ءبىزدىڭ قوستاناي وبلىسى ونەر تارلاندارىنان كەندە ەمەس. تالانتتار اسىرەسە بيلىك باسىندا ءورىپ ءجۇر دەسەك ارتىق ايتقاندىق بولماس. وبلىسىمىزدىڭ بۇرىنعى اكىمى نۇرالى سادۋاقاسوۆ كورشى رەسەيدەن تالاي انشىلەر مەن بيشىلەردى قايتا-قايتا قولقالاپ ءجۇرىپ شاقىرىپ الاتىن دا، استىنا ات، ۇستىنە شاپا جاۋىپ ءماز-ءمايرام بولاتىن.

سوسىن بيشىلەرمەن مىڭ بۇرالا بي بيلەپ، انشىلەرىمەن گيتاراعا قوسىلىپ ءان شىرقاپ، ءاي ءبىر شالقىپ قالاتىن. ورىستىڭ حالىق اندەرىن كەمەلىنە كەلتىرىپ ورىنداعاندا وسىنداعى ورىستانىپ كەتكەن جۇرتتىڭ توبەسى كوككە ءبىر ەلى جەتپەي قالعانداي كورىنەتىن. وعان دا كىنا جوق شىعار، ءوزى ورىس مەكتەبىن بىتىرسە، جوعارى ءبىلىمدى ماسكەۋدە السا، جان-جارىن سول جاقتان ەرتىپ كەلسە. تالانتىنا تاڭ بولعانىم سونشالىق، الىستا جاتقا قازاق اۋىلىندا وسكەن مەن دە كەي-كەيدە «وي، موروز» دەپ اندەتىپ كەتكىم كەلەتىن. (قالجىڭ عوي).

 «باقساق، باقا ەكەن» دەگەندەي تالانتتى تەك بۇرىنعى اكىمىز عانا ەمەس ەكەن. انشىلىك پەن سازگەرلىك ونەردەن وبلىمىسىمىزدى ىشكى ىستەر دەپارتامەنتىنىڭ باسشىسى تىلەگەن ماتكەنوۆ دە كەندە ەمەس كورىنەدى. وتكەندە وسى گەنەرالدىڭ ۇيىنە ۇرى ءتۇسىپ باعاسىن ايتۋعا اۋىز بارمايتىن شۆەتساريالىق اسا قۇندى ساعاتتارىنىڭ قولدى بولعاندىعىن جازعانبىز. گەنەرال بولسا «ويباي، ول ساعاتتار مەنىكى ەمەس» دەپ ازار دا بەزەر بولعان. دەي تۇرعانمەن، جەرگىلىلىكتى جۋرناليستەردىڭ ء«باسپاسوز ءماسليحاتىن وتكىزىپ ءبىزدىڭ سۇراقتارىمىزعا جاۋاپ بەرسەڭىز قايتەدى» دەگەن وتىنىشىنە الدىمەن كەلىسىپ، كەيىن ۋادەسىنەن تايقىپ كەتكەندىگىن دە جازعانبىز. سويتسەك، ءبىز گەنەرالدى بوسقا جازعىرىپپىز. سويتسەك ول كىسى جوعالعان قىمبات ساعاتتارىن ەمەس، كوپشىلىك اۋىزدان تاستاماي ايتىپ جۇرەتىن، سانداعان جىلدار بويى حالىق ساناسىندا جاتتالىپ قالاتىن ءان شىعارامىن دەپ كۇندىز-ءتۇنى شىعارماشىلىق ازاپ تارتىپ جۇرگەن ەكەن. ول تالانتىن سىرت كوزدەن وتە قۇپيا ۇستاپتى. الايدا  التىن كەزدىك قاپ تۇبىندە جاتا ما، كۇندىز-كۇلكى، تۇندە ۇيقىدان ايرىلىپ ءوزى شىعارعان ءانى كورشى رەسەيدە كەڭىنەن قالىقتاپتى. گەنەرالدىڭ ءسوزىن دە، ءانىن دە ءوزى جازعان «نەگاسيمايا ليۋبوۆ» دەگەن شىعارماسى وسى ەلدەگى ورىنبور قالاسىندا رەسەي فەدەراتسياسى ىشكى ىستەر ورگاندارى قىزمەتكەرلەرى كۇنى—10 قازاندا سالتاناتتى كونتسەرتتە ورىندالىپتى. وسىنداعى بەگىلى ءانشى ازامات يبراەۆتىڭ كەمەلىنە كەلتىرە ورىنداعان ءانى رەسەيلىك ءتارتىپ ساقشىلارىنا ۇناعانى سونشالىق، زالداعى وتىرعان تالاي ەركەكتەر كوزىنە جاس العان كورىنەدى. گەنەرالدىڭ اسىرەسە ءوزىنىڭ جان سەرىگىنە ارنالعان ماحابباتىن «يا ۆ كوبۋرە سۆوەي تاك چاستو ەە زاپيسكي ناحوديل» دەگەن سوزدەرىنە بالقىماعان ايەل قالماعان دەسەدى.

