جاقىندا قايتا قۇرىلعان  «قازاق ۇلتتىق كەڭەسى» توراعاسىنىڭ ورىنباسارلارىنىڭ ءبىرى رەجيسسەر ەركىن راقىشەۆپەن سۇحبات:

- جاقىندا وتكەن «قازاق ۇلتتىق كەڭەسىنىڭ» جيىنىندا، ونى قايتا جانداندىرىپ، جاڭاشا قۇرۋ قاجەتتىلىگى جايلى ايتىلدى. جالپى ۇلتتىق كەڭەس وسى ۋاقىتقا دەيىن قانداي جۇمىستار اتقاردى؟

- ۇلت جاناشىرلارى مەن ۇلتشىل ازاماتتاردىڭ باستاماسىمەن «ۇلتتىق كەڭەس» وسىدان ءبىر جارىم جىل بۇرىن قۇرىلعان ەدى. وكىنىشكە وراي وسى ۋاقىت ارالىعىندا ەشتەڭە ىستەلمەدى دەسە دە بولادى. ونىڭ باستى سەبەبى قۇرىلتايدى ۇيىمداستىرۋشى باستاماشىل توپ پەن بەلگىلى ۇلتشىل ازاماتتاردىڭ كەڭەستىڭ كۇن تارتىبىنە شىعارىلعان ماسەلەلەرمەن كەلىسپەۋشىلىگى ەدى. كەڭەستە اسىعىس كوتەرىلگەن - ورىندالۋ تەتىكتەرى ايقىندالماعان،  ۇلتتىق-دەموكراتيالىق مەملەكەت قۇرامىز دەگەن سياقتى،  باستامالاردىڭ ىسكە اسپايتىنى سول كەزدە –اق بەلگىلى بولاتىن. اشىعىن ايتقاندا ناعاشىبايدىڭ كوكەسى ايتپاقشى «ۇيىرمەلىك» دەڭگەيدەن اسا المادىق. «ەشتەن كەش جاقسى»، دەمەكشى قازىر مۇحتار شاحانوۆ اعامىز «ۇلتتىق كەڭەستى» مىقتاپ قولىنا الىپ، قىزۋ جۇمىسقا كىرىسىپ كەتتى. بۇگىنگى كۇنى جانۇزاق اكىم، ايدوس سارىم، راسۋل جۇمالى سياقتى ۇلتجاندى ساياساتكەرلەر بىرىگىپ كەڭەستىڭ باعىت-باعدارلاماسىن دايىنداپ، ماقساتىن ايقىنداۋدا.

- سوندا، «ۇلتتىق كەڭەستىڭ»  ماقساتى قانداي بولادى؟

- جاڭا ايتتىم عوي قازىر ۇيىمداستىرۋ جۇمىستارى ءجۇرىپ جاتىر. قانشا ادام بولسا، سونشا پىكىر بولادى دەمەكشى اركىم ءوز ويلارىن ورتاعا سالۋدا. مەنىڭ ويىمشا   «ۇلتتىق كەڭەستىڭ»  باستى ماقساتى – قاراپايىم حالىقتىڭ مۇڭ-مۇقتاجىن جوقتاپ، مۇددەسىن قورعاۋ بولۋى كەرەك. ەڭ الدىمەن تۇرمىسى تومەن جانداردىڭ،  ءۇيسىز-كۇيسىز جۇرگەن باۋىرلارىمىزدىڭ، تاعدىردىڭ جازۋىمەن كەمتار بولىپ قالعان  جارىمجان-مۇگەدەكتەردىڭ الەۋمەتتىك جاعدايىن كوتەرۋ كەرەك. جۇمىسسىزدار مەن ستۋدەنت جاستارعا قامقور بولىپ، الاتىن زەينەتاقىسى كۇن كورىسىنە دە جەتپەيتىن قارتتارىمىزعا قارايلاسۋ بولادى. ول ءۇشىن الدىمەن اقيقاتتى تۋ ەتىپ، ادىلەتتى قوعام ورناتۋ قاجەت. ايتپەسە بيلىكتە وتىرعان ات توبەلىندەي عانا توپ، ودان قالسا ويدان-قىردان قاشقان كەلىمسەكتەر  بۇكىل قازاقتىڭ بايلىعىن يەمدەنىپ وتىر. ال، اتا-بابالارىنان امانات بولىپ قالعان بايلىقتىڭ، وسى جەردىڭ يەسى قازاقتار ءوز ەلىندە قايىرشىنىڭ كۇنىن كەشۋدە. بولدى، جەتەدى بيلىكتىڭ حالىقتى باسىنعانى! ءار نارسەنىڭ شەگى بار. اركىم ءوزىنىڭ نەسىبەسىن الۋى كەرەك. ەگەر بولاشاعىمىز جارقىن بولسىن دەسەك، اۋىزبىرشىلىك بولىپ حالىق ءبىر تۋدىڭ استىندا بىرىكسىن دەسەك، ۇلتتىق كەڭەس جۇمىسىن  الدىمەن ادىلەتتى قوعام ورناتۋدان باستاۋى ءتيىس.                                                                              

