كاسىپوداق بەلسەندىلەرى «دوللار باعامى 150-170 تەڭگەدەن اسپاي تۇرعاندا مەتاللۋرگتەر جالاقىسىن جارتىمدى ساناۋشى ەدى، ۇلتتىق ۆاليۋتا دەۆالۆاتسياسىنان كەيىن باعالار ءوسىپ، جۇمىسشىلار جالاقىسى تۇككە تۇرعىسىز بولىپ قالدى» دەيدى. قازىر دوللاردىڭ رەسمي باعامى - 360 تەڭگە، ياعني كەيىنگى جىلدا تەڭگە شامامەن ەكى ەسە قۇنسىزداندى.

تەمىرتاۋ قالاسىنداعى كاسىپوداق ۇيىمدارىنا جۇمىسشىلاردان «جالاقىنى كوبەيتۋ ماسەلەسىن جۇمىس بەرۋشىمەن تالقىلاۋ قاجەت» دەگەن ۇسىنىستار ءتۇسىپ جاتىر. مەتاللۋرگتەر مەن كومىرشىلەر كاسىپوداعى جالاقىنى كوبەيتۋگە نەگىز بار دەپ سانايدى. كاسىپوداق جەتەكشىلەرى «تەڭگەنىڭ قۇنسىزدانۋى مەتالل ەكسپورتىنان تۇسەتىن كىرىستى كوبەيتىپ، كومپانيانىڭ قارجىلىق كورسەتكىشتەرىن جاقسارتتى، بىراق جۇمىسشىلار جاعدايىن ناشارلاتىپ جىبەردى» دەيدى. قاڭتاردىڭ 14-ءى كۇنى استانادا وتكەن جينالىستا جالاقى كوبەيتۋ ماسەلەسى قارالىپ، وعان كاسىپوداق بەلسەندىلەرى دە قاتىسقان.

كاسىپوداق جەتەكشىلەرىنىڭ ايتۋىنشا، جالاقىنى يندەكستەۋگە قاتىستى 2015 جىلدىڭ تامىزىندا باسقارما وكىلدەرى مەن كاسىپوداق اراسىندا قول قويىلعان كەلىسىم-شارت تولىق ورىندالۋى ءتيىس. ول كەزدە تەڭگەنىڭ دوللارعا شاققانداعى باعامىن باقىلاپ، جالاقىنى كوبەيتۋ شارالارىن ۋاقتىلى جاساۋ تۋرالى شەشىم قابىلدانعان.

اباي-اقپارات