قۇرىلىسشىلاردى كاسىبي مەرەكەسىمەن قۇتتىقتاعان ول وبلىس اكىمىنىڭ ورىنباسارى عالىمجان ءابدىرايىموۆ:
- جىل سايىن ەلىمىزدە، تۇرعىن ۇيلەر، وندىرىستىك، ءبىلىم بەرۋ، دەنساۋلىق ساقتاۋ جانە مادەني-تۇرمىستىق باعىتتاعى نىساندار پايدالانۋعا بەرىلىپ، ەسكىلەرى جاڭعىرتىلىپ، ماتەريالدىق-تەحنيكالىق بازاسى نىعايا تۇسۋدە. قۇرىلىس جۇمىستارىنا وزىق تەحنولوگيالار، ىلگەرى جاڭاشىلدىقتار مەن جاڭا كونسترۋكتورلىق شەشىمدەر ەنگىزىلۋدە. ەلىمىزدەگى قۇرىلىس سالاسىنىڭ دامۋىندا، وڭىرلەردىڭ الەۋمەتتىك-ەكونوميكالىق الەۋەتىن دامىتۋ ءۇشىن جاعداي جاساۋدا ەلباسىمىزدىڭ «نۇرلى جول»، «وڭىرلەردى دامىتۋدىڭ 2020» باعدارلامالارىن باسشىلىققا الامىز، - دەدى.

جيىن بارىسىندا وبلىستىق قۇرىلىس باسقارماسىنىڭ باسشىسى تەمىرلان بەكتاسوۆ بايانداما جاساپ، وبلىستاعى قۇرىلىس سالاسىنىڭ دامۋ جاعدايىنا توقتالىپ ءوتتى. ت. بەكتاسوۆتىڭ ايتۋىنشا، 2015 جىلى باسقارمانىڭ بيۋدجەتى 45,5 ملرد تەڭگەنى قۇراعان. اتاپ ايتقاندا، رەسپۋبليكالىق بيۋدجەتتەن 13,4 ملرد تەڭگە، جەرگىلىكتى قازىنادان 27,9 ملرد تەڭگە، ۇلتتىق قوردان 4,2 ملرد تەڭگە بولىنگەن.

سالتاناتتى باسقوسۋدا قازاقستان رەسپۋبليكاسىنىڭ جانە ورتا ازيانىڭ قۇرىلىسشىلار وداعىنىڭ ۆيتسە-پرەزيدەنتى امانجول شورماقوۆ، «اسك اۋىل قۇرىلىس» جشس ديرەكتورى اناتولي ريابينين ارىپتەستەرىن قۇتتىقتادى.

مۇنان كەيىنگى ماراپاتتاۋ راسىمىندە قۇرىلىس سالاسىنىڭ 11 مامانىنا «قازاقستان رەسپۋبليكاسىنىڭ قۇرمەتتى قۇرىلىسشىسى» توسبەلگىلى بەرىلدى. سول سياقتى بىرقاتار ازاماتتارعا وبلىس اكىمىنىڭ، ۇلتتىق ەكونوميكا مينيسترلىگىنىڭ، قازاقستان رەسپۋبليكاسىنىڭ جانە ورتا ازيانىڭ قۇرىلىسشىلار وداعىنىڭ، وبلىستىق قۇرىلىس باسقارماسىنىڭ العىس حاتتارى مەن قۇرمەت گراموتالارى تاپسىرىلدى.

سونىمەن قاتار وبلىس اكىمىنىڭ قۇرمەت گراموتاسىمەن «الماتى وبلىسىنىڭ ۇزدىك سىلاقشىسى، تاس قالاۋشىسى، تاس قاشاۋشىسى» اتالىمدارى بويىنشا وتكەن بايقاۋدىڭ جەڭىمپازدارى «يۋت - Com» جشس جۇمىسشىلارى مۇرات ناعاشپاەۆ، مەدەلحان قىستاۋباەۆ، باقداۋلەت ەسپولعانوۆ ماراپاتتالدى.

جالپى، بيىلعى جىلى الماتى وبلىسىندا 215 الەۋمەتتىك نىسان مەن تۇرعىن ۇيلەردىڭ قۇرىلىسى ءجۇرىپ جاتىر. ونىڭ 197-ءسىن وسى جىلى ىسكە قوسۋ جوسپارلانعان. ولاردىڭ 97-ءسى - تۇرعىن ءۇي، 32-ءسى - ءبىلىم بەرۋ نىسانى، 11-ءى - دەنساۋلىق ساقتاۋ نىسانى، 30-ى ينجەنەرلىك-كوممۋنيكاتسيالىق جۇيەلەر، 27-ءسى - الەۋمەتتىك نىساندار دەپ جازدى Baq.kz.

اباي-اقپارات