ۋكراينا جوعارعى راداسى ەلدىڭ پرەمەر-ءمينيسترى قىزمەتىنە ودەسسا وبلىسىنىڭ گۋبەرناتورى، گرۋزيانىڭ ەكس-پرەزيدەنتى ميحايل سااكاشۆيليدى ۇسىندى. بۇل تۋرالى ۋكراينالىق جانە رەسەيلىك باق جارىسا جازۋدا.

- ۋكراينا راداسىنداعى «ۇلتتىق فرونت» كواليتسياسى مەن «ساموپوموشش» فراكتسياسى پرەمەر-مينيستر قىزمەتىنە ودەسسا وبلىسىنىڭ گۋبەرناتورى بولىپ قىزمەت ەتىپ جۇرگەن ميحايل سااكاشۆيليدى ۇسىنباق،-دەيدى فراكتسيانىڭ ۆيتسە-سپيكەرى ەگور سوبولەۆ.

ء«بىز پرەزيدەنت پەتر پوروشەنكو مىرزاعا ءۇش ادامنىڭ كانديداتۋراسىن ۇسىنباقشى بولعانبىز. ولاردىڭ ىشىندە ەكى شەتەل ازاماتى جانە بۇگىندە ۋكراينا ازاماتى اتانىپ ۇلگەرگەن جانە ۋكراين ءتىلىن جەتىك مەڭگەرگەن ميحايل سااكاشۆيلي مىرزا بار»،-دەيدى سوبولەۆ.

ەستەرىڭىزدە بولسا، ودەسسا وبلىسىنىڭ گۋبەرناتورلىعىنا ۋكراينا پرەزيدەنتى پەتر پوروشەنكونىڭ تىكەلەي پارمەنىمەن تاعايىندالعان ميحايل سااكاشۆيلي بىلتىر ۋكراينا ازاماتى اتانعان ەدى. ۋكراينا ازاماتى اتانعان ءبىر جىلدىڭ ىشىندە ميحايل سااكاشۆيلي ۋكراين ءتىلىن ەركىن مەڭگەرىپ، ساياسي مىنبەرلەردە مەملەكەتتىك تىلدە باياندامالار جاساي باستاعان.

گۇرجى ەلىندەگى ءنومىرى ءبىرىنشى بيلىكتى تاپسىرعان سوڭ لاۋازىمدى شەنەۋنىك قىزمەتىنە شاقىرعان ۋكراين حالقىنا ىقىلاسىن سااكاشۆيلي مىرزا وسىلاي كورسەتىپ جاتىر.

ەندى مىنە، ۋكراينا جوعارعى راداسىندا دەپۋتاتتار ميحايل سااكاشۆيليدى پرەمەر-مينيستر ەتىپ تاعايىنداۋدى ۇسىنۋدا.

P.S. ال ءبىزدىڭ ەلىمىز تاۋەلسىزدىك العان شيرەك عاسىردا قازاقستان ۇكىمەتىن باسقارعان تۇلعالاردىڭ ءبىردى ەكىسى بولماسا، وزگەسى مەملەكەتتىك تىلدەن ماقۇرىم. سولاردىڭ ىشىندە قىزمەتتىك كارەراسى ۇزاققا سوزىلعان كارىم قاجىمقانۇلىنىڭ مەملەكەتتىك تىلگە شورقاقتىعىن ايتا-ايتا شارشادىق. الايدا، قازاق ءتىلىن ءبىر كۇنى ۇيرەنتىن شىعار دەپ جۇرگەنىمىزدە كاكەڭ – كارىم قاجىمقانۇلى قىتايشا سويلەپ كەتتى.

نۇرگەلدى ابدىعانيۇلى

Abai.kz