ءۇندىستاندا وزبەك ءبيشىسىن ۇرلاپ كەتتى
27 جاستاعى وزبەكستان ازاماتشاسى شاحنوزا شۋكۋروۆا ءۇندىستان استاناسى دەليدە 2015 جىلى قىركۇيەكتىڭ 24-دە جوعالىپ كەتكەن.
ونىڭ تۋىستارى جاس قىزدى ادام ساۋداسىمەن اينالىساتىندار ۇرلاپ كەتۋى مۇمكىن دەپ سانايدى.
جوعالعان ءبيشى قىزدىڭ اپكەسى ناديرا سايدتىڭ ايتۋىنشا، شامامەن ءبىر جارىم جىل بۇرىن ونىڭ ءسىڭلىسى شاحنوزا اتادجانوۆا ەسىمدى وزبەكستان ازاماتشاسىن ادام ساۋداسىمەن اينالىساتىنداردىڭ قولىنان كەزدەيسوق قۇتقارىپ قالعان. قىزدى پاتەرىنە اكەپ تۇرعىزىپ، ءبىراز اقشا بەرگەن. ناديرا سايدتىڭ ايتۋىنشا، بۇل تۋرالى بىلگەن قىلمىسكەرلەر جاس ءبيشىنىڭ ىزىنە تۇسكەن. ناديرا سايد ءبىراز ۋاقىت وتكەن سوڭ، اتادجانوۆانىڭ كومەگىمەن ءسىڭلىسىن كوشەگە الداپ شىعارىپ العاندار ۇرلاپ كەتتى دەپ سانايدى. ونىڭ ايتۋىنشا، ادام ۇرلانعانىن تريتام ەسىمدى تانىس تاكسي جۇرگىزۋشىسى كورگەنىمەن، پوليتسياعا ەشتەڭە ايتپاعان.
بالا كەزىنەن بيمەن شۇعىلدانعان شاحنوزا شۋكۋروۆا 2008 جىلدان باستاپ، وزبەكستان ۇكىمەتى ۇيىمداستىراتىن شارالارعا قاتىسۋ ءۇشىن ۇندىستانعا ءجيى شىعا باستاعان. نيۋ-دەلي پوليتسياسى مەن وزبەك ديپلوماتتارى شاحنوزا شۋكۋروۆانىڭ جوعالعانى تۋرالى بىلگەنىمەن، ازىرگە ونىڭ قايدا ەكەنىنە قاتىستى ەشتەڭە ايتا الماي وتىر.
اباي-اقپارات
