بۇگىنگى كۇنگە دەيىن ەلىمىزدەگى جەر رەفورماسىن ءتۇسىندىرۋ ءۇشىن قۇرىلعان Jerturaly.kz سايتىنا قازاقستاندىقتاردان 947 سۇراق كەلىپ ءتۇسىپ، سونىڭ ىشىندە 756-سىنا جاۋاپتارى دايىندالىپ، سايتقا ورنالاستىرىلعان. قالعان 191 ادامنىڭ سۇراعىنا جاۋاپتار دايىندالۋدا. بۇل تۋرالى بۇگىن اتىراۋدا ءوتىپ جاتقان جەر رەفورماسى بويىنشا رەسپۋبليكالىق كوميسسيانىڭ وتىرىسىندا اۋىل شارۋاشىلىعى ءمينيسترىنىڭ ورىنباسارى ە.نىسانباەۆ مالىمدەدى.

ونىڭ ايتۋىنشا، حالىقتان جينالعان سۇراقتاردى تالداساق، جەكە تۇرعىن ءۇي قۇرىلىسىنا جەر بولۋگە بايلانىستى – 114, اۋىل شارۋاشىلىعىنا  - 357, شەتەلدىكتەرگە اۋىل شارۋاشىلىعى جەرلەرىن جالعا بەرۋ ماسەلەسى بويىنشا – 176 جانە باسقا دا ساۋالدارمەن 300 حات كەلىپ تۇسكەن.

ءمينيستردىڭ ورىنباسارى اتالعان سايتپەن قاتار حالىقتىڭ ۇسىنىستارى مەن پىكىرلەرىن جيناپ، كوميسسياعا جەتكىزۋ ماقساتىندا Call-ورتالىق قۇرىلعانىن اتاپ ايتتى.  وسى ورتالىققا 2016 جىلدىڭ 14 مامىرىنان باستاپ 23 شىلدەگە دەيىن 12 458 قوڭىراۋ شالىنعان. ايماقتىق call-ورتالىقتاردىڭ اراسىندا ەڭ كوپ قوڭىراۋ سوعىلعاندارى: الماتى قالاسى (1049), اقتوبە (842), الماتى وبلىسى (608) جانە باتىس قازاقستان وبلىسى (580). ەڭ ازدارى – سولتۇستىك قازاقستان (28), قوستاناي (103) جانە قاراعاندى (114) وبلىستارى. اتاپ ايتارلىعى، وسى ورتالىققا كەلىپ تۇسكەن ساۋالداردىڭ باسىم كوپشىلىگى – (9583-ءى، 77 پايىزى) جەكە تۇرعىن قۇرىلىسىنا قاتىستى بولعان.

ە. نىسانباەۆ جەر رەفورماسى بويىنشا رەسپۋبليكالىق كوميسسيانىڭ بۇگىنگە دەيىن 8 وتىرىسى وتكەنىن، سونىڭ ىشىندە 4-ءۋى – استانادا، قالعاندارى – اقمولا، الماتى، قىزىلوردا وبلىستارىندا جانە اتىراۋدا ءوتىپ جاتقانىن جۇرتشىلىقتىڭ ەسىنە سالدى. ونىڭ ايتۋىنشا، رەسپۋبليكالىق كوميسسيانىڭ فيليالى رەتىندە وبلىستىق اكىمدىكتەر جانىنان قۇرىلعان قوعامدىق كەڭەستەر حالىقپەن اۋداندىق جانە وبلىستىق دەڭگەيدە 1,2 مىڭنان استام كەزدەسۋلەر وتكىزگەن. وسى كەزدەسۋلەرگە 70 مىڭنان استام ادام قاتىسىپتى. بۇل كورسەتكىشتىڭ ءوزى اتالعان كوميسسيانىڭ حالىقپەن تىعىز قارىم-قاتىناس جاساپ، ءتيىمدى جۇمىس ىستەگەنىن بىلدىرەدى. جالپى العاندا، ەلىمىزدىڭ ءار ايماعىنىڭ تۇرعىندارىنىڭ كوميسسيا جۇمىسىنا بەلسەنە ارالاسۋى، ءوز وي-پىكىرلەرىن اشىق، ەركىن جەتكىزۋى ەل اۋماعىندا الەۋمەتتىك جانە قوعامدىق ماڭىزى زور ماسەلەنى كەڭىنەن تالقىلاۋعا مۇمكىندىك بەردى. بۇعان قۇزىرەتتى كوميسسيا مۇشەلەرىنىڭ بەلسەندىلىگى، كاسىبيلىگى، مەملەكەتشىلدىگى ءوز سەپتىگىن تيگىزدى.

ءامىرلان ءالىمجان 

Abai.kz