- ۇيىمنىڭ وسىنداي ماقساتىن، باعىت - باعدارلاماسىن ىسكە اسىرۋ جولدارى قانداي بولماق؟ 

- ادىلەتتى قوعام ورناتۋ، قوردالانىپ قالعان وزەكتى پروبلەمالاردى شەشۋدەن باستالادى. ەڭ الدىمەن  جوعارىدا ايتىلعان الەۋمەتتىك توپتاردىڭ تۇرمىس جاعدايىن كوتەرۋ قاجەت.  تاۋەلسىزدىگىمىزدى قورعاۋ،  قانداستارىمىزدىڭ ەلگە كەلۋى مەن  ازاماتتىق الۋلارىن جەڭىلدەتۋ، ۇلتتىڭ رۋحىن كوتەرىپ، رۋحاني قۇندىلىقتار مەن ءتىلىمىزدى تۇعىرىنا قوندىرۋ. حالىقتىڭ دەنساۋلىعى ءۇشىن سالاۋاتتى ءومىر سالتىن ناسيحاتتاۋ. سونىمەن قاتار قوعامدى جايلاعان جەمقورلىق، ازعىندىق سياقتى دەرتتەردىڭ تامىرىنا بالتا شاۋىپ، ادىلەتسىزدىكتەردى جويۋ. بولاشاعى بۇلىڭعىر ەۋرازيالىق وداقتان شىعۋ بولادى. بۇلاردان باسقا ۇلتتىڭ مۇددەسى ءۇشىن كوپتەگەن پروبلەمالاردىڭ شەشىلۋىنە ات سالىسامىز.

- ءبارى دە دۇرىس، ءبارى  دە سولاي ايتادى. بىراق، ايتقاندارىڭىزدى ىسكە اسىرۋ جولدارى قانداي؟

- ەڭ باستىسى ءبىزدىڭ نيەتىمىز ۇلتقا قىزمەت ەتۋ. ۇلت جاناشىرلارىنىڭ باسقالاردان ايىرماشىلىعى دا سوندا. ءبىز «ۇلتتىق كەڭەستى» پروبلەمالاردى ايتۋ ءۇشىن ەمەس، شەشۋ ءۇشىن قۇردىق.  وعان كۇمانىڭ بولماسىن. مىسالى، ءبىر پروبلەمانى الايىق. ء«بىلىم ساپاسى تومەن، جازىلعان وقۋلىقتار سىن كوتەرمەيدى، جاسالىپ جاتقان رەفورمالاردان ەشقانداي ناتيجە جوق»،- دەيمىز. ەندى ونى قالاي شەشۋگە بولاتىنىن قاراستىرايىق. ول ءۇشىن الدىمەن وسى سالانى زەرتتەپ جازىپ جۇرگەن مامانداردى، تاجىريبەلى مۇعالىمدەر مەن جوو وقىتۋشىلارىن تاعى باسقا وسى سالاعا قاتىستى ادامداردى جيناپ دوڭگەلەك ۇستەل وتكىزىپ، پروبلەمانى كوپشىلىكتىڭ تالقىسىنا سالامىز. ونى جان-جاقتى تالقىلاپ، تۇبەگەيلى زەرتتەپ، شەشۋدىڭ ءتيىمدى جولدارىن قاراستىرامىز. الدىن الا باق بەتتەرىمەن الەۋمەتتىك جەلىلەر ارقىلى وسى ماسەلە توڭىرەگىندە كىمنىڭ قانداي    وي-پىكىرى، ۇسىنىسى بار ەكەنىن بىلەمىز. تۇسكەن ۇسىنىستار مەن پىكىرلەردى سارالاپ، ءبىر جۇيەگە كەلتىرىپ ناقتى ۇسىنىستار دايارلاۋ ءۇشىن جۇمىسشى توبىن قۇرىپ، جاۋاپتى ادامدار بەكىتەمىز.            

