىنداعى جيددا قالاسىنا ۇشاتىن بولادى. بۇعان دەيىن ءبىزدىڭ ازاماتتار ورتا جولدا انكارا، شاردجا، ت.ب. قالالاردا ايالداپ، اۋەجايلاردا ءوز رەيستەرىن بىرنەشە ساعات بويى كۇتىپ، سودان كەيىن جيددا قالاسىنا جەتەتىن. اۋەجايدا 18 ساعاتقا دەيىن كۇتىپ قالعان جاعدايلار كەزدەستى. جەرلەستەرىمىز بۇعان دەيىن جيدداعا جەتۋ ءۇشىن 12-15 ساعاتىن جولعا شىعىنداسا، ەندى، اللا قالاسا، 6 ساعاتتىڭ كولەمىندە جيدداعا جەتەدى. قاجىلارىمىز ۋاقىتىن ۇنەمدەيدى ءارى قارجىلىق شىعىندارىن دا ازايتادى. بۇل – ەكىجاقتى كەلىسىمنىڭ، ورتاق مامىلەنىڭ جەمىسى. ءبىز مۇنداي جەتىستىككە تۇڭعىش رەت قول جەتكىزىپ وتىرمىز. ايتا كەتەتىن جاعداي، Flaynas الەمدەگى ءىرى ءارى بەدەلدى حولدينگ. ول كۇنىنە 130-دان استام ىشكى جانە حالىقارالىق رەيستەر بويىنشا جولاۋشىلار تاسىمالدايدى»، – دەپ مالىمدەدى دەلەگاتسيا جەتەكشىسى سەرىكباي قاجى ساتىبالدىۇلى.

بۇگىندە Flaynas حالىقارالىق اۋەكومپانياسى الەمنىڭ كوپتەگەن ەلدەرىنەن قاجىلار تاسىمالدايدى. اتاپ ايتقاندا، يندونەزيا، مالايزيا، ءۇندىستان، بالتىق جاعالاۋى ەلدەرى، افريكا، ورتا ازيادان تاجىكىستان، قىرعىزستان، قازاقستان قاجىلارىنا قىزمەت كورسەتەدى.

بيىلعى قاجىلىق ماۋسىمى قىركۇيەك ايىنىڭ 11-ىنەن باستالىپ، قازان ايىنىڭ 7-ىندە اياقتالادى. قازاقستان ازاماتتارى ءوز تاڭداۋلارى بويىنشا 17 نەمەسە 21 كۇن ىشىندە قاجىلىق پارىزىن وتەيدى.

ماتەريالدىق مۇمكىندىكتەرىنە وراي، ولارعا ءارتۇرلى دەڭگەيدەگى ستاندارت پاكەتتەر ۇسىنىلعان. قاجىلىق فيرمالاردىڭ ۇسىنعان ستاندارت پاكەتتەگى ءبىر ادامعا جۇمسالاتىن شىعىن 3200-3900 دوللاردى قۇرايدى.

اباي-اقپارات