قر پرەزيدەنتى نازارباەۆ باق ءۇشىن اقش-قا ساپارىن قورتىندىلاپ، بۇۇ باس اسسامبلەياسىندا سويلەگەن سوزىنە توقتالىپ ءوتتى.  ەلباسىنىڭ بۇۇ-نىڭ 70 جىلدىق مەرەيتويىندا قانداي ماسەلەلەردى ورتاعا سالىپ، قانداي ۇسىنىس ايتقانىن ءبىز باس تاقىرىپتا جاريا ەتىپ وتىرمىز (http://abai.kz/post/view?id=4828) . سوندىقتان، قازاق قوعامى تاراپىنان قىزۋ قولدانىپ، تالقىلانعان تاقىرىپقا كوشەيىك.

مەملەكەتتىك باسقارۋ ءىسىن ۇنەمى ورىس تىلىندە جۇرگىزەتىن قازاق ەلباسى بۇۇ مىنبەرىندە تۇرىپ اتامىز الاشتىڭ تىلىندە – قازاق تىلىندە سويلەدى. باستاپقىدا پرەزيدەنتتەن مۇندايدى كۇتپەگەنىن الەۋمەتتىك جەلىلەر مەن قازاق تىلىندە اقپارات تاراتاتىن سايتتار جارىسا جازىپ، سوڭىنان  ريزاشىلىقتارىن جاسىرماي اقتارىپ سالدى. مىسالى، الەۋمەتتىك جەلىدەگى كوپ وقىلاتىن جازبالاردىڭ اۆتورى، اقىن، Ult.kz سايتىنىڭ قۇرىلتايشىسى اقبەرەن ەلگەزەك بىلاي دەيدى:

«بۇۇ-دا قازاق تىلىندە بايانداما جاساعان ەلباسى داۋسىز الاش جۇرتىن ءبىر سەرپىلتىپ تاستادى. قۋانىپ وتىرمىز، جاسىرمايمىز.

كۇتپەسەك تە، ەلباسى قازاق تىلىندە ءسوز الدى. ريزامىز. ەندى سىرتتا عانا ەمەس، ەلىمىزدىڭ ىشىندە دە وسى "كەرەمەت جاڭالىق" ءوز جالعاسىن تاپسا، شىركىن! - دەپ قويامىز قيالداپ».

ەلگەزەك مىرزانىڭ جازباسىمەن مازمۇنداس سوزدەر كەشەلى بەرى قازاق ءتىلدى قوعامنىڭ اۋزىنان كوپ ايتىلۋدا. الايدا، ورىس ءتىلدى اعايىن وسى جولى داعدارىپ، وزدەرىنىڭ وركوكىرەكتىگىن، وكپەشىلدىگىن ءبىلدىرىپ الدى. ورتامىزداعى جۇرتتىڭ وسىنداي ويىن اڭعارعان الەمجەلىدەگى وتانشىل اۆتورلاردىڭ ءبىرى  قانات تۇرىسبەكوۆ: «مەن گۋگلعا كىرىپ ورىسشا نۇسقاسىن تىڭدادىم. استىنداعى پىكىر جازۋشىلاردىڭ دەنى ورىستار ەكەن. سول جەردە ولاردىڭ بەتپەردەلەرى اشىلىپ، شىن بەينەلەرىن تانىدىم. پرەزيدەنت ورىس تىلىندە سويلەۋى كەرەك ەكەن ولارشا. پرەزيدەنت ورىسقا جاعىمدى ساياسات ۇستانسا عانا ولار قولداپ ونى جاقسى دەيدى ەكەن. مەن بۇرىننان اڭعاراتىنمىن، ەندى، وسىنى ءىس جۇزىندە وزدەرى دالەلدەدى. بىراق، پرەزيدەنت ەلدە دە قازاق تىلىندە سويلەيتىن بولىپ، سول ۇستانىمدى ۇستاناتىن بولسا، جاعداي كوپ وڭالار ەدى. ءبىز تۇسىنبەيدى دەيتىندەر تۇسىنەدى، كەرەك بولسا سويلەي دە الادى قازاق تىلىندە. ءبىرىنشى ماسەلە - ول شالاقازاقتاردى وياتۋ دەپ بىلەمىن. ءتىلىمىزدىڭ تامىرىنا قان جۇگىرتەر ەڭ باستى توتە جول سول. ەلباسىنىڭ قازاق تىلىندە سويلەگەنىنە مەنىڭ دە كەۋدەمدى قۋانىش كەرنەپ، ريزا بولدىم. قالىڭ قازاقتىڭ ەرتەڭگە دەگەن سەنىمىن وياتىپ، ءدۇر سىلكىندىردى. ءبىز سونداي حالىقپىز عوي. بۇيىعىپ جاتقان نامىس، جىگەر-قايراتىمىز ءبىر-اق ساتتە لاپ ەتىپ تۇتانىپ جالىنعا اينالادى. قۋانىشتارىڭىزعا ورتاقپىن. ەرتەڭىمىزگە سەنىمىمىزدى جوعالتپايىق!».

... سونىمەن الاشتىڭ ءتىلى بۇۇ مىنبەرىنەن ء«سوز الاتىن» التى تىلمەن تابىستى، يىق تەڭەستىردى. كەمەلدىلىگىن، كوركەمدىگىن ايگىلەدى. ادامى تابىلسا،ەڭ باستىسى  نيەت بولسا، ساياساتتىڭ ءتىلى ەكەندىگىن ۇقتىردى. كورشىمەن اراداعى گەواحۋالدىڭ ءمىنايى تۇستارىنان قالايشا  شىلبىر ءۇزىپ، شىرقاپ شىعانعا شىعۋدىڭ مۇمكىندىگىن دە سەزدىردى.  ءوزىنىڭ قازاق تىلىندە سويلەگەنىن قر پرەزيدەنتى: ««مەنىڭ مەملەكەتتىك تىلدەگى ءسوزىم، ونىڭ ۇيىمداعى بارلىق رەسمي التى تىلگە ىلەسپە اۋدارىلۋى دا جاقسى نىشان بولدى»، - دەپ قورتىندىلادى. ەندى وسى جاقسى نىشان ءىلايىم  جالعاسىن تابار بەرسە ەكەن.

Abai.kz