- پروبلەمانىڭ بارى باسى اشىق ماسەلە، ەندى ونى شەشۋدىڭ ناقتى جولدارى قالاي بولادى؟

- وتە ورىندى سۇراق. بىزدە ۇلتشىل ازاماتتاردىڭ دا، بيلىكتىڭ دە كەمشىلىگى سول، ءبىر ءىستى باستاپ، ونى اياعىنا جەتكىزۋگە كەلگەندە، ءتۇرلى سەبەپتەرمەن تۇرالاپ جاتادى. مىسالى ۇلتشىلدار ەۋرازيالىق وداق تاۋەلسىزدىگىمىزگە قاۋىپ توندىرەدى، ءبىز وعان قارسىمىز دەدى، بىراق ول قارسىلىق ءبىر-ەكى جيىن وتكىزىپ، باق بەتتەرىندە ماقالالار جاريالاۋمەن عانا شەكتەلدى. بۇل جەردە زاڭ اياسىنان شىقپاي-اق ءتۇرلى ءىس-شارالارىن وتكىزىپ، بيلىككە ەۋرازيالىق وداققا كىرمەۋگە ىقپال ەتۋگە بولاتىن ەدى. بىراق ول جايلى ەشقانداي جوسپار جاسالىنباي، جۇيەلى تۇردە جۇمىس جۇرگىزىلمەدى. لەنين ايتپاقشى: «بالالىق اۋرۋدان» ارىلا الماي كەلەمىز. ناتيجەسىندە ەلىمىزدىڭ تاۋەلسىزدىگىن ءبىر قۇدايدان تىلەپ قانا وتىرمىز. بيلىك تاراپىنان دا جاقسى يدەيالار ۇسىنىلىپ، باعدارلامالار قابىلدانىپ، رەفورمالار جاسالىنىپ جاتادى. بىراق سولاردىڭ ورىندالۋىنا كەلگەندە جاۋاپكەرشىلىكتەن جالتارىپ، كوزبوياۋشىلىققا سالىنادى. حالىقتىڭ مۇددەسىنەن گورى قاراباستارىنىڭ قامىن ويلاپ كەتەدى. ال ءبىز نە ىستەيمىز؟ ەڭ باستىسى پروبلەمانىڭ بار ەكەنىن، ونى قالاي شەشۋگە بولاتىنىن انىقتاپ الدىق. ەندى بار كۇشتى وسىنىڭ جۇزەگە اسۋىنا سالامىز. ول ءۇشىن   ۇكىمەتكە، پارلامەنتكە ۇسىنىستارمەن شىعىپ، ولارعا ونى شەشۋدىڭ ءتيىمدى  جولدارىن ناقتى دالەلدەرمەن ءتۇسىندىرىپ، ورىندالۋىن تالاپ ەتەمىز.    

- ولار سىزدەردى قابىلداي قويا ما؟ ۇسىنىستى «قاراستىرامىز، ويلاستىرامىز» دەپ شىعارىپ سالادى عوي.

- ءبىز حات جازبايمىز، ولارمەن بەتپە-بەت وتىرىپ سويلەسەمىز. جەتەدى، قاراپايىم - مومىن حالىقتى الداپ باسىنعاندارى!  ەگەر «قابىلداي المايمىز، ۋاقىتىمىز جوق» دەگەن سىڭايلى سىلتاۋ ايتاتىن بولسا ولارعا كىمنىڭ ارقاسىندا، نە ءۇشىن وتىرعاندارىن ەستەرىنە سالامىز. حالىقتىڭ ارقاسىندا نان جەپ وتىر ما، حالىقتىڭ تالاپ-تىلەكتەرىنە قۇلاق اسسىن! ءبىز حالىقتىڭ وكىلدەرىمىز! ءار پروبلەمانىڭ شەشىلۋىن قاتاڭ باقىلاۋعا الىپ، قاداعالايمىز. ايتپەسە، بۇلار ۇلتتىڭ الدىندا ەشقانداي جاۋاپكەرشىلىكتى سەزىنبەيدى. ءبىلىم سالاسىندا جىلدا جاسالىپ جاتقان رەفورمالاردىڭ ماقساتى ءبىلىم ساپاسىن ارتتىرۋ ەمەس، اقشا جەۋ  بولىپ وتىر.  وقۋلىقتاردا كەتكەن قاتەلىكتەر ايتىلا-ايتىلا جاۋىر بولدى.  وعان ءمان بەرىپ، تۇزەۋگە بيلىك قۇلىقسىز. ءتىپتى، وقۋلىقتاردا «جانۋارلار مەن وسىمدىكتەردى بۋدانداستىرۋ كەرەك»، دەگەن دە سويلەمدەر ءجۇر. ماسقارا! ەڭ سوراقىسى كىنالىلەرگە شارا قولدانىپ جاۋاپقا تارتىپ جاتقان ەشكىم جوق.  ال ءبىز بۇنداي ۇلتتىڭ بولاشاعىن ساۋداعا سالعان، ار-ۇياتتان جۇرداي بولىپ جەمقورلىققا بەلشەسىنەن باتقان بيلىكتى تاۋبەسىنە كەلتىرەمىز. جاۋاپتى ادامداردى انىقتاپ، كىنالىلەردى جازالاپ، قىلمىسكەرلەردى سوتتاتامىز. ادىلەتتى قوعام ورناتامىز.        

