ارمان قىرىقباەۆ ازەربايجاننىڭ ەلشىسى اليميرزامين اسكەروۆپەن كەزدەستى
قازاقستان رەسپۋبليكاسىنىڭ مادەنيەت جانە اقپارات ءمينيسترى ارمان قىرىقباەۆ ازەربايجان رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى اليميرزامين اسكەروۆپەن كەزدەستى.
كەزدەسۋدە تاراپتار مادەنيەت، مۋزەي ءىسى، بۇقارالىق اقپارات قۇرالدارى مەن كرەاتيۆتى يندۋستريا سالالارىنداعى ىنتىماقتاستىقتى دامىتۋ جونىندە پىكىر الماستى.
ارمان قىرىقباەۆ ەلشىنى قىزمەتكە تاعايىندالۋىمەن قۇتتىقتاپ، قازاقستان مەن ازەربايجان اراسىنداعى تاريحي، مادەني جانە باۋىرلاستىق بايلانىستار ەكىجاقتى ىنتىماقتاستىقتىڭ بەرىك نەگىزى ەكەنىن اتاپ ءوتتى.
تاراپتار مادەني-گۋمانيتارلىق بايلانىستى ودان ءارى نىعايتۋعا ەرەكشە نازار اۋداردى. اتاپ ايتقاندا، ەكى ەلدىڭ مادەنيەت كۇندەرىن وتكىزۋ، مۋزەي جانە كورمە جوبالارىن جۇزەگە اسىرۋ، كرەاتيۆتى يندۋستريا سالاسىندا تاجىريبە الماسۋ ماسەلەلەرىن تالقىلادى.
سونداي-اق ازەربايجان رەسپۋبليكاسىنىڭ پرەزيدەنتى يلحام اليەۆتىڭ 2025 جىلعى قازاندا قازاقستانعا جاساعان مەملەكەتتىك ساپارى كەزىندە جوعارى دەڭگەيدە قول جەتكىزىلگەن ۋاعدالاستىقتارعا سايكەس 2026-2028 جىلدارعا ارنالعان مادەني ىنتىماقتاستىق باعدارلاماسىن ازىرلەۋ بارىسى ءسوز بولدى.
Abai.kz