سالافيتتەر ماعان قارسى نەبىر قيتۇرقى ارەكەتتەر جاساۋدا. اسىرەسە6 قمدب-عا اپپارات جەتەكشىسى بولعان كۇننەن باستاپ جالعان اۆتورلاردىڭ اتىمەن ءتۇرلى جالا جابۋمەن كەلەدى. سەبەبى بەلگىلى. مەن سالافيتتەرگە تۇبەگەيلى قارسىمىن.

ء"دىن مەن ءدىل" اتتى ەكى تومدىق كىتابىمدا سالافيتتەردىڭ قاتەلىكتەرىن اشكەرەلەپ، حانافي ءمازھابى مەن ءماتۋرۋدي اقيداسىنىڭ دۇرىستىعىن، قوجا احمەد ءياساۋيدىڭ سوپىلىق جولىنىڭ شاريعاتقا قايشى ەمەس ەكەندىگىن دالەلدەۋگە تىرىستىم. بۇل ولارعا اۋىر ءتيدى. ءتىپتى ەلباسىنىڭ تىكەلەي قولداۋىمەن اشىلعان "يسلام جانە ءبىلىم" قورىنىڭ قارجىلاندىرۋىمەن نەشە رەت باسىلىپ، تەگىن تاراتىلعان وسى كىتابىمدى كورگەن جەرلەرىندە جويۋعا تىرىسقاندىقتارىنا دا كۋا بولدىم.

ولاردىڭ نەگىزسىز قارالاۋ ارەكەتتەرى مەنىمەن شەكتەلىپ وتىرعان جوق. بۇگىندە سالافيلەرمەن بەلسەندى كۇرەسىپ جۇرگەن ەرسىن امىرە مەن ارمان قۋانىشباەۆ، سانسىزباي شوقانوۆ، ريزابەك باتتالوۆ سەكىلدى بىلىكتى مامانداردى دا قارالاپ، ولاردى شيت، حاباشيت جاساپ جۇرگەندەر دە وسى سالافيتتەر. مەنى بىرەسە، مىسىرداعى كوتەرىلىستى ۇيىمداستىرعان يۋسۋف قارداۋيدىڭ شاكىرىتى، مەملەكەتكە قارسى ادام دەسە، ەندى بىردە نۇرشى-گۇلەنشى دەپ ايىپتادى. ەشبىر دالەلسىز ارنايى تاپسىرىسپەن جازىلعان بۇل سۇيكەمەلەردىڭ اۆتورلارىنىڭ كىم ەكەنىن دە، جەلدىڭ قاي جاقتان سوعىپ تۇرعانىن دا جاقسى بىلەمىن.

راس، دوكتورلىق ديسسەرتاتسيامدى جازىپ جاتقان سوڭعى ءۇش جىلدا بۇلاردىڭ مەنى قارالاۋى باسەڭسىدى. الايدا كەشەگى اقتوبەدەگى وقيعادان كەيىن سالافيلەردى زاڭمەن تىيىم سالۋ كەرەك دەگەن ۇسىنىستارىمنان سوڭ بۇلاردىڭ ماعان شابۋىلى قايتا باستالىپ كەتتى. بىراق بۇل جولى ايتارعا ەشنارسە تابا الماعاننان كەيىن بۇرىنعى جازعان شيمايلارىن جەلىلەرگە كۇمپىلدەتىپ قايتا سالىپ جاتىر. اشىعىن ايتايىن، مەن گۇلەن جاماعاتىنىڭ قازاقستانداعى كوسەمى دە، بەلسەندى مۇشەسى دە ەمەسپىن. بىراق ولار جايلى وبەكتيۆتى پىكىردەمىن. قۇراندا: "قانداي ءبىر قاۋىمعا (توپقا، رۋعا، جاماعاتقا، ۇلتقا) دەگەن دۇشپاندىقتارىڭ سەندەردى ولارعا قارسى ادىلەتسىزدىككە يتەرمەلەمەسىن" -دەلىنەدى. يسلامدى بالاق پەن ساقالدىڭ دەڭگەيىنە ءتۇسىرىپ، ءدىندى سىرتقى پىشىنمەن عانا شەكتەپ، دىندارلىقتى جاتتاندى شابلوندارمەن سويلەۋ دەپ تۇسىنەتىن، ەلدىڭ ىشىنە ىرىتكى سالۋدان باسقا ماقتاناتىن ىستەرى جوق سالافيلەر مەن سىبىردەن باستاپ، افريكاعا دەيىن، جاڭىلىسپاسام الەمنىڭ 160 مەملەكەتىندە مىڭنان اسا مەكتەپ اشىپ، اعارتۋشىلىقپەن اينالىسىپ جاتقان گۇلەن جاماعاتىن ءبىر دەڭگەيگە قويا المايمىن. گۇلەننىڭ اقيداسى ءماتۋرۋدي، ءمازھابى حانافي ەكەندىگى ءمالىم. ال ونىڭ جاماعاتى بولاشاقتا مەملەكەتىمىزگە قاۋىپتى مە؟ ونى مەملەكەتىمىزدىڭ قۇرىعى ۇزىن قۇزىرلى ورىندارى انىقتاۋى ءتيىس. مەنىڭ وسىنداي وبەكتيۆتى كوزقاراسىم ءۇشىن مەنى گۇلەنشى دەيتىندەر دە تابىلا كەتەر. كىمنىڭ اۋزىنا قاقپاق بولاسىڭ؟!

كەشەگى تۋركيادا بولعان مەملەكەتتىك توڭكەرىسكە ۇمتىلۋ ارەكەتى گۇلەنمەن بايلانىستىرىلىپ جاتىر. ال گۇلەن: "مەنىڭ ەشقاتىسىم جوق. حالىقارالىق دەڭگەيدە بەيتاراپ كوميسسيا قۇرىلىپ، توڭكەرىس ارەكەتىنە مەنىڭ قاتىسىمنىڭ بار-جوقتىعى انىقتالسىن، ناتيجەسى نەندەي بولسا دا، مەن وعان ريزامىن. ەگەر مەنىڭ قاتىسىمنىڭ بار ەكەندىگى انىقتالسا، بۇل جەردەن مەنى ەشكىمنىڭ الىپ كەتۋىنىڭ قاجەتى جوق، ءوزىم بيلەت الىپ، ءوز اياعىممەن بارامىن" - دەگەن ۇسىنىسىن ايتتى. گۇلەننىڭ ۇسىنىسى بويىنشا حالىقارالىق كوميسسيا قۇرىلىپ، ونىڭ قاتىسى بار ەكەندىگى راسىمەن دە دالەلدەنىپ جاتسا، وندا ەشكىمنىڭ كوزجاسىنا قاراماستان قازاقستانداعى ليتسەيلەرىن جابۋ كەرەك. جاستارىمىزعا كەرەمەت ءبىلىم بەرىپ جاتقاندىقتارى ولاردى اقتاپ الا المايدى. مەملەكەتىمىزدىڭ قاۋىپسىزدىگى ءبىرىنشى ورىندا بولۋعا ءتيىس!

قايرات جولدىبايۇلىنىڭ Facebook-تەگى پاراقشاسىنان

Abai.kz