سەنبى, 8 تامىز 2020
COVID-19 قازاقستاندا. جۇقتىرعاندار — 97829. جازىلعاندار — 71609. قايتىس بولعاندار — 1058
ءۇمىت پەن كۇدىك 3793 0 پىكىر 31 ناۋرىز, 2016 ساعات 11:12

بەلگيا ساپارى: ەو نازارباەۆتى ادام قۇقىقتارىن ساقتاۋعا شاقىردى

مەملەكەت باسشىسى بەلگياعا ارنايى ءىس-ساپارمەن باردى.  ەۋرو وداق باسشىلارىمەن كەزدەسۋ وتكىزگەن نۇرسۇلتان نازارباەۆ بريۋسسەلدە وداق  توراعاسى دونالد تۋسكپەن كەزدەستى.


ەكى جاق قازاقستان مەن ەو-نىڭ ساياسي، ساۋدا-ەكونوميكالىق جانە مادەني-گۋمانيتارلىق سالالارداعى ارىپتەستىگىن تالقىلادى. اقوردانىڭ ءباسپاسوز قىزمەتىنىڭ مالىمەتتەرىنە سۇيەنسەك،  كەزدەسۋدە قازاقستان مەن ەۋرووداقتىڭ (ەو) ساياسي، ساۋدا-ەكونوميكالىق جانە مادەني-گۋمانيتارلىق سالالارداعى ىنتىماقتاستىعى ماسەلەلەرى تالقىلانعان. قازاقستاننىڭ سىرتقى ساۋدا اينالىمى كولەمىنىڭ جارتىسىنان كوبى ەو ۇلەسىنە تيەتىنىن ايتقان پرەزيدەنت نازارباەۆ ەۋرووداقپەن ينتەگراتسيا ەلىمىزدىڭ سىرتقى ساياساتىنداعى ماڭىزدى باعىتتارىنىڭ ءبىرى ەكەنىن ايتقان.

ءوز كەزەگىندە وداق توراعاسى دونالد تۋسك قازاقستان مەن ەۋرووداقتىڭ ىنتىماقتاستىعى ودان ارى نىعايا تۇسەتىنىنە سەنىم بىلدىرگەن.

بريۋسسەلدەگى بۇل كەزدەسۋدە قازىرگى كەزدەگى ۋكراينا مەن اۋعانستانداعى ۋشىققان احۋال جانە تەرروريزممەن كۇرەس ماسەلەلەرى دە تالقىلانعان.

سونداي-اق، مەملەكەت باسشىسى نۇرسۇلتان نازارباەۆ ەۋروپالىق وداق كوميسسيانىڭ باسشىسى جان-كلود يۋنكەرمەن كەدەستى.

سونىمەن قاتار نۇرسۇلتان نازارباەۆ پەن ج.-ك.يۋنكەر بۇقارالىق اقپارات قۇرالدارى ءۇشىن بىرلەسكەن بريفينگ وتكىزدى.

قازاقستان پرەزيدەنتى ەلىمىزدىڭ ەۋروپالىق وداقپەن 23 جىل بويى ىنتىماقتاسىپ كەلە جاتقانىنا نازار اۋداردى.

– بۇگىندە قازاقستان – ەۋرووداقپەن كەڭەيتىلگەن سەرىكتەستىك جانە ىنتىماقتاستىق تۋرالى كەلىسىمگە قول قويعان بۇرىنعى كەڭەستىك كەڭىستىكتەگى بىردەن-ءبىر ەل.  بۇل قۇجاتقا بىلتىر قول قويىلدى، رەسپۋبليكامىز ونى راتيفيكاتسيالادى، سوندىقتان وسى كەلىسىمنىڭ ەكونوميكالىق بولىگىن 1 مامىردان باستاپ ۋاقىتشا پايدالانا الامىز، – دەدى نۇرسۇلتان نازارباەۆ.

مەملەكەت باسشىسى ەلىمىزدە وتكەن پرەزيدەنتتىك جانە پارلامەنتىك سايلاۋلارعا بايلانىستى قۇتتىقتاۋ جولداعانى ءۇشىن دە العىس ايتتى.

– تاياۋداعى پارلامەنتتىك سايلاۋدى 1000-عا جۋىق شەتەلدىك بايقاۋشى باقىلادى، ولار سايلاۋ ۇدەرىسى دەموكراتيا، بوستاندىق جانە باسەكەگە قابىلەتتىلىك قاعيداتتارى نەگىزىندە بارلىق ءتيىستى زاڭنامانى ساقتاي وتىرىپ جۇزەگە اسىرىلعانىن راستادى، – دەدى قازاقستان پرەزيدەنتى.

