وقو: اتقارىلىپ جاتقان ىستەر لەگى تولاستاماق ەمەس
رەسپۋبليكاداعى ەڭ ۇلگىلى وتباسى وقو-دا تۇرادى
وڭتۇستىك قازاقستان وبلىسى تۇركىستان قالاسىندا ەلىمىزدەگى ەڭ ۇلگىلى، كوپۇلتتى جانە ونەرلى جاس وتباسى تۇرادى. جاقىندا وتكەن رەسپۋبليكالىق «بىرگە ءومىر ءسۇرۋ» فەستيۆالىندە تۇركىستاندىق ابدۋقادىروۆتار وتباسى قاتىسقان بولاتىن. بۇل جانۇيا سايىستا «اققۋ» كۇيىن ۇل-قىزدارى گاۋحار، ەرنازار جانە ازاماتپەن بىرگە ورىنداپ، گران-پري جەڭىپ الدى.
د.ابدۋقادىروۆ – كاسىپكەر، جۇبايى گۇلجان – قازاق ءتىلى مەن ادەبيەت ءپانىنىڭ مۇعالىمى. وتباسىن قۇرعانىنا 7 جىل بولعان بۇل ۇلگىلى وتباسى ەكى ۇلتتىڭ دا سالت-ءداستۇرىن بىردەي ساقتاپ ءومىر ءسۇرىپ كەلەدى.
ەستەرىڭىزگە سالساق، استانا قالاسىندا قر ءبىلىم جانە عىلىم مينيسترلىگىنىڭ ۇيىمداستىرۋىمەن 26 قازان كۇنى «بىرگە ءومىر ءسۇرۋ» رەسپۋبليكالىق فەستيۆالى وتكەن بولاتىن.
وقو مۋزەيلەرى كەلۋشىلەردى قابىلداۋ رەيتينگى بويىنشا الدىڭعى قاتاردان كورىندى
بۇل رەيتينگتى kazmuseum.kz ينتەرنەت جوباسىنىڭ اۆتورى، مۋزەيتانۋشى نۇرسەرىك جولبارىس قر ۇلتتىق ەكونوميكا مينيسترلىگى ۇسىنعان مالىمەتتەرگە سۇيەنە وتىرىپ جاسادى.
مۋزەيتانۋشى كەلتىرگەن دەرەكتەرگە سۇيەنسەك، وڭتۇستىك قازاقستان وبلىسىنداعى مۋزەيلەر 1 ملن. 348 مىڭنان استام ادامدى قابىلداعان. وسىنداي كورسەتكىشپەن وقو كوشباسىندا تۇر. ايتا وتەيىك، وسى جىلدىڭ 1 قىركۇيەگىندەگى ستاتيستيكالىق مالىمەت بويىنشا وبلىستا 2 ملن. 823 مىڭ حالىق تۇرادى.
«مۋزەيگە كەلۋشىلەردى قابىلداۋ جونىنەن وقو ءى ورىندا بولسا، 915 مىڭنان استام ادامدى قابىلداعان استانا مۋزەيلەرى ءىى ورىنعا شىقتى. ال، 691 مىڭ كەلۋشىنى قابىلداعان شىعىس قازاقستان وبلىسى ءىىى ورىندى يەلەندى»، - دەدى ن.جولبارىس
وقو-دا جىلۋ بەرۋ ماۋسىمى كەستەگە ساي جۇرۋدە
شىمكەنت قالاسىندا بۇگىنگى كۇنگە كوپقاباتتى تۇرعىن ۇيلەردىڭ 81 پايىزى جىلۋعا قوسىلعان. بۇل تۋرالى بۇگىن قر پرەزيدەنتى جانىنداعى ورتالىق كوممۋنيكاتسيالار قىزمەتىنىڭ وقو فيليالىندا وتكەن بريفينگتە قالا اكىمدىگىنىڭ تۇرعىن ءۇي كوممۋنالدىق شارۋاشىلىق ءبولىمىنىڭ باسشىسى م.ءابدىنۇروۆ مالىمدەدى.
ونىڭ ايتۋىنشا قالاداعى 1762 تۇرعىن ءۇيدىڭ 1427-ءسى ورتالىق جىلۋمەن قامتىلعان. ال قالعان 335 ۇيلەر 10-شى قاراشاعا دەيىن كەستەگە سايكەس تولىق قوسىلادى. بۇدان بولەك، قالاداعى ءبىلىم، سپورت، دەنساۋلىق پەن مادەنيەت جانە باسقا الەۋمەتتىك نىساندار جىلۋمەن 100 پايىز قامتىلعان.
