جۇما, 29 ناۋرىز 2024
46 - ءسوز 4595 0 پىكىر 13 شىلدە, 2015 ساعات 12:42

«بيىل ورازا ۇستامايمىن...»

Abai.kz سايتىندا باس ءمۇفتي ەرجان قاجى مالعاجىۇلىنىڭ قاسيەتتى رامازان ايىمەن قۇتتىقتاۋى جاريالانعان. اۋىز بەكىتۋدىڭ ارتىقشىلىعى مەن ساۋابى جازىلىپ، ال ورازا ۇستاۋعا شاماسى كەلمەيتىن قاريالارىمىزدى، ناۋقاس جانداردى قايىرىمدىلىق جاساۋعا ۇندەگەن قۇتتىقتاۋ ماقالاعا وراي پىكىر ء(ماتىندى وزگەرىسسىز بەرىپ وتىرمىز – ا.ق.) بىلدىرگەن بەلگىسىز ءبىر كىسى: «بيىل ورازا ۇستامايمىن. تاماق قىمبات. دۇرىس اۋقاتتانباعاسىن ۇستاعان. ارجەردە قۇلاپ اشبۇراتىلىپ جۇرەتىن جاعدايىم جوق», – دەپتى (سۋرەتتى قاراڭىز).

راسىندا، ورازا – يماندى سىنايتىن ۇلى قۇلشىلىق ەكەن. بيىلعى شىلىڭگىر شىلدەنىڭ ىستىعى دا يماندى شايقالتقان سىڭايلى.

ءبىزدىڭ ايتايىن دەگەنىمىز باسقا بولاتىن. سوماليدە تۇراتىن ءبىر مۇسىلماننىڭ جازعان حاتى حاقىندا ەدى. ساۋد ارابياسىنىڭ شەيح-عالىمى ەفيردە كورەرمەندەر سۇراعىنا جاۋاپ بەرىپ جاتادى. باعدارلاما قوناعىنا ساۋال جولداعان سومالي مۇسىلمانى بىلاي دەيدى: «سارەسى مەن اۋىزاشاردا جەيتىن ەشتەڭە جوق. مۇنداي كەزدە ورازا ۇستاۋعا بولا ما؟» بۇعان جاۋاپ بەرە الماي، كوڭىلى بوساعان شەيح كوز جاسىنا ەرىك بەرىپتى (سۋرەتتى قاراڭىز).

كەيدە الدىمىزعا اس-سۋىمىز ۋاقىتىلى كەلمەي قالسا، سابىر، ءتوزىم، شۇكىر دەگەن ادامي قاسيەتتەردى «شەتكە ىسىرىپ» قويامىز. ال افريكاداعى اشارشىلىقتى ويلاساق، قازىرگى جاعدايىمىزعا قاراپ، شۇكىر ايتپاۋعا «شارا» جوق.

قازىر مەشىتتەردە جومارت جانداردىڭ دەمەۋشىلىگىمەن كۇن سايىن 500-600 ادامعا دەيىن اۋىزاشار بەرىلىپ كەلەدى. اۋىزاشار بەرۋشىلەر كوپ. بىراق يفتار ۇيىمداستىراتىن بوس كۇن جوق. قانداي عانيبەت! قۇدايعا شۇكىر، مولشىلىق زامان عوي. تىم بولماعاندا كۇندەلىكتى تىسكە باسار بىردەڭە تابىلادى. وعان دا ءتاۋبا دەيمىز.  

ال ەندى «تاماق قىمبات، اشپىن» دەپ قوڭىرقاي تىرشىلىگىمىز ءۇشىن ارتىق اۋىز ءسوز ايتىپ، «ورازا ۇستامايمىن» دەۋىمىز ۇيات-اۋ. ناپاقامىز بىرىنە جەتىپ، بىرىنە جەتپەي جاتسا، ول دا اللاعا شىنايى شۇكىرشىلىك ايتۋعا تۇراتىن تاعدىر ەمەس پە؟ دەنىمىز ساۋ، بالا-شاعا امان، اياق-قولىمىز ءبۇتىن دەگەندەي... ىزگى ادامدار باسىنا سىناق كەلگەندە: «بۇدان دا جامانى بولار ەدى عوي», – دەپ ءوزىن جۇباتادى ەكەن. بۇعان دا ساۋاپ جازىلماق.

پايعامبارىمىز مۇحاممەد (اللانىڭ وعان سالاۋاتى مەن سالەمى بولسىن): ء«مۇمىننىڭ ءىسى قانداي عاجاپ! راسىندا ونىڭ بارلىق امالى قايىرلى. بۇل – مۇمىننەن باسقاعا بۇيىرماعان باقىت. ەگەر ونىڭ باسىندا قۋانىش بولسا، اللاعا شۇكىر ەتەدى. سول ءۇشىن ساۋاپ-سىيعا كەنەلەدى. ەگەر وعان ءبىر سىناق كەلسە، وعان سابىر ەتەدى. وعان دا ساۋاپ الادى. اللانىڭ مۇسىلمانعا جازعان ءاربىر تاعدىرى قايىرلى», – دەپتى.

رامازاننىڭ بىتۋىنە دە ساناۋلى كۇندەر قالدى. قاسيەتى مەن قادىرى مول ايمەن قول بۇلعاپ، قوشتاسقالى تۇرمىز.

رامازان – يگى ىستەرىمىز بەن شالىس باسقان قادامدارىمىزعا، پەندەلىكپەن جاساعان قاتە-كەمشىلىكتەرىمىزگە ەسەپ بەرەتىن بەينە ءبىر بەلەس ايى ەكەن. رامازان – ومىرلىك جوسپار قۇراتىن مەجەلى ماۋسىم. رامازان – رۋحاني جاڭارۋ كەزەڭى.

رامازان – پاتشا مەن پاقىردى، باي مەن مۇقتاج ادامدى تەڭەستىرەتىن تەڭدىك ايى. رامازان – اعايىن اراسىن جاقىنداستىرا تۇسەتىن بىرلىك ايى.  رامازان – مەدرەسە ايى. رامازان – پەندەنىڭ كەۋدەسىنە ءتالىم مەن تاعىلىم، تاقۋالىق پەن يمان، مەيىرىم قۇيىلاتىن قۇلشىلىق ايى. رامازان – قوس دۇنيەنىڭ باقىت كىلتى – قۇران ايى. وسىلاي جالعاستىرا بەرۋگە بولادى.    

       

مورال وقىپ كەتتى دەمەڭىز. بىزدىكى – دىننەن ءبىر ناسيحات ايتۋ عوي. قاشان دا قايىرلى، ىزگى ىستەرىمىز قابىل بولعاي!

 

اعابەك قوناربايۇلى،

قمدب ءباسپاسوز ءبولىمىنىڭ مەڭگەرۋشىسى

0 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1584
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2284
عيبىرات

قايسار رۋحتى عازيز جان

مۇحتار قۇل-مۇحاممەد 3622