گيۋلەندى قولداۋشىلارعا قارسى كامپانيادا 34 جۋرناليست پرەسس-كارتتارىنان ايىرىلدى، ءبىلىم مينيسترلىگىنىڭ 15 مىڭ قىزمەتكەرى، ۋنيۆەرسيتەتتىڭ مىڭ جارىمنان استام دەكانى، ءدىني باسقارمانىڭ 490 جۇمىسشىسى، پرەمەر-مينيستر اپپاراتىنىڭ 257 جانە بارلاۋ قىزمەتىنىڭ 100 قىزمەتكەرى جۇمىستارىنان شىعارىلدى.

سوڭعى كۇندەرى 35 مىڭ ارميا وفيتسەرى، پوليتسيا، سوت جانە مەملەكەتتىك قىزمەت وكىلدەرىنىڭ ءبىرازى ۇستالىپ، قالعاندارى قىزمەتتەرىنەن شەتتەتىلدى. ولاردىڭ ءبارى مەملەكەتكە قارسى قاستاندىق ارەكەتىنە قاتىسى بار دەپ ايىپتالادى.

سەيسەنبى كۇنى تۇركيا بيلىگى اقش-تا تۇراتىن گيۋلەندى كەرى قايتارىپ، قاماۋعا الۋدى تالاپ ەتتى. تۇرىك پرەمەر-ءمينيسترى بينالي يىلدىرىم اقش بيلىگىنە ەلەكتروندى جۇيەمەن ول تۋرالى تولىق مالىمەت جىبەرگەنىن مالىمدەدى. گيۋلەن بولسا، وزىنە تاعىلعان بارلىق ايىپتاردى جوققا شىعارادى، تىپتەن ەگەر اقش سوتى ونى كەرى قايتارۋعا شەشىم شىعارسا، وعان دا دايىن ەكەنىن جەتكىزدى. مۇنىڭ الدىندا ۆاشينگتون انكارادان گيۋلەننىڭ توڭكەرىس ارەكەتىنە قاتىسى بارى دالەلدەنەتىن جان-جاقتى ءارى ناقتى دايەكتەر ۇسىنۋىن وتىنگەن.

تۇركيانىڭ باتىستاعى ارىپتەستەرى، سونىمەن بىرگە بۇۇ انكارا بيلىگىنەن زاڭ اياسىندا جۇمىس ىستەۋگە شاقىرىپ، 2004 جىلى ەنگىزىلگەن ءولىم جازاسىنا ءموراتوريدى الىپ تاستاۋ مۇمكىندىگىنە الاڭداۋشىلىقتارىن ءبىلدىردى. تۇركيا پرەزيدەنتى رەجەپ تايىپ ەردوعان ءولىم جازاسى تەك مەملەكەتتىك توڭكەرىستى ۇيىمداستىرۋشىلارعا عانا قاتىستى بولۋى مۇمكىن دەدى.

اباي-اقپارات