    ءبىزدىڭ باس پوليتسەيىمىز «سەگىز قىرلى، ءبىر سىرلى» اتانىپ، مۋزىكا سالاسىندا وزىندىك ورنەك قالدىرعاندىعىنا بەك قۋانىشتىمىز، ارينە. الايدا وسىنداي «تاماشا» ءاننىڭ سالتاناتتى تۇساۋكەسەرى وسى قوستاناي توپىراعىندا نەگە وتپەگەندىگىنە وكپەمىز قارا قازانداي. ال، كۇنى ەرتەڭ وسىنداي تالانتىمىزدى كورشىمىز قالاپ الىپ كەتسە قايتەمىز؟ پوليتسيامىزدىڭ داڭقىن شىعاراتىن اندەردى كىم شىعارادى؟ سوسىن، بۇل گەنەرالدى دەرەۋ كومپوزيتورلار وداعىنا مۇشە ەتىپ قابىلداپ، اۆتورلىق قۇقىقتى بەرىك ساقتاۋىمىز كەرەك. ينتەللەكتۋالدىق مەنشىك كورشىمىزگە جەم بولماسىن.

   قاراپ وتىرساق، كەيىنگى كەزدەرى «وبلىسىمىزدا قىلمىس، اسىرەسە ۇرلىق-قارلىق ەرەكشە بەلەڭ الىپ كەتتى، پوليتسيامىز ونىمەن كۇرەسۋگە دارمەنسىز» دەگەن ەشبىر نەگىزسىز ايىپتاۋلار تىم كوبەيىپ كەتتى. كەيبىر شولاق ويلىلار  «گەنەرال ماتكەنوۆ قايدا قاراپ وتىر؟»  دەگەن ورىنسىز سوزدەر ايتادى. قازاق دەگەن وسى. تالانتتى كورە المايدى. وۋ، شابىتقا بەرىلىپ، تالاي-تالاي تاماشا اندەر شىعارام دەپ شىعارماشىلىق ازاپقا ءتۇسىپ جۇرگەن بولاشاق ۇلى كومپوزيتورىمىزدى قايداعى ءبىر ۇرىنى ۇستامادىڭ، قىلمىستى قۇرىقتامادىڭ دەپ كىناالاۋ تازا كورەالماۋىشىلىق. تالانتىمىزدى قادىرلەي بىلەيىك، اعايىن. كەيىن وكىنىشتەن بارماق تىستەپ قالماس ءۇشىن.

    «كەزىندە ەسكەرتپەدىڭ، قايدا قالدىڭ»  دەپ ماعان وكپەلەپ جۇرەرەسىڭدەر.

تالانتتارعا دەگەن ۇلكەن قۇرمەتپەن،

مۇراتبەك داۋرەنۇلى.

قوستاناي.

Abai.kz