جۋالى اۋدانى باۋىرجان مومىشۇلى اۋىلىنداعى شارۋا قوجالىقتارىنىڭ 15 باسشىسى اگروبيزنەس نەگىزدەرىنە ارنالعان وقۋدان ءوتتى.

كاسىپكەرلەر پالاتاسى اۋىل شارۋاشىلىعى تاۋارلارىن وندىرۋشىلەرگە ارنالعان وقۋ دارىستەرى مەن تاجىريبە ساباقتارىن باستادى. اۋىلشارۋاشىلىق سۋبەكتىلەرى وسىمدىك شارۋاشىلىعى جاڭالىقتارىن، سونداي-اق اگروبيزنەستى ءتيىمدى جۇرگىزۋ نەگىزدەرىن وقيدى.

شىلدە مەن قىركۇيەك ايلارى ارالىعىندا جامبىل وبلىسىنىڭ وسىمدىك وسىرەتىن سەگىز بازالىق شارۋاشىلىعىندا بەس باعىت بويىنشا 25 سەمينار، سونىمەن قاتار مال شارۋاشىلىعى بويىنشا بىرقاتار سەمينارلار وتتى. سەمينارلار وتكىزۋ ءۇشىن قۇزىرەتتى ساراپشىلار تارتىلادى.

جۋالى اۋدانى باۋىرجان مومىشۇلى اۋىلىنداعى شارۋا قوجالىقتارىنىڭ 15 باسشىسى العاشقى وقۋدان ءوتتى. 

«جامبىل وبلىسى جاعدايىندا مايلى داقىلداردىڭ رەنتابەلدى ءوندىرىسى» سەمينارى تاقىرىبىن ساراپشى، اۋىل شارۋاشىلىعى عىلىمدارىنىڭ كانديداتى، قازاقتىڭ جەر شارۋاشىلىعى مەن وسىمدىك شارۋاشىلىعىن عىلىمي-زەرتتەۋ ينستيتۋتى فيليالىنىڭ ديرەكتورى ەرلان كۇلكەەۆ اشتى.

تىڭداۋشىلارعا اۋداندا ماقسارى ءوسىرۋدى تەحنولوگيالىق جانە سەرۆيستىك قولداۋ، وڭدەۋ تەحنولوگياسى، ەگىس اينالىمى جۇيەسى ەگجەي-تەگجەيلى ءتۇسىندىرىلدى، وسىمدىك قورعاۋعا ارنالعان تىڭايتقىشتار ۇسىنىلدى.

اۋىل شارۋاشىلىعى قۇرىلىمدارى باسشىلارى ەڭ الدىمەن تەوريالىق جاعىن قىزىعۋشىلىقپەن تىڭدادى، سونان سوڭ «جايىق» شق-نى ارالاۋعا شىقتى، مۇندا ساراپشى ماقسارى ەگىستىگىندە تاجىريبەدە الىنعان ءبىلىمدى قالاي قولدانۋعا بولاتىنىن كورسەتتى.

«ماقسارى قاتاڭ كليمات جاعدايىنا بەيىمدەلگەن جانە قۇرعاقشىلىققا وتە ءتوزىمدى وسىمدىكتەر قاتارىنا جاتادى، – دەپ  تۇسىندىرەدى ەرلان كۇلكەەۆ. – ماقسارى باعالى ماقسارى مايىنىڭ تۇقىمدارىنان الىنىپ وڭدەلەدى، ونى  اس رەتىندە دە، تەحنيكالىق ماقساتتارعا دا قولدانۋعا بولادى.  سونىمەن قاتار پروتەينگە باي قۇنارى جوعارى ازىق  بولىپ سانالادى».

ونىڭ ايتۋىنشا، ماقسارىنىڭ جاڭا سۇرىپتارىن وڭدەۋدىڭ ىلعال قورىن ساقتايتىن تەحنولوگياسىن ەنگىزۋ ىشكى نارىقتى تولىقتىرۋ جانە ەلدىڭ ازىق-تۇلىك قاۋىپسىزدىگىن قامتاماسىز  ەتۋ ءۇشىن ماقسارى مايى ءوندىرىسى كولەمىن ۇلعايتۋعا جول اشادى.

«قاراپايىم، قول جەتىمدى، پايدالى، – دەيدى  «دۋلاتي» شق باسشىسى نۇرعات جاقسىلىقوۆ. – ءبىز دە ماقسارى وسىرۋدەمىز جانە بۇگىن كوپتەگەن جاڭالىق ەستىدىك، مىسالى، زيانكەستەر، ەگۋ مەرزىمى جايلى. قازىرگى كەزدە  اۋىل شارۋاشىلىعى مەملەكەت  تاراپىنان قولداۋ مەن  قارجى كۇتەدى».

Abai.kz