نۇرسۇلتان نازارباەۆ ەو ەلدەرىن الداعى «ەكسپو-2017» كورمەسىنە جانە «استانا» حالىقارالىق قارجى ورتالىعىن قۇرۋ ىسىنە قاتىسۋعا شاقىردى.

مەملەكەت باسشىسى قازاقستان مەن ەو سانكتسيالىق تەكەتىرەستى اسىرەسە ونىڭ ءبىزدىڭ ەلگە ىقپالىن ەسكەرە وتىرىپ، بارلىق مۇددەلى تاراپتارعا ءتيىمدى تۇردە شەشۋ جونىندەگى ءىس-قيمىل اياسىنداعى بىرلەسكەن جۇمىستى جالعاستىرۋعا ۋاعدالاسقانىن ايتتى. نۇرسۇلتان نازارباەۆ قازاقستاننىڭ تاياۋ كورشىلەرىمەن – قىتاي حالىق رەسپۋبليكاسىمەن جانە رەسەي فەدەراتسياسىمەن جاقىن دوستىق قارىم-قاتىناس ورناتىپ وتىرعانىنا، ولار ەكونوميكالىق ىنتىماقتاستىق بويىنشا نەگىزگى سەرىكتەس بولىپ سانالاتىنىنا نازار اۋداردى.

مەملەكەت باسشىسى كەلىسسوزدەر بارىسىندا قازاقستان مەن ەو ازاماتتارىنىڭ ءوزارا بارىس-كەلىسى، سونىڭ ىشىندە ەۋرووداق تاراپىنىڭ دا ۆيزا رەجىمىنە قاتىستى جەڭىلدىك جاساۋ مۇمكىندىگى تۋرالى ماسەلەلەر قوزعالعانىن اتاپ ءوتتى. تاراپتار قازاقستان اۋە كومپانيالارىنىڭ ەو ەلدەرىنە ۇشۋىن شەكتەۋگە بايلانىستى احۋالدى شەشۋ جايىن دا تالقىلادى.

سوڭىندا نۇرسۇلتان نازارباەۆ قاراستىرىلعان بارلىق ماسەلە بويىنشا ءوزارا تۇسىنىستىككە قول جەتكىزىلگەنىنە نازار اۋداردى.

ج.-ك.يۋنكەر ساۋدا-ەكونوميكالىق ىنتىماقتاستىقتىڭ ودان ءارى دامي بەرەتىنىنە سەنىم ءبىلدىردى.

– بۇل تىعىز قارىم-قاتىناستار سان ءتۇرلى فورماعا يە بولۋدا. ەۋروپالىق وداق – قازاقستاننىڭ ماڭىزدى ەكونوميكالىق سەرىكتەسى، – دەدى ەۋروپالىق كوميسسيا توراعاسى.

- مەن قازاقستانداعى ادام قۇقىقتارى ماسەلەلەرىن كوتەردىم. مەن ادام قۇقىقتارىنا قاتىستى قازاقستاندا قابىلدانعان ەرەجەلەردىڭ قاتال قولدانىلاتىنى تۋرالى ماسەلەنى ايتتىم. بۇل تۇيتكىلدەردى باسقالارعا قاراعاندا جەتىك بىلمەسەم دە، پرەزيدەنت نازارباەۆتى 30 جىلدان بەرى بىلەمىن. ونىڭ مۇنداي ماسەلەگە وتە نازىك قارايتىنىن، اسىرەسە قازاقستان بيلىگى مەن شەتەلدىك ۇكىمەتتىك ەمەس ۇيىمدار اراسىنداعى قارىم-قاتىناستا ابايلايتىنىن بىلەمىن، - دەدى جان-كلود يۋنكەر بريۋسسەلدەگى بىرلەسكەن ءباسپاسوز جينىنىندا.

سونداي-اق ول ماڭىزدى وڭىرلىك ۇدەرىستەرگە قاتىسىپ وتىرعان قازاقستاننىڭ بىتىمگەرلىك ىقپالىنا ەۋروپالىق وداقتىڭ سەنىم ارتاتىنىن اتاپ ءوتتى.

ج.-ك.يۋنكەر كەلىسسوز بارىسىندا قازاقستاندا جۇزەگە اسىرىلىپ جاتقان رەفورمالار مەن ادام قۇقىعىن ودان ءارى قامتاماسىز ەتۋ ماسەلەلەرى قوزعالعانىن ايتتى.

نۇرگەلدى ابدىعانيۇلى

Abai.kz 

0 پىكىر