- نەگە سىزدەر ادىلەتتى قوعام ورناتۋدى باستى ماقسات ەتىپ وتىرسىزدار؟ بۇدان باسقا دا ماڭىزدى ماسەلەلەر بار ەمەس پە؟ مىسالى، بۇگىنگى تاڭداعى الەمدى دۇرلىكتىرىپ وتىرعان لاڭكەستىك سياقتى باستى پروبلەمالار شە؟

- تاۋەلسىزدىك ءۇشىن كۇرەسكەن قازاقتىڭ سوڭعى حانى كەنەسارى قاسىمۇلى «مەن ورىس حالقىمەن ەمەس، مەن رەسەي مەملەكەتىمەن ەمەس، مەن  ادىلەتسىزدىككە قارسى سوعىسىپ جاتىرمىن»،- دەگەن ەكەن.  ادىلەتتى قوعامدا ءومىر ءسۇرۋ - ادامزات بالاسىنىڭ باستى ارمانى، مەملەكەتتىڭ دامۋىنىڭ باستى كورسەتكىشى. الەمدە بولىپ جاتقان بارلىق ءتۇرلى-ءتۇستى توڭكەرىستەردىڭ نەگىزگى  سەبەبى، بيلەۋشى توپتىڭ جۇرگىزىپ وتىرعان  ادىلەتسىز ساياساتىندا  جاتىر. لەنيننىڭ جەر شارۋالارعا، زاۆود فابريكا جۇمىسشىلارعا دەگەن ۇرانىنىڭ استارىندا دا، ادىلەتتى قوعام ورناتامىز دەگەن وي جاتىر. سول سياقتى ءبىز داميمىز، وركەنيەتتى ەل بولامىز دەسەك، ەڭ الدىمەن ادىلەتتى قوعام ورناتۋىمىز كەرەك.
  ال، لاڭكەستىككە كەلەتىن بولساق ەلباسى  ءبىر سوزىندە «ەلىمىزدىڭ بىرتۇتاستىعىنا ەڭ قاۋىپتىسى راديكالدى باعىتتاعى جات ءدىني اعىمدار» دەپ ايتىپ ەدى. پرەزيدەنتتىڭ ءوزى وسىلاي دەپ ايتىپ وتىرعاننان كەيىن بۇنىڭ جاي ايتىلا سالعان ءسوز ەمەس ەكەنى انىق. سوندا مۇنىڭ استارىندا ءبىز بىلمەيتىن نە جاتىر؟ وسىعان تالداۋ جاساپ كورەلىك.  بىزدەر باتىس پەن رەسەيدىڭ اقپاراتى ارقىلى يسلامشىلار جايلى ولار لاڭكەستەر، سودىرلار، جابايى-ۆارۆارلار دەگەندەرىن عانا بىلەمىز. سول يگيل - يسلام مەملەكەتى از ۋاقىتتىڭ ىشىندە كۇشەيىپ الدى. قولداۋشىلارى الەمنىڭ تۇكپىر-تۇكپىرىنەن اعىلۋدا. سونىمەن قاتار بارلىق ەلدەردە استىرتىن ۇيىمدارى اشىلىپ، جاقتاستارى كۇن ساناپ كوبەيۋدە. ونىڭ سەبەبى نەدە دەپ ويلايسىز؟ سەبەپ - ولاردىڭ يدەياسىنىڭ مىقتىلىعىندا. يسلامشىلار حالىققا: «سەندەردىڭ تۇرمىستارىڭنىڭ ناشار بولىپ، قيىندىقتا ءومىر سۇرۋلەرىڭە كىنالى امەريكاندار نەمەسە ەۆرەيلەر ەمەس باستى كىنالى - جەمقورلىققا باتقان جەرگىلىكتى ادىلەتسىز بيلىك. سوندىقتان  ءبىز ولاردىڭ سازايىن بەرىپ  ادىلەتتى قوعام ورناتامىز»،- دەيدى. مىنە، اڭگىمە قايدا جاتىر؟ سول سەبەپتى دە بۇكىل الەمدە ولاردىڭ يدەيالارىن قولداۋشىلاردىڭ سانى ارتۋدا. ەرتەڭگى كۇنى ولار وسى ۇستانىمدارىمەن بىزگە دە جەتەدى. ء«بىز سەندەردىڭ ەلدەرىڭدى جاۋلاپ المايمىز. بەس ۋاقىت نامازدارىڭدى وقىپ جۇرە بەرسەڭدەر باقۋاتتى ءومىر سۇرەسىڭدەر. سەندەرگە قيانات جاساپ وتىرعان ادىلەتسىز بيلىكتەرىڭنىڭ كوزىن جويامىز»،- دەسە، نە دەيمىز؟ جووق، ءبىزدىڭ بيلىك ادىلەتتى، حالىقتىڭ بايلىعىن تالان-تاراجعا سالعان جوق دەپ ايتاتىن ادام تابىلا ما؟ ياعني، جات ءدىني اعىمداردىڭ ءبىزدىڭ ەلىمىزگە قاتەر توندىرۋىنە ءبىر جاعىنان بيلىكتىڭ ءوزى دە كىنالى.    «قۋىرداقتىڭ كوكەسىن تۇيە سويعاندا كورەسىڭ» دەمەكشى، كۇنىن كورە الماي جۇرگەن قازاقتىڭ  جارتىسىنان استامى ولاردى قولداپ شىقپايتىنىنا كىم كەپىل؟ قالعاندارى قورىققانىنان قولدايدى. قولداماعانداردىڭ باستارىن الادى. كەرەك پە بىزگە وسىلاي ورناتىلعان ادىلەتتىلىك؟ ەرتە مە، كەش پە ادىلەتتى قوعام قازاق دالاسىندا ءبارىبىر ورنايدى. ونى بەيبىت جولمەن نە ءوزىمىز ورناتامىز، نە باسقالار كۇشپەن ورناتادى.    

