اۋەل باستا "العىس ايتۋ" كۇنى دەگەن اڭگىمە شىققاندا بۇل مەرەكە "قازاقتارعا العىس ايتۋ" مەرەكەسى بولسىن دەگەن ەدىك. باق-تا باجايلاپ جاتىپ، مەملەكەت باسشىسىنىڭ باستاماسىن قولدادىق. ەگەر ادىلەتتىلىك تارازىسىمەن ولشەيتىن بولساق، سۇرلاۋىت سوعىس جىلدارى ءوز ەركىنەن تىس قازاقستانعا دەپورتاتسيالانعان ەتنوس وكىلدەرىنە قۇشاعىن جايىپ، جارتى تاباسىن ءبولىپ بەرگەن قازاق حالقى الاعاي دا بۇلاعاي كەزەڭدەردى وتكەردى. اتالارىنىڭ اياعىنىڭ تابانى ءتيىپ، ۇرپاعى وسى جەردە تۋىلعان 130 ۇلتتىڭ وكىلى مەملەكەتتى قۇرۋشى ۇلتقا، ياعني قازاقتارعا وسى ءۇشىن دە العىس ايتۋى كەرەك-اق، ەدى ارينە.

بۇگىن اسسامبلەيا دەيتىن مىلقاۋ ءام  مەشەۋ ۇيىم وسى مەرەكەنى باس بولىپ تويلاۋدا. مەملەكەت باسشىسىنىڭ ءوزى قاتىسقان اسسامبلەيا جيىنىندا ايتىلعان سوزدەردەن تۇيگەنىم – بۇل العىس ايتۋ ەمەس، كەشىرىم سۇراۋ كۇنى سىقىلدى. تۇركى تەكتەس ۇلتتارعا ورتاق ناۋرىز مەرەكەسىنىڭ نوبايى بايقالادى بۇگىنگى كۇننەن. ۇلتارالىق ارازدىقتى قوزدىرۋ ەمەس، ماقساتىم. تەك ادىلدىك ىزدەگەنىم. جاپ-جاڭا مەرەكەنى جالپى جۇرت وسى باعىتتا تويلايتىن بولسا، «نۇر» ۇستىنە «نۇر» بولار ەدى-اۋ. اتتەڭ... ءبىر كەم دۇنيە. پرەزيدەنتتىڭ اۋەلدە پارمەن بەرىپ، وسى مەرەكەنى ويلاپ تابۋىنىڭ استارىندا دا وسى وي جاتسا كەرەك ەدى.

سونىمەن، 1 ناۋرىز العىس ايتۋ كۇنى مە، الدە العىس قابىلداۋ كۇنى مە؟!

نۇرگەلدى ابدىعانيۇلى

Abai.kz