شىعىستاعى كورشى ەل - قىتاي ازاماتتارى قازاقستاننىڭ ەڭبەك نارىعىن جاۋلاۋدا. 2015 جىلدىڭ العاشقى جارتى جىلدىعىندا ولاردىڭ سانى شامامەن ەكى ەسەگە وسكەن. بۇل جونىندە ەڭبەك جانە الەۋمەتتىك دامۋ كوميتەتىنىڭ توراعاسى اقمادي سارباسوۆ مالىمدەدى.

ا. سارباسوۆتىڭ ايتۋىنشا، اعىمداعى جىلدىڭ ءبىرىنشى جارتىسىندا 38,3 مىڭ شەتەلدىك ازامات جۇمىسقا رۇقسات العان. سونىڭ ىشىندە 12,36 مىڭى — قىتاي ازاماتتارى. ياعني، قازاقستانداعى ءاربىر ءۇشىنشى شەتەلدىك جۇمىسشى قىتايدان كەلگەن. بۇل تۋرالى 7kun.kz سايتى حابارلادى.

وتكەن جىلى ولاردىڭ سانى 6,5 مىڭنان ءسال اسىپ تۇرعان ەدى. كوبىنە قحر ازاماتتارى قۇرىلىس، كەن ءوندىرۋشى ونەركاسىپتەردە جۇمىس ىستەيدى. كوميتەت توراعاسى قازاقستان زاڭناماسىنا سايكەس، قىتاي ازاماتتارىنا جۇمىسقا رۇقسات بەرۋدە سانىن شەكتەمەيتىنىن جەتكىزدى.

وقىرماننىڭ ەسىندە بولسا، 8 شىلدەدە قازاقمىسقا قاراستى اقتوعاي كەن ورنىندا 21 قىتايلىق جۇمىسشى كەن اسحاناسىندا توبەلەس شىعارعان ەدى. ونىڭ سالدارىنان 31 ادام زارداپ شەككەن بولاتىن. بۇل ءتىپتى ۇكىمەتتىڭ شۇعىل وتىرىسىنا سەبەپ بولعان-دى.

رەسمي ورگاندار بيىلعى جىلى اقپاندا قازاقستاندىقتاردىڭ جۇمىسسىزدار سانىن 460 مىڭ دەپ مالىمدەگەن بولاتىن. ال، ۆيتسە-پرەمەر بەردiبەك ساپارباەۆ وسى جىلدىڭ وزىندە داعدارىس سالدارىنان 120 مىڭ ادام جۇمىسسىز قالادى دەگەن بولجام ايتقان ەدى. الايدا، رەسمي ەمەس دەرەك قازاقستاننىڭ جۇمىسسىزدار سانى ميلليونعا تاياۋ ەكەنىن دە كورسەتەدى.

قازاقستان تاۋەلسىزدىك العاننان بەرى قاراي جۇمىسسىزدىقتى شەشۋگە ءتۇرلى باعدارلامالار قابىلداپ كەلەدى. «جول كارتاسى» اياسىندا قالا ورتالىقتارىندا بىرنەشە جىلدان بەرى ماماندار دايىندالۋدا. سوعان قاراماستان بۇل ماسەلە ءالى كۇنگە دەيىن شەشىلەر ەمەس. اتقارۋشى بيلىك كەيبىر تەحنيكالىق ماماندىقتارعا مامان جەتىسپەيتىنىن العا تارتادى. سولاي بولا تۇرا، جوو بىتىرگەن مامانداردىڭ ايتارلىقتاي بولىگى جۇمىسسىز قالىپ جاتادى. بۇعان ناقتى سەبەپ رەتىندە جۇمىس بەرۋشى مەن وقۋ ورىندارى اراسىندا ستۋدەنتتەردى قىزمەتكە ورنالاستىرۋ جايلى كەلىسىم جوقتىعى العا تارتىلادى.

بۇل ماسەلە جونىندە جاقىندا پارلامەنتتە دە ايتىلعان ەدى. ء«بارىمىز بىلەمىز، قازىر جوو-دارعا ستۋدەنتتەر قابىلداۋ مەن جاس ماماندار شىعارۋ شاراسى ءوتىپ جاتىر. بۇل رەتتە مەملەكەتتىك ءبىلىم گرانتتارىنىڭ ەكونوميكا قاجەتتىلىگىنە ساي بولىنبەيتىنى جىل سايىن قايتالانىپ وتىر»، – دەگەن وسى ماسەلەنى ماجىلىستە ارنايى كوتەرگەن دەپۋتات مەرۋەرت قازىبەكوۆا. ول اتاپ وتكەندەي، 2014 جىلى مەملەكەتتىك گرانتپەن ءبىتىرىپ شىققان 9 مىڭداي جوو تۇلەگى جۇمىسسىز قالعان. 

جاقىندا عانا قازاقستان بيلىگى بىرنەشە مەملەكەت ازاماتتارىنا قازاقستانعا ۆيزاسىز كەلىپ، 15 تاۋلىك جۇمىس ىستەۋىنە بولاتىن مۇمكىندىكتەر بەردى. شەتەلدەن كەلىپ جاتقان جۇمىس كۇشتەرىنىڭ ارتۋىمەن قوسا، ەلدەگى جۇمىسسىزدىق، قىمباتشىلىق، ۆاليۋتانىڭ قۇنسىزدانۋى دا ءوسىپ جاتقانىنا اسا ءمان بەرۋىمىز كەرەكتىگىن كرەسلوسى جۇمساق جاندار ەسكەرمەي جاتادى. بۇل ءوز كەزىگىندە جاڭاوزەندەگى سياقتى ەڭبەك داۋلارىنا اكەلىپ سوعۋى مۇمكىن. الداعى ۋاقىتتا ەل بيلىگى شەتەلدىك مامانداردى ەلگە جۇمىس ىستەۋگە ەمەس، ەل ازاماتتارىن وقىتۋ-تاربيەلەۋ، اعارتۋشىلىق جۇمىس ءۇشىن عانا شاقىرعانى دۇرىس دەپ ەسەپتەيمىز.

Abai.kz