سوت ەسەبىندە "فسب-ءنىڭ بۇرىنعى وفيتسەرى، 2006 جىلى لوندوندا قايتىس بولعان الەكساندر ليتۆينەنكونى ۋلاۋ رەسەي پرەزيدەنتىنىڭ ماقۇلداۋىمەن جاسالعان بولۋى مۇمكىن" ەكەنى ايتىلعان. 

لوندون سوتىنىڭ بۇگىن جاريالاعان ەسەبىندە "ۇزاققا سوزىلعان جاۋلىقتان ليتۆينەنكونى ءولتىرۋدى ءپۋتيننىڭ ءوزى ماقۇلداعانى بولۋى مۇمكىن"دەپ جازىلعان. بۇل تۋرالى «ازاتتىق راديوسى» حابارلايدى.

ليتۆينەنكو پولوني-210 ەلەمەنتىن بايقاۋسىزدا نە ولگىسى كەلىپ قابىلداۋى مۇمكىن ەمەس. كەرىسىنشە ونى ادەيى ۋلاعان دەيدى سوت.

سوت ونى ۋلاعان رەسەي مەملەكەتتىك دۋماسىنىڭ قازىرگى دەپۋتاتى اندرەي لۋگوۆوي مەن كاسىپكەر دميتري كوۆتۋن ەكەنىنە سەنىمدى. ولار پولوني-210 ەلەمەنتىن ليتۆينەنكونى ۋلاۋ ءۇشىن 2006 جىلى 1 قاراشادا كافەدە وتىرعاندا شاينەككە سالعان. لۋگوۆوي مەن كوۆتۋن ليتۆينەنكونى ودان بۇرىن دا، 2006 جىلى 16 قازاندا وسىنداي امالمەن ۋلاماق بولعان دەيدى تەرگەۋشىلەر.

"فەدەرالدىق قاۋىپسىزدىك قىزمەتىنىڭ (فسب - رەد.) ليتۆينەنكونى ءولتىرۋ وپەراتسياسىن [نيكولاي] پاترۋشەۆ (فسب-ءنىڭ سول كەزدەگى باسشىسى), پرەزيدەنت پۋتين ماقۇلداعان بولۋى ىقتيمال" دەيدى لوندون سوتى.

سوت ەسەبىندە ليتۆينەنكونىڭ پۋتينمەن جانە ونىڭ اكىمشىلىگىندەگى لاۋازىمدى شەنەۋنىكتەرمەن "جەكە باس ارازدىعى" جايلى دا ايتىلعان.

ليتۆينەنكونىڭ جەسىرى مارينا ليتۆينەنكو بريتان تەرگەۋشىلەرىنىڭ ەسەبىنە كوڭىلى تولاتىنىن ايتتى. "كۇيەۋىمنىڭ ءولىم اۋزىندا جاتىپ ءپۋتيندى ايىپتاعانىن اعىلشىن سوتى دالەلدەدى" دەدى ول.

ۇلىبريتانيا ىشكى ىستەر ءمينيسترى تەرەزا مەي كەيىنىرەك بريتان پارلامەنتىنىڭ قاۋىمدار پالاتاسىندا جاسايتىن مالىمدەمەسىندە لوندون سوتىنىڭ ەسەبىنە قاتىستى بريتان ۇكىمەتىنىڭ جاۋابىن ايتادى.

رەسەي سىرتقى ىستەر مينيسترلىگى لوندون سوتىنىڭ ەسەبىن "ساياسي استارى بار" دەپ باعالادى. 

كرەمل فسب-نىڭ بۇرىنعى وفيتسەرىنىڭ قازاسىنا قاتىسى جوعىن ۇنەمى ايتىپ كەلەدى. ماسكەۋ كۇدىككە ىلىنگەن اندرەي لۋگوۆوي مەن دميتري كوۆتۋندى ۇلىبريتانياعا ەكستراديتسيالاۋدان باس تارتقان. كرەملدىڭ ءباسپاسوز حاتشىسى دميتري پەسكوۆ 20 قاڭتاردا بۇل ىسكە قاتىستى قوعامدىق تەرگەۋ ەسەبىندە ءپۋتيننىڭ "مۇددەسىنە قاتىستى ماسەلە جوق" دەپ مالىمدەگەن.

اندرەي لۋگوۆوي مەن دميتري كوۆتۋن دا بۇل ىسكە قاتىسى بارىن جوققا شىعارادى. Reuters-ءتىڭ حابارلاۋىنشا، لۋگوۆوي لوندون سوتى ەسەبىندە وزىنە تاعىلعان ايىپتى "ابسۋرد" دەپ اتادى.

سوۆەت قاۋىپسىزدىك قىزمەتىنىڭ، ودان كەيىن فسب-ءنىڭ وفيتسەرى بولعان الەكساندر ليتۆينەنكو 2000 جىلى «فسب ماعان وليگارح بوريس بەرەزوۆسكيدى ءولتىرۋدى تاپسىردى» دەپ كوپشىلىك الدىندا مالىمدەپ، ۇلىبريتانياعا بارىپ باس ساۋعالاعان. كەيىن ول 1999 جىلعى جارىلىسقا فسب-نى ايىپتاعان كىتاپتىڭ قوسالقى اۆتورى بولدى. 

كرەمل سىنشىسىنا اينالعان الەكساندر ليتۆينەنكو 43 جاسىندا، 2006 جىلى قاراشانىڭ 23-ىندە لوندون اۋرۋحاناسىندا كوز جۇمدى. دارىگەرلەر ونىڭ راديواكتيۆتى زات – پولونيدەن ۋلانعانىن انىقتاعان. ليتۆينەنكو قايتىس بولار الدىندا "مەنى ولتىرۋگە پۋتين تاپسىرىس بەردى" دەپ مالىمدەگەن.

Abai.kz