وسى جىلدىڭ 2 قاراشاسىنا كەلىپ تۇسكەن مالىمەت بويىنشا وبلىستاعى 3256 بيۋدجەتتىك مەكەمەلەرگە تولىق جىلۋ بەرىلگەن. سونىمەن قاتار، ارىس، تۇركىستان قالالارى مەن وتىرار، سارىاعاش، سوزاق، تولە بي، تۇلكىباس اۋداندارىنداعى كوپقاباتتى تۇرعىن ۇيلەر جىلۋمەن تولىق قامتىلسا، كەنتاۋداعى 327 ءۇيدىڭ 250-ءى جىلۋعا قوسىلعان. كەنشىلەر قالاسىنداعى ۇيلەرگە كەستەگە سايكەس 4 قاراشا كۇنى تولىعىمەن جىلۋ بەرىلەدى دەپ جوسپارلانۋدا.
شىمكەنتتىڭ جاسىل بەلدەۋىنە جىل سوڭىنا دەيىن 3 ملن. ءتۇپ كوشەت ەگىلەدى
وڭتۇستىك قازاقستان وبلىسىنىڭ ورتالىعى شىمكەنت جاسىل قالاعا اينالماق. «جاسىل ايماق» باعدارلاماسى اياسىندا كوشەت ەگۋ جۇمىستارى قالانىڭ ءتورت بولىگىندە جۇرگىزىلۋدە. ولار 1700 گا القاپتى الىپ جاتقان «ايكول»، 385 گا «اقتاس»، 300-گە جۋىق گا ء«بورجار» مەن 100 گا «قايناربۇلاق» ۋچاسكەلەرى. بۇگىندە وسى باعدارلامانى جۇزەگە اسىرۋ ماقساتىندا قۇرىلعان «جاسىل ايماق» مەكەمەسىنىڭ ماماندارى قالانىڭ باتىس بولىگىندەگى 2500 گەكتار القاپقا اعاش كوشەتىن ەگۋ جۇمىستارىن باستادى. جاسىل بەلدەۋگە جەلتوقسان ايىنا دەيىن 3 ملن. ءتۇپ قاراعاش ەگىلەدى. بۇل جۇمىستارعا 23 تەحنيكا مەن 120 جۇمىسشى جۇمىلدىرىلعان. ناتيجەسىندە شىمكەنت قالاسىنداعى جاسىل جەلەك 5 مىڭ گەكتار القاپقا ۇلعايىپ وتىر. ەگىلىپ جاتقان كوشەتتىڭ ءبارى وبلىستاعى تالىمباقتاردان الىنىپ وتىر. بۇدان بولەك قالامىزدا اۋماعى 200 گەكتاردى قۇرايتىن قوعامدىق باق تا قۇرىلادى. باقتا الما، شابدالى المۇرت سەكىلدى جەمىس اعاشتارى وسىرىلەدى. بۇل قازاقستاننىڭ وزگە قالالارىندا ازىرگە بالاماسى جوق باق بولماق.
شىمكەنتتىك «ورداباسى» فۋتبول كلۋبى ەۋروپا ليگاسىنىڭ كەلەسى ماۋسىمىنا جولداما الدى
قازاقستان بىرىنشىلىگىنىڭ قورىتىندىسىندا ءتورتىنشى ورىنعا شىققان «ورداباسىلىقتار» شىمكەنتتە وتكەن سوڭعى ويىندا «اتىراۋ» اياقدوپشىلارىنان 0:1 ەسەبىمەن ۇتىلعان بولاتىن. ال ولاردىڭ ءتورتىنشى ورىن ءۇشىن تالاستاعى باستى قارسىلاسى پاۆلودارلىق «ەرتىس» كلۋبى ەلوردادا «استانا» كومانداسىنا 0:1 ەسەبىمەن جول بەرىپ، جولدامادان قاعىلدى.
سونىمەن، بىرىنشىلىكتىڭ اياقتالۋىنا 1 تۋر قالعاندا «ورداباسى» 29 ۇپايمەن تىزىمدەگى ءتورتىنشى ورنىن ساقتاپ قالدى. ەگەر دە قازاقستان كۋبوگىنىڭ فينالىندا «استانا» مەن «قايرات» كلۋبتارى كەزدەسىپ جاتسا، وندا «ورداباسى» فۋتبولشىلارى ەۋروپا ليگاسىنىڭ كەلەسى ماۋسىمىنا قاتىسادى.
ايتا كەتۋ كەرەك، ەۋروپا ليگاسىنىڭ بيىلعى ماۋسىمىندا شىمكەنتتىكتەر ءيزرايلدىڭ «بەيتار» كومانداسىنان جەڭىلىپ، كەلەسى كەزەڭگە وتە الماي قالعان بولاتىن.
