قوستانايداعى «بايان سۇلۋ» كونديتەرلىك فابريكاسى داعدارىسقا قاراماستان ەكسپورت كولەمىن ۇلعايتىپ جاتىر

بۇگىندە  ەلىمىزدە تەك كونديتەرلىك ءوندىرىس عانا ەمەس، تۇتاس ازىق-تۇلىك ءوندىرىسى اقساپ تۇرعانى ءمالىم. بۇل ۋاقىتشا قۇبىلىس دەپ سەنەمىز. كاسىپورىن باسشىسى ۆيتالي ترايبەردىڭ ايتۋىنشا، فابريكا وتكەن جىلى 41 مىڭ توننا كونديتەرلىك ءونىم شىعارسا، سونىڭ 35 پايىزى ەكسپورتتالعان. قوستاناي تاتتىلەرى رەسەي، ءازىربايجان، قىرعىزستان، وزبەكستان، گەرمانيا، مونعوليا، تۇركىمەنستان، اۋعانستان  ەلدەرىنە جونەلتىلىپتى. جالپى، كاسىپورىن قازىرگى تاڭدا 250-دەن استام ءتۇرلى كامپيت-پىسپە ناندار وندىرەدى.

– ءبىز ەرتەڭگى كۇنگە ۇلكەن سەنىممەن قارايمىز. ءوندىرىس تولىق قۋاتىمەن جۇمىس ىستەمەسە دە، جۇمىسكەرلەر بۇرىنعىسىنشا ەكى اۋىسىمدا ەڭبەك ەتەدى. ەشكىم دە جۇمىستان شىعارىلمايدى،– دەدى كاسىپورىن ديرەكتورى.

ءوندىرىس وشاعى ۇستىمىزدەگى جىلى دا جاڭا جوبالاردى جۇزەگە اسىرماقشى. ولاي دەۋىمىزگە سەبەپ، قازىردىڭ وزىندە  ونىمدىلىگى مەيلىنشە جوعارى ءوندىرىس تسەحىنىڭ قۇجاتتارى دايىن تۇر. تەك، وعان 1,5 ملرد. تەڭگە نەسيە قاجەت. ۆ.تارايبەر ءسوز اراسىندا: ء«بىزدىڭ ونىمدەرگە تۇتىنۋشىلاردىڭ سۇرانىسى وتە جوعارى. سوندىقتان ەڭ ءبىرىنشى ساپاعا كوڭىل بولەمىز. پرەزيدەنتتىڭ ءوزى حالىقتى قازاقستاندا جاسالعان ونىمدەردى تۇتىنۋعا ۇندەدى ەمەس پە. وتە دۇرىس ۇسىنىس. مەن دە سونى ايتار ەدىم. «بايان سۇلۋدىڭ» ونىمدەرى جوعارى ساپالى. ءتىپتى، رەسەي، ۋكرايناداعى ارىپتەستەرىمىزبەن ەركىن باسەكەلەسە الامىز»، – دەدى.

وتكەن 2014-2015 جىلدار كاسىپورىن ءۇشىن تابىستى بولدى. وسى كەزەڭدەردە فابريكا رەكوردتىق كورسەتكىشكە جەتىپ، جىلدىق ءونىمدى 40 مىڭ توننادان اسىردى. ايتسە دە، رەسەي ءرۋبلىنىڭ السىرەۋى كەرى اسەرىن تيگىزىپ، العاشقى جەتى ايدا ءوندىرىس باسەڭدەپ قالعان بولاتىن. قازىر قايتا قارقىن الدى.

– تەڭگەنى ەركىن اينالىمعا جىبەرۋ ساياساتى كۇنى بۇگىنگە دەيىن وتاندىق ءونىم ءوندىرۋشى  كاسىپورىندار ءۇشىن ءتيىمدى بولىپ تۇر. سوڭعى ءبىر ايدىڭ وزىندە  ءبىزدىڭ ءوندىرىسىمىزدىڭ كولەمى مەيلىنشە ارتتى. قازىر ءوز ەلىمىزبەن عانا شەكتەلىپ وتىرعان جوقپىز،  رەسەيدەگى ەكسپورت تا ءوسىپ جاتىر، – دەيدى  «بايان سۇلۋ» كونديتەرلىك فابريكاسىنىڭ باسقارما توراعاسىنىڭ ورىنباسارى تيمۋر سادىقوۆ.

بۇگىندە فابريكادا 2000 ادام ەڭبەك ەتەدى. جۇمىسشىلاردىڭ سانى قىسقارمايدى، ءونىم ساپاسى دا ارتا بەرمەك.

– مەن وسىندا 18 جاسىمدا جۇمىسقا ورنالاستىم. سودان بەرى وتىز ەكى جىل ءوتتى. كوپتەگەن وڭ وزگەرىس بار. قول ەڭبەگى ازايدى، جابدىقتار جىل سايىن جاڭارتىلادى. جالاقى ۋاقىتىلى.  جاڭا تولقىن كوپتەپ كەلىپ جاتىر، ولار ارنايى وقۋعا جىبەرىلەدى، – دەيدى بىزبەن اڭگىمەلەسكەن جەلى وپەراتورى مايرا بايۋاقوۆا.

فابريكانىڭ باستى ۇستانىمى – نارىقتى ساپالى ونىممەن جاۋلاپ، باسەكەدە دەس بەرمەۋ. سول ءۇشىن دە جىل سايىن جاڭا جەلىلەر پايدالانۋعا بەرىلىپ، ءونىم تۇرلەنىپ وتىرادى. كاسىپورىن مۇنىمەن شەكتەلمەك ەمەس. شەتەلمەن اراداعى قارىم-قاتىناستىڭ شەڭبەرىن كەڭەيتىپ، تاۋار الماسۋ شارالارىنا مەيلىنشە دەن قويماق.

– «بايان سۇلۋ» كونديتەرلىك فابريكاسى جىلىنا 1,5 ملرد-تان 3,5 ملرد. تەڭگەگە دەيىن ينۆەستيتسيا تارتادى. بىلتىر 3 ملرد تەڭگەدەن استام قارجى ءبولىندى. وعان جاڭادان دومالاق كونفەت جانە ۆافلي  شىعاراتىن جەلى ساتىپ الىندى. ەندى ۇستىمىزدەگى جىلى جوبا بويىنشا جاڭادان بيسكۆيت تسەحى اشىلاتىن بولادى. وعان دا كەم دەگەندە 5 ملرد. تەڭگەگە جۋىق قارجى جۇمسالادى،– دەيدى ءسوز اراسىندا «بايان سۇلۋ» كونديتەرلىك فابريكاسى باسقارما توراعاسىنىڭ ورىنباسارى تيمۋر سادىقوۆ.

كاسىپورىن جىل اياعىنا دەيىن شىعارىلاتىن ءونىم كولەمىن وتكەن جىلعى مەجە – 40 مىڭ توننادان اسىرۋدى جوسپارلاپ وتىر. «باعا ساياساتىنداعى وڭ وزگەرىس، باسەكەگە قابىلەتتىلىك بۇعان مۇمكىندىك بەرەدى»،– دەيدى «بايان سۇلۋدىڭ» باسشىلىعى.

Abai.kz