- مۇمكىن بيلىك ادىلەتتى قوعامدى ءوزى ورناتاتىن شىعار؟ رەفورما جاسايمىز دەپ 100 قادام دەگەن باعدارلاما ەنگىزىپ جاتىر عوي.

- بيلىك بۇگىنگە دەيىن مۇنايدان تۇسكەن تابىسقا ءماز بولىپ ماقتانىپ «كەرەمەتپىز» دەپ كەلدى. تۇسكەن قارجىنى ونەركاسىپتى دامىتۋعا جۇمساۋدىڭ ورىنىنا  داراقىلىقپەن شاشىپ، تالان –تاراجعا سالدى. ەندى مۇنايدىڭ باعاسى ەكى ەسەگە  ءتۇسىپ كەتىپ ەدى بەيشارا بولدى دا قالدى. بيۋدجەتكە ەشقانداي كىرىس جوق، تەك شىعىن. بولاشاققا دەپ جيناعان ۇلتتىق قور كۇننەن-كۇنگە ازايۋدا. ونىڭ ۇستىنە «جارىلقايدى» دەگەن رەسەيدىڭ ءتۇرى اناۋ. جان-جاقتان سانكتسيالار قىسىپ، ءرۋبلى قۇلدىراپ، سوعىسقا دايىندالىپ جاتىر. وداق بولعان سوڭ ولارداعى جاعداي ەرتەڭ بىزگە دە كەلەتىنى تۇسىنىكتى جايت. وسىنداي جاعدايدا بيلىك 100 قادام تۇگىلى 1000 قادام جاساسا دا ەشتەڭە وزگەرمەيدى. ادىلەتتى  قوعامدى ورناتۋعا بۇگىنگى بيلىكتىڭ ەرىك-جىگەرى، قاۋقارى جەتپەيدى. مەن سەنەر ەدىم ولارعا، ەگەر حالىقتان ۇرلاپ، توناعان ميللياردتارىن وزدەرىنە قايتارىپ بەرسە. «ادام بول» جۋرنالىنىڭ سوڭعى نومىرلەرىنىڭ بىرىندە جاريالانعان، اقوردادان شىققان قۇپيا قۇجاتتارعا سەنسەك، جاعداي ۋشىعىپ كەتەتىندەي بولسا، ءبىزدىڭ بيلىك قىتايعا قاشۋعا قامدانىپ جاتقان كورىنەدى. - ولاي بولسا جەتىسكەن ەكەنبىز. سوندا حالىق قايدا قالادى؟ تىعىرىقتان شىعاتىن جول قانداي؟ - سول ءۇشىن دە بيلىك الدىمەن ساياسي رەفورما جاساۋى قاجەت. ۇلتجاندى ازاماتتاردىڭ بيلىككە كەلۋىنە، حالىقتىڭ مۇڭ-مۇقتاجىن جوقتاپ، مۇددەسىن قورعاۋىنا كەدەرگى جاساماي، قايتا قولداپ وتىرۋى كەرەك. ايتپەسە، ەرتەڭ جات ءدىني اعىمدار ءدىندى ساياسي ماقساتتارىنا پايدالانۋ ارقىلى حالىقتى ايتقانىنا كونىپ، ايداۋىنا جۇرەتىن توبىرعا اينالدىرۋى مۇمكىن. مىڭداعان ءۇيسىز-كۇيسىز جۇرگەن، مەملەكەتتىڭ كومەگىنەن كۇدەر ۇزگەن جانداردى الداپ-ارباۋ ارقىلى وزدەرىنىڭ قول شوقپارىنا اينالدىرادى. باسى بىرىكپەگەن ەشقانداي ۇستانىمى جوق جاستار سولاردىڭ جەتەگىندە