استاناداعى كينوتەاترلاردىڭ بىرىندە ساتۋشى قىزدى تەۋىپ قۇلاتقان قۋانىش تۇراكەلديەۆتىڭ اكەسى بولات تۇراكەلديەۆ پرەمەر-مينيستر كەڭسەسىندەگى قىزمەتىنەن كەتۋگە ءوتىنىش بەرگەن. ول تۋرالى قۋانىشتىڭ قورعاۋشىسى اسقار ۇسەنباەۆ مالىمدەپتى. ونىڭ ايتۋىنشا، قۋانىش تۇراكەلديەۆ ءوزىنىڭ جاساعان ارەكەتى ءۇشىن وكىنىپ وتىرعان كورىنەدى.

«قۋانىش ءوزىنىڭ ارەكەتى ءۇشىن وكىنىپ وتىر، ول كىناسىن مويىندادى جانە تاتۋلاسقىسى كەلەدى. جابىرلەنۋشى تاراپتان كەشىرىم سۇراۋدا. قازىرگى تاڭدا ول استانا قالالىق ءىىد-ءنىڭ ۋاقىتشا ۇستاۋ يزولياتورىندا قاماۋدا وتىر»، – دەدى قورعاۋشى. ول سونداي-اق قۋانىشتىڭ پرەمەر-مينيستر كەڭسەسىندەگى باس ينسپەكتور بولات تۇراكەلديەۆتىڭ ۇلى ەكەنىن راستادى.

ال «كينوپارك-8 سارىارقا» كينوتەاترىندا شەنەۋنىكتىڭ ۇلى قۋانىش تۇراكەلديەۆتەن ءجابىر كورگەن بويجەتكەن مەرۋەرت كەرىمبەرديەۆا 21 جاستا ەكەن.

تۇراكەلديەۆ بويجەتكەنگە قالاي تاپ بەرگەنى ەسىندە جوقتىعى، ءوزىن بيلەي المايتىنداي اشۋلى كۇيدە بولعانىن العا تارتۋى زاڭگەرلەردىڭ ىزاسىن تۋعىزعان سىڭايلى. تانىمال قازاقستاندىق زاڭگەر جانگەلدى سۇلەيمانوۆ قۋانىش تۇراكەلديەۆ ەسىنەن اداسقان ادام دەگەن بولجامىن جاسادى. ول بۇل تۋرالى ءوز Facebook پاراقشاسىندا جازعان.

«تۇراكەلديۆەتى ەسىنەن اداسقان دەپ تانۋ كەرەك. سەبەبى ەسى دۇرىس ادام مۇنداي قىلىق كورسەتپەيدى. پسيحياتريالىق ساراپتامادان وتكىزىپ، تەكسەرۋ كەرەك… بۇل ادام قوعامعا قاۋىپ توندىرەدى…  ول ادامعا اۆتوكولىكتى باسقارۋعا بولمايدى، سونداي-اق جەكە قارۋ ۇستاۋىنا دا تيىم سالۋ كەرەك، – دەيدى سۇلەيمانوۆ. بۇل ەسكەرەتىن جاي. قازىرگى ۋاقىتتا كولىگىمەن جولىنداعى ادامدى شىبىن قۇرلى كورمەي باسىپ وتەتىندەر، وسىنداي پسيحيكاسى دۇرىس ەمەس، شەنەۋنىكتەر مەن بايشىكەشتەردىڭ شولجاڭ بالالارى ەمەس پە؟

Abai.kz