- ديرەكتور ىشتە مە؟
- ءيا. كىرىڭىز، ءسىزدى كۇتىپ وتىر.
- شاقىردىڭىز با؟..
- قايدا ءجۇرسىڭ، كۇلپاش؟ سەنى كۇتكەنىمە جارتى ساعات بولدى. قانە، تەز وقۋشىلارىڭدى ال دا، اكىمنىڭ ۇيىنە بار. جەم-ءشوبىن تاسىپ ۇلگەرە الماي، قينالىپ جاتقان كورىنەدى.
- ...
- كۇلپاش، نەگە تەلەفونىڭدى كوتەرمەيسىڭ؟
- مەن وقۋشىلارىممەن بىرگە ەگىستىكتە ءجۇرمىن. داۋسىن ەستىمەي قالىپپىن...
- ەگىستىگى نەسى؟ وندا كىم جىبەردى سەندەردى؟
- ءوزىڭىز وتكەندە ايتىپ ەدىڭىز عوي. اكىمنىڭ ورىنباسارىنا ماساققا كومەكتەسىپ جىبەرىڭدەر دەپ...
- ا، ءيا. وندا ەرتەڭ ەرتەمەن ماعان كىرىپ كەت!
- ...
- سالەمەتسىز بە؟.. كىرۋگە بولا ما؟
- كەل، كەل. قازىر ەشقايدا بۇرىلماي ءبىزدىڭ ۇيگە بار. اۋداننان تەكسەرۋ كەلە جاتىر ەكەن. سولاردى كۇتىپ جىبەرەيىك.
- مەنىڭ بۇگىن اشىق ساباعىم بار ەدى...
- اشىق ساباقتى قايتەسىڭ؟ ءبىر تاپسىرمالارىن بەرە سال. ۇيدەن دايىندالىپ كەلسىن!
- ...
- كەلىڭدەر، كىرىڭدەر. ۇزدىك-سوزدىق بولماي، نەگە ەرتەرەك جينالمايسىڭدار! قىسقاسى، سايلاۋ دا كەلىپ قالدى. ءار ءۇيدى ارالاپ ءجۇرىپ داۋىس جينايسىڭدار. بىلەسىڭدەر عوي، ءۇيدى-ۇيىنە بارماساڭ ءبىرى قوزعالمايدى. 
- ديرەكتور مىرزا، سايلاۋ، كوميسسيا كۇتۋ، كارتوپ جيناۋ دەپ ءجۇرىپ، وقۋ ۇلگەرىمى مۇلدە ناشارلاپ كەتتى...
- توقتات. ساعان مۇنداي اقىلدى سوزدەردى كىم ۇيرەتىپ ءجۇر؟ الدە ورنىڭدى بوساتقىڭ كەلە مە؟
- ... 
- كەل، كۇلپاش. جاعدايدى مەن ايتپاي-اق ءتۇسىنىپ وتىرعان شىعارسىڭ. وقۋشىلارىڭ ۇلتتىق تەستتەن اۋدان بويىنشا ەڭ تومەنگى باعا الدى. سەن عانا ەمەس، مەنىڭ دە باسىما بۇلت ءۇيىرىلىپ وتىر. سوندىقتان، ءوز ەركىڭمەن ارىزىڭدى جازا عوي!

قاناعات ابىلقايىر

Facebook-تەگى پاراقشاسىنان