كەتەدى. ەلىمىزدىڭ تىنىشتىعى بۇزىلىپ، ۇلتتىق قۇندىلىقتاردان ايىرىلامىز. سول ءۇشىن دە، ۇلت جاناشىرلارى مەن ۇلتشىل ازاماتتار بىرىگىپ، ءبىر جاعادان باس، ءبىر جەڭنەن قول شىعارىپ، ۇلتتىڭ بولاشاعى ءۇشىن ادىلەتتى قوعام ورناتۋىمىز كەرەك.                                                                                                       

- «ۇلتتىق كەڭەسكە» كىمدەر مۇشە بولا الادى؟                                                         

-قازىر ۇيىمداستىرۋ جۇمىستارى جۇرگىزىلىپ جاتقان سوڭ، وعان كىمدەر مۇشە بولا الادى، ولار نە ىستەيدى، مىندەتتەرى قانداي بولاتىنى ايقىندالۋدا. بولاشاقتا ۇلتتىق كەڭەس مۇحتار اعامىزدىڭ تىركەلمەگەن «حالىق رۋحى» پارتياسىنىڭ نەگىزىن قالاۋى دا مۇمكىن. ول جايلى دا ويلار بار.   ال، قازىر بىزگە جۇرەگى «ۇلتىم» دەپ سوققان قازاقتىڭ بولاشاعىنا نەمقۇرايدى قاراي المايتىن بەلسەندى ازاماتتار كەرەك. ءبىز وسىنداي ۇلتىن بار جان-تانىمەن سۇيەتىن ۇلت جاناشىرلارى قولداعاندا  عانا ماقساتىمىزعا جەتەمىز. اقىن جاركەن بودەش اعامىز:                         

كوكىرەكتەگى وتتاي ىستىق جۇرەكتى،                                                                                       
ءبىر جاپىراق ءتىرى ەتتى -                                                                                               
سوقپاسا ۇلتىم دەپ، جۇرتىم دەپ،                                                      
لاقتىردىم يتىمە ەسىگىمدى كۇزەتكەن،                                                                                 
ءيتىم ارتىق ەمەس پە ونداي ماڭگۇرت جۇرەكتەن،- دەپ جىرلاعانداي بويىندا تەكتى قازاقتىڭ قانى بار، نامىسى مەن ارى بار، ۇلتشىل ازاماتتارعا سەنەمىز جانە سولارعا ارقا سۇيەيمىز!

ۇلتى ءۇشىن قىزمەت ەتكىسى كەلەتىن تىلەكتەس ازاماتتار فەيسبۋكتاعى م.شاحانوۆ اعامىزدىڭ پاراقشاسىنا حابارلاسۋىنا بولادى.

سۇحباتتاسقان تالعات جانىسباي

Abai.kz