تۇياقباەۆتىڭ ايتۋىنشا، قازىر «باستاپقى ىزدەستىرۋ ءىس-شارالارى» جۇرگىزىلىپ جاتىر، نارىمباەۆتىڭ كەتىپ قالعانى راستالاتىن بولسا، وندا ء«تيىستى شارالار قابىلداناتىن بولادى». نارىمباەۆ ەلدەن كەتىپ قالعانىن راستاپ قانا قويماي، ءتىپتى ول تۋرالى كيەۆتە ءباسپاسوز ءماسليحاتىن وتكىزىپ ۇلگەرگەن ەدى.

«باقىلاۋ قىزمەتى بولىمىنە تىركەۋگە تۇرعىزعان ۋاقىتتا ونىمەن ءتۇسىندىرۋ جۇمىستارى جۇرگىزىلدى، بىراق ول اشۋلانىپ، سوت جۇكتەگەن جاۋاپكەرشىلىكتەردى دۇرىس قابىلداعان جوق. ول جازانىڭ نەگىزگى مەرزىمى تولىق وتەلمەيىنشە نەمەسە باقىلاۋ ۋاقىتى اياقتالمايىنشا، قازاقستان اۋماعىنان شىعۋعا تىيىم سالىناتىنى تۋرالى جازباشا ەسكەرتىلدى»، - دەدى دەپارتامەنت وكىلى.

ەرمەك نارىمباەۆتىڭ ۋكرايناعا كەتىپ قالعانى 14 شىلدەدە ايدوس سادىقوۆتىڭ Facebook'تە نارىمباەۆپەن كيەۆتە بىرگە تۇسكەن سۋرەتىن جاريالاعان ۋاقىتتا بەلگىلى بولدى. نارىمباەۆپەن بىرگە كيەۆكە تاعى ءبىر بەلسەندى ءمولدىر ءادىلوۆا بارعان. ءادىلوۆا بيىل 21 مامىردا «جەر ماسەلەسى» بويىنشا ميتينگ كەزىندە ۇستالعانداردىڭ ءبىرى. نارىمباەۆ پەن ءادىلوۆا كيەۆتە ءباسپاسوز ءماسليحاتىن بىرگە وتكىزىپ، قازاقستاندا قۋدالاۋعا ۇشىراعاندارىن جانە ساياسي باسپانا سۇرايتىندارىن مالىمدەدى.

ەرمەك نارىمباەۆ 2015 جىلدىڭ اياعىندا مۇرات تەلىبەكوۆتىڭ «ۆەتەر س ۋليتسى» كىتابىنان Facebook'تەگى پاراقشاسىندا ءۇزىندى جاريالاعانى ءۇشىن ۇلتارالىق ارازدىق تۋعىزدى دەگەن ايىپپەن سوتتالدى. تۇرمە مەرزىمى كەيىن ەركىندىگىن شەكتەۋ جازاسىنا الماستىرىلعان ەدى.