تۇركىستان قالاسى 5 مىڭ ءتۇپ جاسىل جەلەكپەن تولىقتى

تۇركىستان قالاسىندا «جاسىل ەل» باعدارلاماسى اياسىندا ۇلى وتان سوعىسىندا قازا بولعانداردى ماڭگى ەستە ساقتاۋ ماقساتىندا «جەڭىس ورمانى» اكتسياسى ءوتتى. قالاداعى مەملەكەتتىك مەكەمە قىزمەتكەرلەرىنىڭ قاتىسۋىمەن وتكەن جاسىل جەلەك وتىرعىزۋ شاراسى شاھار شەتىندەگى «پاراسات» ساياباعىندا ۇيىمداستىرىلدى، - دەپ حابارلايدى وقو اكىمىنىڭ ءباسپاسوز قىزمەتى.

سوڭعى جىلدارى قالا اۋماعىنىڭ ۇلعايۋىنا بايلانىستى شاھارداعى «پاراسات» ساياباعىن كوگالداندىرۋ جۇمىستارى قولعا الىنعان بولاتىن. جەرگىلىكتى تۇرعىندارعا جاڭا دەمالىس ايماعىن قالىپتاستىرۋ ماقساتىندا جاسالعان ىستەر ناتيجەسىندە، قازىرگى تاڭدا، مۇندا اعاشتار جايقالىپ، اتالعان ساياباق تۇركىستانداعى سايالى ورىنداردىڭ بىرىنە اينالىپ ۇلگەردى. «پاراسات» ساياباعىنىڭ كولەمىن ارتتىرىپ، كوگالداندىرۋ ءۇشىن قالا اكىمى ءا.وسەرباەۆتىڭ تاپسىرماسىمەن شارا اياسىندا ارىقتار تارتىلىپ، تاعى دا 2,5 مىڭ ءتۇپ اعاش كوشەتتەرى وتىرعىزىلدى.

اعاش وتىرعىزۋ شاراسى شاھارعا قاراستى بارلىق اۋىلدىق وكرۋگتەردە دە ۇيىمداستىرىلدى. سونىڭ اياسىندا تۇركىستاندا جالپى سانى 5 مىڭعا جۋىق اعاش كوشەتتەرى وتىرعىزىلىپ، قاسيەتتى وڭىردەگى جاسىل بەلدەۋ كولەمى ارتا ءتۇستى.

وڭتۇستىكتىڭ ەسكەكشىلەرى ازيا چەمپيوناتىندا بەس التىن يەمدەندى

ءوڭىرىمىزدىڭ سپورتشىلارى تاعى ەرلەدى. يندونەزيادا وتكەن بايداركا مەن كانوەدا ەسۋ سپورتىنان جاستار مەن ەرەسەكتەر اراسىندا وتكەن ازيا چەمپيوناتىندا وتانداستارىمىز 9 التىن، 8 كۇمىس، 2 قولا مەدالدى ەنشىلەسە، سونىڭ 5 التىن، 5 كۇمىس جانە 1 قولا مەدالى وڭتۇستىكقازاقستاندىق سپورتشىلاردىڭ قورجىنىندا، - دەپ حابارلايدى وقو اكىمىنىڭ ءباسپاسوز قىزمەتى.

اتاپ ايتساق، 1000 مەترلىك ەكەۋلىك بايداركادا جەرلەستەرىمىز – ە.الەكسەەۆ سىنعا ءتۇسىپ، توپتى جارسا، 200 مەترلىك جۇپتىق بايداركادا ەرلەر اراسىندا و.ياننيتسكي، ايەلدەر اراسىندا ن.پودوينيكوۆا جانە ن.سەرگەەۆا، ال جاستار اراسىندا ا.بوريسوۆ پەن گ.ارتەمەۆ التىننان القا تاعىندى.  ەرلەر اراسىندا ت.حايداروۆ 200 مەترلىك كانوەدا جەڭىس تۇعىرىنان كورىندى.

سونىمەن قاتار، كۇمىس جانە قولا جۇلدەگەرلەردىڭ ىشىندە جەرلەستەرىمىز – ا.الشانسكي،  ن.سەرگەەۆا، ي.پودوينيكوۆا، يۋ.بەرەزينتسەۆ، س.مولينا جانە اعايىندى ەمەليانوۆتار دا بار.ءسويتىپ، الەم جانە ازيا بىرىنشىلىكتەرىنەن ۇلتتىق قۇراما سپورتشىلارى ريو وليمپياداسىنا 7 جولداما السا، ونىڭ 4-ءۋى وڭتۇستىكتىكى. 

ەسكە سالا كەتەيىك، قاراشا ايىنىڭ باسىندا وڭىرىمىزدە بايداركا جانە كانوەدا ەسۋدەن وقۋ جاتتىعۋ بازاسىنىڭ سپورت عيماراتى اشىلعان بولاتىن. 130 ادامعا ارنالعان وقۋ جاتتىعۋ ورنى ەلىمىزدە تەڭدەسى جوق امبەباپ كەشەن بولىپ تابىلادى.

وقو ورىس دراما تەاترى ماسكەۋدە وتەتىن حالىقارالىق فەستيۆالگە قاتىسادى

وڭتۇستىك قازاقستان وبلىستىق ورىس دراما تەاترى ماسكەۋ قالاسىندا يۋ.پولياكوۆتىڭ زاماناۋي شىعارمالار جەلىسى بويىنشا وتەتىن «سموترينى» ءى حالىقارالىق فەستيۆالىنە قاتىسادى، - دەپ حابارلايدى وقو اكىمىنىڭ ءباسپاسوز قىزمەتى.

1-17 قاراشا كۇندەرى وتەتىن فەستيۆالگە وبلىستىق ورىس دراما تەاترى يۋ.پولياكوۆتىڭ «ودنوكلاسسنيكي» دراماسىن ۇسىنباق. رەسەيدىڭ ەڭبەك سىڭىرگەن قايراتكەرى، رەجيسسەر سۋلتان نازيروۆيچ ابديەۆتىڭ ساحنالاۋىنداعى بۇل قويىلىم ءتۇرلى تەاترلىق جانرلاردى قامتي وتىرىپ، ادام ءومىرىنىڭ سان قيلى تاراۋلارىن كورەرمەنگە شىنايى جەتكىزەدى.

ادامدىق پەن ادالدىقتىڭ، قاتالدىق پەن  سۇمدىقتىڭ شىنايى كورىنىسى، سىنىپتاستاردىڭ 20 جىلدان كەيىنگى ءبىر داستارحان باسىندا جينالۋى بارىسىندا ايقىن بايقالادى. ايتا كەتەيىك، وڭتۇستىك تەاتر ۇجىمى ماسكەۋ ساحناسىندا 14 قاراشا كۇنى ءوز قويىلىمدارىن ۇسىنادى دەپ كۇتىلۋدە.

Abai.kz